៤ ជំហាននាំអ្នកធ្វើដំណើរតាំងពីព្រលានដល់ប្រទេសគោលដៅយ៉ាងសុវត្ថិភាព

2015-10-04 20:08:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ការធ្វើដំណើរតាមយន្តហោះមាននីតិវិធីស្មុគស្មាញ និងអាចចាត់ទុកថាជារឿងដ៏ឈឺក្បាលមួយសម្រាប់អ្នកមិនសូវមានបទពិសោធន៍ឬធ្វើដំណើរជាលើកដំបូង។ ប៉ុន្តែមើលតាមការណែនាំរបស់ Sabay នឹងធ្វើឲ្យប្រិយមិត្តកាន់តែមានទំនុកចិត្ត ពេលត្រូវធ្វើដំណើរតាមយន្តហោះមិនថាដើម្បីបំពេញការងារឬការកម្សាន្តផ្សេងៗ។

ខាងក្រោមជាព័ត៌មានសំខាន់ៗដែលប្រិយមិត្តត្រូវដឹងសម្រាប់ការធ្វើដំណើរតាមយន្តហោះ។

ដំណាក់កាលទី១ ត្រៀមនិងរៀបចំឯកសារសំខាន់ៗមួយចំនួនជាចាំបាច់៖

សំបុត្រធ្វើដំណើរ (សំបុត្រយន្តហោះ)៖ ជាចាំបាច់អ្នកដំណើរត្រូវមានសំបុត្រយន្តហោះ បើមិនដូច្នោះទេមិនអាចធ្វើដំណើរបានទេ។ សំបុត្រយន្តហោះ អ្នកអាចស្វែងរកនៅក្រុមហ៊ុនអាកាសចរដែលអ្នកត្រូវជិះធ្វើដំណើរ ឬតាមទីភ្នាក់ងារទេសចរផ្សេងៗតាមតម្រូវការ។

អ្នកធ្វើដំណើរតម្រូវឲ្យរក្សាទុកនូវសំបុត្រធ្វើដំណើរនៅជាប់ខ្លួនតាំងពីចាប់ផ្ដើមដល់ទីបញ្ចប់នៃការធ្វើ ដំណើរ ព្រោះវាត្រូវប្រើសម្រាប់ឆែកសំបុត្រចូលព្រលាន និងគោលបំណងអន្តោប្រវេសន៍។

-លិខិតឆ្លងដែន៖ អ្នកធ្វើដំណើរទាំងអស់ត្រូវធ្វើឲ្យប្រាកដថា លិខិតឆ្លងដែនរបស់ខ្លួន មានសុពលភាពយ៉ាងហោចណាស់ឲ្យបាន៦ខែ គិតត្រឹមថ្ងៃធ្វើដំណើរ។

អ្នកធ្វើដំណើរតម្រូវឲ្យមានលិខិតឆ្លងដែនដែលមានសុពលភាពសម្រាប់ការធ្វើដំណើរជាអន្តរជាតិ ក្នុងកំឡុងពេលធ្វើដំណើរ ព្រោះអ្នកត្រូវបង្ហាញលិខិតឆ្លងដែននៅបញ្ជរឆែកសំបុត្រ និងអន្តោប្រវេសន៍។ មានប្រទេសមួយចំនួនត្រូវការសុពលភាពនៃលិខិតឆ្លងដែនមានរយៈពេលវែងជាងរយៈពេលធ្វើដំណើរទៅទៀត។ ដូច្នេះ ត្រូវតែឆែកនូវកាលបរិច្ឆេទនៃសុពលភាពលិខិតឆ្លងដែន ជាប្រចាំដែលជាតម្រូវការលិខិតឆ្លងដែន នៃប្រទេសដែលអ្នកត្រូវធ្វើដំណើរទៅ។

