Henry៖ "Arsenal នៅតែអាចលើកពាន Premier League”
- 2015-09-25 16:39:31
- ចំនួនមតិ 0 | ចំនួនចែករំលែក 0
Henry៖ "Arsenal នៅតែអាចលើកពាន Premier League”
ចន្លោះមិនឃើញ
Thierry Henry វីរបុរសក្រុម Arsenal បានលើកឡើងថា កាំភ្លើងធំនៅតែអាចប្រជែងយកពានរង្វាន់ Premier League រដូវកាលនេះ បន្ទាប់ពី Manchester City ភ្លាត់ចាញ់ West Ham។
Arsenal ចាប់ផ្ដើមរដូវកាលថ្មី ពុំសូវបានល្អប៉ុន្មានទេ ពោលគឺ៦ប្រកួតកន្លងទៅនេះ ឈ្នះ៣ ស្មើ១ និងចាញ់២លើក ដោយមាន១០ពិន្ទុ ឈរនៅលេខ៥ ក្នុងតារាង។
ក្រុមរបស់លោក Arsene Wenger ដែលចាញ់ Chelsea ២-០ លើកចុងក្រោយ ក៏ត្រូវរងការរិះគន់ច្រើនដែរពីអ្នកគាំទ្រ បន្ទាប់ពីមានទម្រង់លេងមិនល្អ។ ប៉ុន្តែសម្រាប់ Henry នៅតែជឿថា កាំភ្លើងធំនៅអាចប្រជែងយកពានលីកកំពូលអង់គ្លេសបានដដែល។
អតីតខ្សែប្រយុទ្ធជម្រើសជាតិបារាំង បានប្រាប់ដល់ SkySports ថា៖ "ខ្ញុំនឹងបារម្ភខ្លាំង បើ Man City ឈ្នះ West Ham ប៉ុន្តែសំណាងល្អពួកគេអត់ឈ្នះ។ យ៉ាងណា Arsenal នៅមានសង្ឃឹម ទោះចាញ់ Chelsea ២-០ ក៏ដោយ។ អ្វីៗក៏អាចកើតឡើងបានដែរ នៅក្នុងលីក។ ដូចដែលយើងធ្លាប់ដឹងហើយ គ្មាននរណាម្នាក់គិតថា West Ham ធ្វើដំណើរទៅ Anfield, Emirates និង Etihad ហើយទទួលបានជ័យជម្នះទេ។ ដូច្នេះខ្ញុំនៅតែគិតថា Arsenal អាចប្រជែងយកពាន”។
Arsenal ដែលទើបតែឈ្នះ Tottenham Hotspur ២-១ នៅ Capital One Cup កាលយប់ថ្ងៃពុធ នឹងត្រូវធ្វើដំណើរទៅប៉ះ Leicester City ក្នុងការប្រកួត Premier League សប្ដាហ៍ទី៧ចុងសប្ដាហ៍នេះ មុននឹងស្វាគមន៍បិសាចក្រហម Man Utd នៅ Emirates Stadium នៅសប្ដាហ៍បន្ទាប់ទៀត៕
ចុះប្រិយមិត្តយល់ស្របតាម Henry ដែរទេ?
-ចុចអាន៖ Henry ថាបើ Arsenal ទិញបាន Benzema នឹងលើកពាន EPL & UCL
ប្រែសម្រួល៖ វិន ជីវ័ន្ត ប្រភព៖ squawka