អ្នកគាំទ្រដឹងអ្វីខ្លះពីខ្សែការពារក្រុមបឹងកេត សុខ សុវណ្ណ?

2015-09-25 20:35:05
ចំនួនមតិ 0 | ចំនួនចែករំលែក 0

ចន្លោះមិនឃើញ

សុខ សុវណ្ណ ជាកីឡាករមួយរូបដែលកំពុងបំពេញយុទ្ធនាការនៅលីកកំពូលកម្ពុជា ក្នុងនាមជាខ្សែការពាររបស់ក្រុមបឹងកេតអង្គរ។ ក្រៅពីនេះរូបគេក៏ត្រូវជួយក្រុមជម្រើសជាតិ ក្នុងការប្រកួតជម្រុះបាល់ទាត់ពិភពលោកឆ្នាំ២០១៨ផងដែរ។ អ្នកគាំទ្រប្រាកដជាឮឈ្មោះកីឡាករ សុខ សុវណ្ណ ស្ទើរគ្រប់ការប្រកួតរបស់បឹងកេត និងជម្រើសជាតិ តែប្រហែលមិនបានដឹងអ្វីច្រើនឡើយពីប្រវត្តិខ្លះរបស់កីឡាកររូបនេះ។

ក្លាយជាកីឡាករដោយគ្មានការព្រាងទុក សុខ សុវណ្ណ ជាក្មេងម្នាក់ដែលចូលចិត្តលេងបាល់ទាត់តាំងពីរៀននៅបឋមសិក្សា គ្រាន់ជាការកំដរអារម្មណ៍ ហើយក៏មិនធ្លាប់នឹកស្មានថាបានជាប់ឈ្មោះជាកីឡាករជម្រើសជាតិដូចបច្ចុប្បន្នដែរ។ ឱកាសនេះបានធ្លាក់មកដល់ដៃ ពេលមានការរៀបចំប្រកួតពានរង្វាន់ Miloជ្រើសរើសកីឡាករឆ្នើមវ័យក្មេង។ ដោយទេពកោសល្យខាងកីឡាមានតាំងពីតូច សុវណ្ណ បានជាប់ក្នុងការប្រកួតជ្រើសរើសនោះ និងចាប់ផ្ដើមអាជីពជាមួយក្រុមជម្រើសជាតិក្រោមអាយុ ១៤ឆ្នាំ ដោយចេញទៅប្រកួតជាលក្ខណៈអន្តរជាតិលើកដំបូងក្នុងឆាកជីវិតនៅប្រទេសម៉ាឡេស៊ី។ ក្រោយមករូបគេបានជាប់ជម្រើសជាតិបន្តបន្ទាប់តាំងពីឈុតយុវជន រហូតដល់ជម្រើសជាតិឈុតធំនាពេលបច្ចុប្បន្ននេះ។ ការចាប់ផ្ដើមដ៏ល្អក្នុងក្រុមជម្រើសជាតិ

ក្រោយចាប់ផ្ដើមជាមួយក្រុមជម្រើសជាតិអាយុក្រោម ១៤ឆ្នាំ សុវណ្ណ បានបង្ហាញទម្រង់លេងយ៉ាងល្អ រហូតគ្រូបង្វឹកជ្រើសរើសចូលក្រុមឈុតយុវជន U16, U19, U21, U23 និងបន្តចូលក្រុមជម្រើសជាតិឈុតធំ ចេញទៅប្រកួតនៅក្រៅប្រទេសជាញឹកញាប់ ជាពិសេសក្នុងយុទ្ធនាការជម្រុះបាល់ទាត់ពិភពលោកឆ្នាំ២០១៨ ក្នុងពូល E សម្រាប់តំបន់អាស៊ី ជុំទីពីរ។