ទិដ្ឋាការ៖ ទិដ្ឋាការ ជាការអនុញ្ញាតសម្រាប់បុគ្គលមិនមែនសញ្ជាតិ ធ្វើដំណើរទៅប្រទេសជាក់លាក់ណាមួយ។ ដើម្បីស្វែងយល់ថាតើអ្នកតម្រូវឲ្យមានទិដ្ឋាការទៅកាន់ប្រទេសណាមួយនោះដែរឬទេ សូមឆែកមើលព័ត៌មាន អំពីប្រទេសដែលអ្នកចង់ទៅជាក់លាក់នោះ។

បើសិនត្រូវធ្វើដំណើរទៅក្រៅប្រទេសដែលមិនចាំបាច់សុំទិដ្ឋាការ អ្នកធ្វើដំណើរត្រូវស្វែងយល់ថាប្រទេសទាំងនោះអាចអនុញ្ញាតឲ្យយើង ស្នាក់នៅជាលក្ខណៈទេសចរ ឬជំនួញបានរយៈពេលប៉ុន្មានថ្ងៃ។ យើងអាចស្វែងយល់ពីរយៈពេលដែលស្នាក់នៅបាន តាមរយៈស្ថានទូតរបស់ប្រទេសនោះ។

តែបើយើងទទួលបានប្រភេទទិដ្ឋាការស្នាក់នៅរយៈពេលវែងដូចជាៈ ទិដ្ឋាការសិក្សា,ការងារ, ឬរស់នៅជាអចិន្ត្រៃយ៍ អ្នកធ្វើដំណើរទាំងអស់អាចទិញសំបុត្រតែមួយជើងទៅបាន (One Way Ticket) តែអ្នកធ្វើដំណើរត្រូវភ្ជាប់មកនូវឯកសារយោងមួយចំនួនដែល បញ្ជាក់ពីការស្នាក់នៅរបស់ខ្លួនពេល check in នៅព្រលានយន្តហោះនៃកន្លែងចេញដំណើរ និងពេលទៅដល់។

ក្រៅពីបីចំណុច៣សំខាន់ៗ ដែលជាឯកសារចាំបាច់សម្រាប់ធ្វើដំណើរតាមយន្តហោះ នៅមានឯកសារបន្ទាប់បន្សំផ្សេងៗទៀតដែលអ្នកធ្វើដំណើរ ត្រូវភ្ជាប់ជាមួយខ្លួនក្នុងករណីដែលមានការសួរនាំដូចជាៈ ការកក់សណ្ឋាគារ, តារាងកាលវិភាគ ឬកន្លែងទេសចរដែលនឹងត្រូវដើរកម្សាន្ត ឬអ្នកធានាពីការធ្វើដំណើរជាដើម។

ដំណាក់កាលទីពីរ នៅព្រលានយន្តហោះ

ជាការផ្តល់យោបល់ សម្រាប់អ្នកធ្វើដំណើរការមកដល់ព្រលានយន្តហោះទាន់ពេលវេលាជារឿង សំខាន់ ដូច្នេះដើម្បីជៀសវាងបញ្ហាយឺតយ៉ាវ ឬការខកជើងយន្តហោះដោយប្រការណាមួយ អ្នកធ្វើដំណើរទាំងឡាយគួរលៃពេលវេលា នៃការមកដល់ព្រលានយន្តហោះឲ្យបានយ៉ាងតិច ៣ម៉ោងមុនម៉ោងចេញដំណើរ សម្រាប់ការហោះហើរជាលក្ខណៈអន្តរជាតិ និងយ៉ាងតិច ២ ម៉ោងមុននៃម៉ោងចេញដំណើរសម្រាប់ការហោះហើរក្នុងស្រុក។

