អាកាសចរអាមេរិកច្រឡំយកយន្តហោះផ្លូវជិត ទៅហោះឆ្លងមហាសមុទ្រ

2015-09-14 18:46:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនអាកាសចរ American Airlines បានប្រព្រឹត្តិកំហុសដោយអចេតនា ដោយសារច្រឡំបញ្ជូនយន្តហោះស្រដៀងគ្នា ឲ្យដឹកអ្នកដំណើរឆ្លងមហាសមុទ្រពីក្រុង Los Angeles ទៅក្រុង Honolulu រដ្ឋហាវ៉ៃ។ នេះបើតាមអ្នកនាំពាក្យបានបញ្ជាក់ប្រាប់ទៅសារព័ត៌មានAFP កាលពីថ្ងៃអាទិត្យម្សិលមិញ។

កាលពីថ្ងៃ៣១សីហាកន្លងទៅ យន្តហោះដឹកអ្នកដំណើរធុន Airbus A321S ត្រូវបានគេអះអាងថាច្រឡំជាមួយ Airbus A321H ដែលមានគ្រប់លក្ខខណ្ឌធ្វើដំណើរចម្ងាយឆ្ងាយបាន។ ប៉ុន្តែទម្រាំដឹងគឺយន្តហោះ Airbus A321S ដែលមិនគ្រប់លក្ខខណ្ឌហោះផ្លូវឆ្ងាយឆ្លងមហាសមុទ្របាននោះ បានដឹកអ្នកដំណើរទៅដល់កន្លែងដោយសុវត្ថិភាពរួចទៅហើយ។

អ្នកនាំពាក្យក្រុមហ៊ុនអាកាសចរ លោក Casey Norton បានឲ្យដឹងថានេះគឺដោយសារកំហុសភ័ន្តច្រឡំ។ "វាមានម៉ាស៊ីនដូចគ្នា ធុងប្រេងសាំងដូចគ្នា និងទំហំក៏ដូចគ្នា។ ប៉ុន្តែA321H មានបំពាក់ឧបករណ៍អុកស៊ីហ្សែន និងឧបករណ៍ការពារពេលមានអាសន្នបន្ថែមច្រើនទៀត"។

អ្នកនាំពាក្យដដែលបានបន្តថា៖ "យន្តហោះដែលឆ្លងកាត់សមុទ្រ និងមានរយៈពេលច្រើនជាងមួយម៉ោង គឺតម្រូវឲ្យមានឧបករណ៍ការពារគ្រប់គ្រាន់ និងត្រួតពិនិត្យតាមបច្ចេកទេសត្រឹមត្រូវ។ យ៉ាងណាក្ដី រដ្ឋបាលផ្នែកអាកាសចរ បានបង្កឲ្យមានកំហុសដែលមិនបានពិនិត្យឲ្យម៉ត់ចត់"។

ក្រោយកើតមានបញ្ហានោះ ខាងអ្នកបច្ចេកទេសបានកែតម្រូវលើ Software សម្រាប់ត្រួតពិនិត្យយន្តហោះឲ្យត្រឹមត្រូវឡើងវិញ៕

ចុចអាន៖ យន្តហោះអនាគត រំពឹងផ្ទុកអ្នកដំណើរបាន២០០០នាក់ និងមិនត្រូវការព្រលាន

ប្រែសម្រួល៖ មាន រតនា ប្រភព៖ channelnewsasia