ខ្ញុំសុខចិត្តធ្វើជាប្រុសកំសាកដើម្បីសេចក្ដីសុខនាង

2015-09-14 17:42:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្នេហាមួយបានផុសឡើងចេញពីអារម្មណ៍យុវវ័យមួយគូ គឺបានតែមួយឆ្នាំក៏បែកគ្នាទៅវិញ ដោយសារតែការសម្រេចចិត្តលះបង់សេចក្ដីសុខរបស់ខ្លួនទៅឲ្យនារីម្នាក់ជួបអ្នកថ្មី ដែលមានស្ថានភាពសេដ្ឋកិច្ចល្អជាង និង ចេះយកចិត្តទុកដាក់ច្រើនជាង។ ការលះបង់នេះ ក៏ត្រូវរងពាក្យរិះគន់ពីខាងស្រីថា "ជាមនុស្សកំសាក មិនហ៊ានតស៊ូដើម្បីសេចក្ដីស្នេហា"។

នេះជារឿងរ៉ាវមួយរបស់ យុវជន សន្ដាន (ឈ្មោះហៅក្រៅ) និង នារី សុតន់ (ឈ្មោះហៅក្រៅ) ដែលបានរៀបរាប់ពីសេចក្ដីស្នេហាកាលពីនៅបឋមវ័យមកកាន់គេហទំព័រ Sabay នៅក្នុងកម្មវិធី "មនុស្សដែលខ្ញុំចងចាំ"។

វ័យ ១៩ ឆ្នាំ សន្ដាន ចាប់ផ្ដើមមានស្នេហាលើកដំបូងរបស់ខ្លួនជាមួយ សុតន់ វ័យ ១៨ ឆ្នាំ ដែលជាអ្នករស់នៅក្បែរខាងគ្នា តាំងពីនៅតូចៗមកម៉្លេះ។ សន្ដាន កើតនៅក្នុងគ្រួសារក្រីក្រមួយ គឺជា ជាងសំណង់នៅម្ដុំស្ទឹងមានជ័យ ខណៈសុតន់ គឺជា អ្នកលក់ចាប់ហួយធំមួយ ដែលមានស្ថានភាពសេដ្ឋកិច្ចគ្រាន់បើដែរ។

រូបតំណាង

កាលពីនៅវ័យកុមារ សន្ដាន និង សុតន់ តែងតែលេងសើចជាមួយគ្នា ដូចជា លេងលោតកៅស៊ូ បាញ់ឃ្លី ជាមួយគ្នាជាដើម រហូតដល់ធំ ចូលថ្នាក់វិទ្យាល័យអ្នកទាំងពីរ បានរៀននៅវិទ្យាល័យតែមួយ គ្រាន់តែថ្នាក់ខុសគ្នា ហើយ សន្ដាន ក៏ធ្លាប់ចូលផ្ទះរបស់សុតន់ ឯសុតន់ក៏ធ្លាប់ចូលផ្ទះរបស់សន្ដាន ដែលនៅឆ្ងាយគ្នាប្រមាណ ១៥ ម៉ែត្រ។

ទំនាក់ទំនងស្នេហាចាប់ផ្ដើមមាន នៅគ្រាដែលមិត្តភ័ក្ដិចេះតែបង្អាប់ រហូតបាក់ចិត្តស្រឡាញ់រៀងៗខ្លួន។ មិនយូរប៉ុន្មានទំនាក់ទំនងនេះ កាន់តែស្អិតល្មួត រហូតហ៊ានណាត់គ្នាដើរលេង និង ជួនកាលចូលដល់យប់ជ្រៅទៀតផង។ ប៉ុន្ដែ អ្នកទាំងពីរ បានលាក់លៀមស្នេហាមិនឲ្យចាស់ទុំដឹងឮឡើយ។

ថ្វីបើចំណងស្នេហានេះបានបង្កើតនូវអនុស្សាវរីយ៍គួរសមហើយក្ដី ក៏ចំណងស្នេហានេះចាប់ផ្ដើមរង្គោះរង្គើ ក្រោយពីមានអ្នកទីបី មកស៊ើបសួរ សុតន់ ដល់ចាស់ទុំ ហើយម្ដាយ-ឪពុក របស់សុតន់ក៏ពេញចិត្តបុរសម្នាក់នោះដែរ ព្រោះគេ គឺជា អ្នកជំនួញមួយគ្រាន់បើដែរ។

សន្ដាន បានរៀបរាប់ពីដំណើររឿងទៀតថា "ក្រោយពីរឿងនេះ សុតន់ បានព្យាយាមសួរនាំខ្ញុំ តើពួកយើងគិតម៉េច? តើយើងគួរប្រាប់លោកអ្នកមានគុណអំពីទំនាក់ទំនងរបស់យើងដែរទេ? តើយើង....”។