នៅព្រលានត្រូវដឹងពីនីតិវិធីអីខ្លះ

@ Check-in៖ Check in ដើម្បីថ្លឹងអីវ៉ាន់សម្រាប់ផ្ញើ និងយក Boarding Pass ដើម្បីឡើងយន្តហោះ និងលេខកៅអីសម្រាប់អង្គុយ។ ពេល check in បុគ្គលិក check in ឬបុគ្គលិកអាកាសចរនឹងប្រាប់ពីវត្ថុដែលអាចផ្ញើ ឬយកតាមខ្លួនបាន និងវត្ថុដែលត្រូវហាមឃាត់ក្នុងការយកឡើងយន្តហោះ។ ប្រសិនបើឆ្លងកាត់ការត្រួតពិនិត្យរកឃើញវត្ថុដែលអាចមាន គ្រោះថ្នាក់ ឬហាមឃាត់, ភ្នាក់ងារសន្តិសុខព្រលាននឹងទាក់ទងទៅម្ចាស់ឥវ៉ាន់។

ជាទូទៅរបស់របរដែលធ្វើពីដែក មានភាពមុតស្រួច ដូចជាកាំបិត, កន្ត្រៃកាត់ក្រចក, កន្ត្រៃ របស់ដែលអាចមានជាតិឆេះ ដែកកេស, ឈើគូស និងរបស់ផ្សេងៗដែលអាចបង្ហាញថាមានគ្រោះថ្នាក់ដល់អ្នកធ្វើដំណើរផ្សេងៗទៀត ត្រូវបានហាមឃាត់ក្នុងការយកឡើងយន្តហោះ។ លើសពីនេះទៅទៀតដោយយោងតាមអង្គការអាកាសចរអន្តរជាតិ (ICAO), វត្ថុដែលមានជាតិទឹក, ស្រ្ពៃយ៍ ឬជែល (Gel/ Aerosol) ដែលមានចំណុះលើសពី 100ml ក្នុងមួយបំពង់ឬមួយដប ក៏ត្រូវបានហាមឃាត់ក្នុងការយកតាមខ្លួនផងដែរ។

ទាក់ទងអីវ៉ាន់ដាក់ថ្លឹង របស់អ្នកធ្វើដំណើរនីមួយៗត្រូវបានបញ្ជាក់នៅលើសំបុត្រយន្តហោះ។ បើសិនជាមានករណីលើសពីទម្ងន់ដែលបានកំណត់ អ្នកធ្វើដំណើរម្នាក់ៗ អាចនឹងប្រឈមមុខ នឹងការបង់ប្រាក់សម្រាប់អីវ៉ាន់ដែលបានលើស។ ចំណែកឯតម្លៃ នៃឥវ៉ាន់ដែលលើស វាអាស្រ័យទៅតាមគោលដៅដែលត្រូវទៅ និងតាមតម្លៃរបស់ក្រុមហ៊ុននិមួយៗដែលបានកំណត់។

សម្រាប់ទម្ងន់នៃអីវ៉ាន់ដាក់ថ្លឹង និងឥវ៉ាន់យួរជាប់ខ្លួនគឺវាអាស្រ័យទៅលើគោលការណ៍ របស់ក្រុមហ៊ុនអាកាសចរផ្សេងៗគ្នា ដោយផ្អែកទៅលើប្រភេទសំបុត្រ និងគោលដៅដែលត្រូវធ្វើដំណើរទៅ។

@ បំពេញព័ត៌មានផ្ទាល់ខ្លួនសម្រាប់ធ្វើដំណើរ៖ អ្នកដំណើរទាំងអស់ត្រូវបំពេញព័ត៌មានផ្ទាល់ខ្លួនសម្រាប់ការធ្វើដំណើរដូចជា សលាកបត្រចេញដំណើរ សម្រាប់មន្ត្រីអន្តោប្រវេសន៍នៅច្រកចេញដំណើរ សលាកបត្រពេលទៅដល់សម្រាប់មន្ត្រីអន្តោប្រវេសន៍ សលាកបត្រគយ, និងសលាកបត្រសុខភាព (អាស្រ័យទៅតាមព្រលានយន្តហោះនិមួយៗ)។ សម្រាប់ជើងហោះហើរអន្តរជាតិ អ្នកត្រូវតម្រូវឲ្យបំពេញនិងបង្ហាញឯកសារមកដល់ ឬចាកចេញនៅបញ្ជរអន្តោប្រវេសន៍។

