Mario និង Mai សម្ដែងរឿងខ្លីនិយាយពីបុរសខ្មែរម្នាក់ត្រូវគេបោកធ្វើទាសករនេសាទនៅថៃ

2015-09-21 18:34:24
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពូលតារាសម្ដែងថៃពីររូបគឺ Mario Maurer និង Davika “Mai” Hoorne បានចូលខ្លួនសម្ដែងរឿងខ្លីអប់រំមួយផលិតដោយអង្គការអន្តោប្រវេសន៍អន្តរជាតិដែលហៅកាត់ (IOM) ដែលបង្ហាញពីបញ្ហាកម្មករម្នាក់ដែលធ្លាក់ខ្លួនជាទាសករក្នុងឧស្សាហកម្មនេសាទនៅប្រទេសថៃ។

ខ្សែរឿងខ្លីមានចំណងជើងថា “Prisana” ដែលបានចេញផ្សាយកាលពីសប្ដាហ៍មុន បង្ហាញពីបុរសជនជាតិខ្មែរម្នាក់ត្រូវគេបោកបញ្ឆោតមកធ្វើការលើទូកនេសាទនៅប្រទេសថៃ ក្រោមការបង្ខំឲ្យធ្វើការនិងវាយធ្វើបាបយ៉ាងឃោរឃៅ។

ក្នុងរឿងនេះដែរ Marioដើរតួជាអ្នកថតរូបវ័យក្មេង ដែលតាមជួយដល់ស្ត្រីខ្មែរម្នាក់ស្វែងរកប្ដីដែលបានបាត់ខ្លួន ពេលមកធ្វើការនៅប្រទេសថៃ។ Mario បានប្តេជ្ញាចិត្តស្វែងរកបុរសដែលចាញ់បោកមេខ្យល់មកធ្វើការលើទូកនេសាទ រហូតដល់មានការឈ្លោះគ្នាជាមួយមិត្តស្រី Mai ព្រោះតែនាងចង់ឲ្យមិត្តប្រុសមានពេលនៅជាមួយគ្នាឲ្យបានច្រើន។

ទីបំផុត Mario បានរកឃើញបុរសដែលជាជនជាតិខ្មែរម្នាក់នោះ។ នៅពេលនោះហើយដែល Mai ចាប់ផ្ដើមយល់អំពីការជួញដូរមនុស្សនិងទុក្ខលំបាករបស់ជនដែលត្រូវគេបោកមកធ្វើការលើទូកនេសាទ ក្រោយឃើញរូបខ្លោចចិត្តក្នុង Laptop របស់ Mario។

អ្នកស្រី Tara Dermott ដែលជាអ្នកដឹកនាំកម្មវិធីនៃយុទ្ធការប្រឆាំងរបស់អង្គការ IOM បានលើឡើងថា៖"ពួកយើងសង្ឃឹមថារឿងនេះនឹងជួយបង្កើនការយល់ដឹងអំពីការជួញដូរមនុស្សទៅកាន់គ្រួសារនៅតាមតំបន់ផ្សេងៗ ហើយពួកយើងក៏មានទិសដៅ ដើម្បីទូន្មានដល់យុវជនក្មេងៗជំនាន់ក្រោយតាមរយៈវីដេអូនេះ ដើម្បីចូលរួមប្រយុទ្ធប្រឆាំងការជួញដូរមនុស្ស"។ ទស្សនាវីដេអូរឿងខ្លីខាងក្រោមនេះ៖