សុវណ្ណ បានចេញទៅប្រកួតគ្រប់ប្រទេសក្នុងតំបន់អាស៊ាន បូករួមទាំងម៉ាកាវ និងប្រទេសជប៉ុនផងដែរ។ សម្រាប់ប្រកួតអន្តរជាតិដែលខ្សែការពាររូបនេះចងចាំមិនភ្លេច គឺពេលប៉ះជប៉ុនក្នុងការប្រកួតជម្រុះជើងទីមួយ។ ពេលនោះកម្ពុជាអាចទប់ក្រុមខ្លាំងសាម៉ូរ៉ៃជប៉ុន ចាញ់ត្រឹម ៣-០ ខណៈក្រុមផ្សេងទៀតនៅអាស៊ានសុទ្ធតែបរាជ័យយ៉ាងចាស់ដៃ។

កីឡាករ សុខ សុវណ្ណ(លេខ២)ក្នុងក្រុមជម្រើសជាតិ

អាជីពក្នុងលីកបាល់ទាត់កម្ពុជា

កីឡាករ សុខ សុវណ្ណ បានចាប់ផ្ដើមប្រលូកចូលអាជីពកីឡាបាល់ទាត់ដំបូងក្នុងឈុតយុវជនក្រុម Phnom Penh empior B ចាប់ពីឆ្នាំ ២០០៧ ដល់ឆ្នាំ ២០០៩។ ចាប់ពីឆ្នាំ២០០៩ ដល់ឆ្នាំ ២០១២ ខ្សែការពារដ៏រឹងមាំរូបនេះ បានចូលលេងឲ្យឈុតធំ គឺក្រុមភ្នំពេញក្រោន។ ចាប់អាជីពនៅភ្នំពេញក្រោនបានបីឆ្នាំ រូបគេក៏ប្ដូរមកលេងឲ្យក្រុមបឹងកេតអង្គររហូតដល់បច្ចុប្បន្ន។ សុវណ្ណ បានបង្ហាញទម្រង់លេងយ៉ាងល្អក្នុងរដូវកាលថ្មី ដោយរួមគ្នាជាមួយសមាជិកក្រុមការពារសំណាញ់ទីបឹងកេតឲ្យក្រុមផ្សេងស៊ុតចូលត្រឹម ១៩គ្រាប់ប៉ុណ្ណោះ ហើយកំពុងឈរលើកំពូលតារាងបណ្ដោះអាសន្ន។

សុខ សុវណ្ណ កំពុងហ្វឹកហាត់(រូបទីពីរ រាប់ពីស្ដាំ)

ជីវិតឯកជន កីឡាករ សុខ សុវណ្ណ ជាកូនទោលក្នុងគ្រួសារមួយ ដែលមានឪពុកម្ដាយជាអ្នកលក់ដូរ នៅខណ្ឌ ៧មករា រាជធានីភ្នំពេញ។ តាំងពីបឋមសិក្សា រហូតដល់វិទ្យាល័យ សុវណ្ណ បានសិក្សានៅបាក់ទូកទាំងអស់។ ដោយសារគ្មានពេលវេលាគ្រប់គ្រាន់ និងចង់ចាប់អាជីពជាអ្នកកីឡា សុវណ្ណ បានផ្អាកការសិក្សា ក្រោយប្រលងជាប់បាក់ឌុបក្នុងឆ្នាំ២០០៨។ ថ្ងៃទី១២ ឧសភា ឆ្នាំ២០១៥ កន្លងទៅនេះ សុវណ្ណ បានសម្រេចចិត្តចូលរោងការជាមួយកូនក្រមុំ ដែលជាបុគ្គលិករបស់ក្រុមហ៊ុនឯកជនមួយកន្លែង។ មុនអាពាហ៍ពិពាហ៍កើតឡើង គូស្នេហ៍ ១គូនេះបានសិក្សាយល់ចិត្តថ្លើមជាងមួយឆ្នាំ ទើបសម្រេចចិត្តស្វែងរកអនាគតដើរផ្លូវមួយរួមគ្នា៕