កូរ៉េខាងជើង ដំណើរការអាវុធនុយក្លេអ៊ែរឡើងវិញ អាចប៉ះអាមេរិកពេលណាក៏បាន

2015-09-15 22:54:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីភ្នាក់ងារសារព័ត៌មានជាតិកូរ៉េខាងជើង KCNA បានប្រកាសកាលពីប៉ុន្មានម៉ោងមុននេះថា កម្មវិធីអាវុធនុយក្លេអ៊ែររបស់ប្រទេសកុម្មុយនិស្តមួយនេះ បានដំណើរការពេញលេញវិញហើយ។ ប្រភពដដែលក៏បានបញ្ជាក់ផងដែរថា ជាមួយអាវុធនុយក្លេអ៊ែរ កូរ៉េខាងជើងអាចប៉ះសហរដ្ឋអាមេរិកបានគ្រប់ពេល។

កូរ៉េខាងជើងបានអភិវឌ្ឍទាំងគុណភាព និងបរិមាណនៃអាវុធនុយក្លេអ៊ែរ និងប្រកាសថាដំណើរការលើការចម្រាញ់សារធាតុអ៊ុយរ៉ាញ៉ូមក្នុងមន្ទីរស្រាវជ្រាវវិទ្យាសាស្ត្រនុយក្លេអ៊ែរ Yongbyon Complex ចាប់ផ្ដើមដំណើរការធម្មតា។ យ៉ាងណាក្ដី ទំហំពិតប្រាកដរបស់សមត្ថភាពនុយក្លេអ៊ែររបស់កូរ៉េខាងជើង គឺនៅតែមិនច្បាស់។

រំលឹកផងដែរថា មន្ទីរពិសោធន៍នុយក្លេអ៊ែរ Yongbyon Complex ត្រូវបានបិទនៅក្នុងឆ្នាំ២០០៧ ប៉ុន្តែកូរ៉េខាងជើង បានចាប់ផ្ដើមដំណើរការវាឡើងវិញ ក្រោយការសាកល្បងអាវុធនុយក្លេអ៊ែរលើកទី៣ក្នុងឆ្នាំ២០១៣។

ការប្រកាសនេះ គឺធ្វើឡើងមុនខួបគម្រប់៧០ឆ្នាំនៃគណបក្សកម្មកររបស់កូរ៉េខាងជើង នាថ្ងៃទី១០ ខែតុលា ដែលប្រទេសនេះគ្រោងធ្វើព្យុះហយាត្រាទ្រង់ទ្រាយធំ។ ទីក្រុងព្យុងយ៉ាងក៏បានប្រកាសពីគម្រោងធ្វើតេស្តគ្រាប់រ៉ុកកែតចម្ងាយឆ្ងាយរបស់ខ្លួនផងដែរ។ អ្នករាយការណ៍ព័ត៌មានរបស់ BBC បានឲ្យដឹងថាការប្រកាសនេះគឺមិនមែនមានន័យថាកូរ៉េខាងជើងមានមីស៊ីល ឬគ្រាប់រ៉ុកកែតចម្ងាយឆ្ងាយនោះទេ ប៉ុន្តែគឺជាការបង្ហាញឲ្យឃើញថាប្រទេសនេះមានសមត្ថភាពអាចធ្វើវាបាន៕