សម្រាប់ការចេញដំណើរពីព្រលានអន្តរជាតិនៃប្រទេសកម្ពុជា ទម្រង់បែបបទបញ្ជាក់អំពីការមកដល់ឬក៏ការចាកចេញមាននៅឯព្រលានយន្តហោះ មុនពេលចូលទៅដល់បញ្ជរអន្តោប្រវេសន៍។ សម្រាប់ការមកដល់ប្រទេសកម្ពុជា អ្នកនឹងត្រូវបានគេចែកជូននូវទម្រង់បែបបទនេះមុនពេលធ្វើការហោះហើរនៅឯបញ្ជរឆែក សំបុត្រ ឬនៅក្នុងអំឡុងពេលកំពុងហោះហើរ។

@ ត្រួតពិនិត្យសុវត្ថិភាព៖ អ្នកដំណើរនឹងឆ្លងកាត់បញ្ឈរត្រួតពិនិត្យ និងត្រូវស្នើយកសម្ភារៈជាប់ខ្លួនទាំងអស់មានដូចជាស្បែកជើង កាបូបលុយ ទូរសព្ទ នាឡិកា ខ្សែក្រវ៉ាត់ និងវត្ថុប្រើប្រាស់ដទៃទៀតដើម្បីត្រួតពិនិត្យក្រែងលោមានដាក់របស់ហាមឃាត់ដែលអាចបង្កគ្រោះថ្នាក់ក្នុងពេលជិះធ្វើដំណើរ។

@ ស្វែងរកច្រកចេញដំណើរ៖ បន្ទាប់មានការត្រួតពិនិត្យរួចរាល់ អ្នកអាចធ្វើដំណើរឆ្ពោះទៅកាន់ច្រកចេញដំណើរ (Gate) ដែលសរសេរនៅលើសំបុត្រយន្តហោះ និងរង់ចាំពេលគេប្រកាសសម្រាប់ការចេញដំណើរទៅគោលដៅដែលអ្នកបានកំណត់។

ដំណាក់កាលទី ៣៖ នៅលើយន្តហោះ

@ កន្លែងអង្គុយ៖ លេខកៅអីរបស់អ្នកត្រូវបានសរសេរនៅលើប័ណ្ណឡើងជិះយន្តហោះ។ សូមអង្គុយស្វែងរកតាមកន្លែងដែលបានកំណត់។

@ ឥវ៉ាន់៖ ឥវ៉ាន់យួរដៃរបស់អ្នកត្រូវតែរក្សាទុកនៅខាងក្រោមកៅអីនៅចំពីមុខអ្នកឬដាក់ទុកនៅក្នុងខ្លុបនៅពីលើក្បាលរបស់អ្នក។

ដំណាក់កាលទី ៤ ៖ មកដល់គោលដៅប្រទេសធ្វើដំណើរ

ពេលអ្នកធ្វើដំណើរមកដល់ព្រលានយន្តហោះប្រទេសគោលដៅ អ្នកដំណើរនឹងទទួលការពិនិត្យអន្តោប្រវេសន៍។ ក្រោយពិនិត្យរួចរាល់និងគ្មានបញ្ហា អ្នកអាចទៅស្វែងរកឥវ៉ាន់ដែលដាក់តាមយន្តហោះ (ករណីដែលអ្នកយកវ៉ាលិសមកជាមួយ)។ ចុងក្រោយ ជាពេលវេលាដ៏រីករាយសម្រាប់ដំណើរឆ្លងប្រទេសដែលអ្នកដំណើរបានកំណត់សម្រាប់ការធ្វើដំណើរទៅកាន់គោលដៅណាមួយដោយសុវត្ថិភាព។

អត្ថបទ៖ ប៊ុណ្ណារ៉ា