ក្រុមហ៊ុន Vertu បង្ហាញស្មាតហ្វូនថ្មី មួយគ្រឿងតម្លៃ១១០០០ដុល្លារ

2015-09-25 16:21:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Vertu បានបង្ហាញពីស្មាតហ្វូនស៊េរីថ្មីរបស់ខ្លួនមានតម្លៃកប់ពពក ដោយគ្រោងនឹងដាក់លក់ក្នុងខែតុលាខាងមុខនេះហើយ។

ស្មាតហ្វូនដែលក្រុមហ៊ុនបានបង្ហាញមានឈ្មោះថា New Signature Touch ដែលដើរដោយប្រតិបត្តិការ Android 5.1 Lollipop។ ទូរសព្ទនេះមានបំពាក់នូវអេក្រង់ទំហំ ៥,២អ៊ីញ កម្រិត HD 1080p និងមានបំពាក់បន្ទះ Chip Snapdragon 810 ដែលមាន Processor ចំនួន៨គ្រាប់។ ចំពោះកាមេរ៉ាមានទំហំ ២១មេហ្គាភិចស្សែល អាចផ្ដិតយករូបភាពបានច្បាស់ល្អ ព្រមទាំងមាន RAM ទំហំ 4GB និង អង្គចងចាំទំហំ 64GBផងដែរ។ ក្រៅពីលក្ខណៈសម្បត្តិពិសេសៗទាំងនេះ អ្វីដែលធ្វើឲ្យស្មាតហ្វូននេះកាន់តែពិសេសនោះ គឺការផលិត និងការរចនាម៉ូដមានភាពស៊ីវិល័យ។

រាល់ផ្នែកនីមួយៗនៃស្មាតហ្វូនម៉ូដែល New Signature Touch នេះគឺសុទ្ធតែផ្គុំបញ្ចូលគ្នាដោយដៃផ្ទាល់ និងដោយមនុស្សតែម្នាក់តាំងពីដើមរហូតដល់ចប់។ ចំណែកតម្លៃវិញគឺប្រមាណ ១១០០០ដុល្លារក្នុងមួយគ្រឿង ដោយតម្លៃនេះគឺអាស្រ័យទៅលើជម្រើសនៃវត្ថុធាតុដើមដែលអ្នកទិញចង់បាន។ ឧទាហរណ៍ថា ប្រសិនបើអ្នកចង់បានម៉ូដែលមាស អ្នកត្រូវចំណាយទឹកប្រាក់ប្រមាណ ២៦០០០ដុល្លារក្នុងមួយគ្រឿង។

គួរបញ្ជាក់ថា ស្មាតហ្វូនស៊េរីថ្មីដែលក្រុមហ៊ុន Vertu បានបង្ហាញនេះនឹងមានដាក់លក់ជាផ្លូវការនៅថ្ងៃទី១៦ ខែតុលាខាងមុខនេះ៕

ចុចអាន៖ នារីម្នាក់មានសំណាងបានក្លាយជាម្ចាស់ iPhone 6s ពណ៌ស៊ីជម្ពូមុនគេបង្អស់

ប្រែសម្រួល៖ ហៃ សុខហេង ប្រភព៖ TheVerge