តារាម៉ូដែលចិនរូបស្រស់ត្រូវជាប់គុក៥ឆ្នាំ ដោយសារបើកវង់ល្បែង

2015-09-11 23:04:20
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាល្បីឈ្មោះលើបណ្ដាញអ៊ីនធឺណិតម្នាក់ឈ្មោះ Guo Meimei ត្រូវកាត់ទោសដាក់ពន្ធនាគាររយៈពេល ៥ឆ្នាំ និងពិន័យជាប្រាក់ចំនួន ៥ម៉ឺនយាន់ (ជិត ៧៩០០ដុល្លារ) ដោយសារបើកវង់ល្បែងខុសច្បាប់។

នារីវ័យ ២៤ឆ្នាំម្នាក់នេះត្រូវបានប៉ូលិសឃាត់ខ្លួនកាលពីខែសីហា ឆ្នាំ២០១៤ នៅពេលដែលប៉ូលិសក្រុងប៉េកាំងចុះបង្ក្រាបជម្រកល្បែងមួយ អំឡុងការប្រកួតកីឡាបាល់ទាត់ពិភពលោក World Cup។ ប៉ូលិសបានសង្ស័យថានារីម្នាក់នេះមានពាក់ព័ន្ធជាមួយនឹងការធ្វើជំនួញល្បែងខុសច្បាប់ រកស៊ីផ្លូវភេទ និងបង្ហោះរឿងមិនពិតលើអ៊ីនធឺណិត។ ប៉ូលិសបានរកឃើញទៀតថា Meimei ចាប់ផ្ដើមបើកវង់ល្បែងខុសច្បាប់តាំងពីខែមីនាដល់ខែកក្កដា ឆ្នាំមុន។ គេហទំព័រ Global Times បានបញ្ជាក់ថា មេល្បែងរូបនេះបានជួលអ្នកលេងល្បែងជំនាញមកលេងនៅក្នុងវង់របស់ខ្លួន ដែលពេលខ្លះលុយភ្នាល់ឡើងរហូតដល់ ១លានយាន់(១៥,៧ម៉ឺនដុល្លារ)។

ពេលសារភាពលើកញ្ចក់ទូរទស្សន៍ CCTV, Meimei បានទទួលស្គាល់ថាខ្លួនមានជាប់ពាក់ព័ន្ធជាមួយការលេងល្បែងខុសច្បាប់ ជួញដូរផ្លូវភេទ និងសូមទោសដែលបានធ្វើឲ្យខូចឈ្មោះដល់កាកបាទក្រហមចិន។ យ៉ាងណាមិញ នារីម៉ូដែលរូបនេះបានលើកឡើងថា៖ "ខ្ញុំដឹងថាខ្ញុំបានសាងកំហុស ខ្ញុំមិនគួរណាលេងល្បែង តែខ្ញុំមិនគិតថាការបើកវង់ល្បែងគឺជាបទល្មើសនោះទេ" ។ Guo Meimei កើតក្នុងឆ្នាំ ១៩៩១។ មុនពេលជាប់ទោសក្នុងរឿងលេងល្បែង Meimei ធ្លាប់ជាតារាម៉ូដែលដែលដើរបង្ហាញម៉ូដក្នុងកម្មវិធីផ្សេងៗ និងចាប់ផ្ដើមមានឈ្មោះល្បីក្រោយពេលបង្ហោះរបស់ថ្លៃៗតាមអ៊ីនធឺណិត។ ក្រោយពេលចាប់ខ្លួន តារាម៉ូដែលរូបនេះបានសារភាពថាលុយទាំងនោះបានមកការរកស៊ីផ្លូវភេទ និងបានពីបុរសអ្នកមានដែលខ្លួនស្គាល់៕