សំណួរជាច្រើនរបស់ សុតន់ បានធ្វើឲ្យសន្ដានឈឺក្បាល តែនៅទីបំផុត សន្ដានបានសម្រេចចិត្តសុំបែកពីសុតន់ ដោយលើកហេតុផលថា នៅក្មេង ពុំទាន់មានលទ្ធភាព បង្កើតគ្រួសារមានសុភមង្គលបានឡើយ។ ប៉ុន្ដែ ចម្លើយទាំងនេះ មិនបានធ្វើឲ្យសុតន់ សប្បាយចិត្តនោះទេ ថែមទាំងប្រើសម្ដីធ្ងន់ៗ ដាក់សន្ដានថា "កំសាក មិនចេះទទួលខុសត្រូវរឿងស្នេហា ចុះស្នេហាយើងកន្លងមក បងគិតយ៉ាងម៉េច?”។

ទោះជារងការជេរស្ដីជាច្រើនពីសុតន់ក៏ដោយ ក៏សន្ដាននៅតែសម្រេចចិត្តចុងក្រោយ គឺបែកគ្នា ដោយសន្ដានប្រាប់ Sabay ថា៖ "ខ្ញុំក្រ ឯគេមានធនធាន ដូច្នេះ ខ្ញុំមិនចង់អោបក្រសោបនាង ហើយធ្វើឲ្យនាងមានជម្លោះក្នុងគ្រួសារទេ ខ្ញុំដឹងថា ឪពុក-ម្ដាយ នាងមិនពេញចិត្តខ្ញុំទេ បើដឹងថា ខ្ញុំស្រឡាញ់នាងនោះ ព្រោះខ្ញុំនៅរៀន និង ធ្វើការតិចតួចបានចំណូលតិចណាស់ មិនអាចមានលទ្ធភាពចិញ្ចឹមនាងបានទេ អីចឹងយើងម៉េចនឹងមានសុភមង្គល ម៉្លោះហើយបានជាខ្ញុំសម្រេចចិត្តឲ្យនាងរៀបការជាមួយបុរសម្នាក់នោះ"។

ថ្វីបើរឿងរ៉ាវកន្លងផុតទៅ ៦ ឆ្នាំមកហើយក្ដី ក៏សន្ដាន នៅតែមានអារម្មណ៍នឹកនានាងជានិច្ច ព្រោះសុតន់ គឺជា ស្នេហ៍ដំបូង។ "បង! បើទោះខ្ញុំមានសង្សារក្រោយនេះ ហើយគេក៏មានកូនពីរហើយ តែខ្ញុំនៅតែនឹកនាងដដែល ឲ្យតែឃើញនាងម្ដងៗ ខ្ញុំចេះតែមានអារម្មណ៍ថា ខ្ញុំធ្វើខុសច្រើនណាស់ចំពោះនាង ហើយខ្ញុំស្ដាយអនុស្សាវរីយ៍ចាស់ អីចឹងហើយ រាល់ពេលខ្ញុំឃើញនាង គឺខ្ញុំតែងតែគេចមុខពីនាងជានិច្ច"។ សន្ដាន និយាយ។

សន្ដាន បានចោទជាសំណួរតាមរយៈ Sabay ទៅកាន់ប្រិយមិត្តថា៖

-ខ្ញុំសម្រេចចិត្តបែកខុសដែរទេ? -ខ្ញុំពិតជាកំសាកមែនឬ? -ខ្ញុំគេចមុខនាងបែបនេះជាជម្រើសមិនល្អមែនទេ? -តើត្រូវដូចម្ដេចដើម្បីខ្ញុំអាចប្រឈមមុខការពិត?

ចុះប្រិយមិត្ត Sabay មានយោបល់ដូចម្ដេចដែរជុំវិញបញ្ហានេះ?

មានអត្ថបទពាក់ព័ន្ធនឹងមនុស្សដែលអ្នកចងចាំ ចង់ឲ្យ Sabay ចុះផ្សាយ សូមទាក់ទង៖

លេខទូរសព្ទ៖ 017 557 688 អ៊ីមែល៖ prak.chanseyha@cidc.com.kh លេខទូរសព្ទ៖ 099 588 880 អ៊ីមែល៖ bin.bunna@cidc.com.kh

ចង់ដឹងលក្ខខណ្ឌដើម្បីសរសេរផ្ញើមកកាន់ Sabay បានសូមចុចត្រង់នេះ!