ក្ដារចុចឆ្លាតវៃបន្ថែមមុខងារថ្មីទស្សន៍ទាយពាក្យដាក់ប្រើជាផ្លូវការ

2015-10-07 14:30:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអភិវឌ្ឍក្តារចុចឆ្លាតវៃរបស់លោកគ្រុយ វណ្ណា បានដាក់ឲ្យប្រើប្រាស់ក្តារចុចឆ្លាតវៃជំនាន់ថ្មីដែលបានបន្ថែមមុខងារទស្សន៍ទាយពាក្យ ដែលធ្វើឲ្យការប្រើប្រាស់អក្សរខ្មែរកាន់តែងាយស្រួលថែមទៀត។

លោក គ្រុយ វណ្ណា ដែលបានអភិវឌ្ឍក្តារចុចឆ្លាតវៃបានឲ្យដឹងថា បន្ទាប់ពីធ្វើការអភិវឌ្ឍន៍អស់រយៈពេលជាងប្រាំខែ លោកបានដាក់ឲ្យប្រើប្រាស់ក្ដារចុចឆ្លាតវៃជំនាន់ថ្មី ដែលអាចទស្សន៍ទាយពាក្យធ្វើឲ្យការប្រើប្រាស់ភាសាខ្មែរលើឧបករណ៍នានាកាន់តែងាយស្រួល។

លោកបញ្ជាក់ថា ក្តារចុចជំនាន់ថ្មីនេះ នៅពេលអ្នកប្រើប្រាស់វាយពាក្យអ្វីមួយ វានឹងលោតចេញជាពាក្យដែលអ្នកប្រើប្រាស់ចង់វាយតែម្តង។

"ឧទាហរណ៍បើសិនយើងវាយអក្សរ “ក” វានឹងបង្ហាញនូវពាក្យមួយចំនួនដូចជា “ការ” “ក្នុង” ឬ “ក្រុម”។ ចំពោះការទស្សន៍ទាយពាក្យ នៅពេលដែលអ្នកប្រើប្រាស់វាយពាក្យអ្វីមួយ វានឹងបង្ហាញនូវពាក្យមួយចំនួនដែលអ្នកប្រើប្រាស់ចង់វាយបន្ទាប់។ ដូចជាពាក្យ “ផ្សារ” វានឹងបង្ហាញពីឈ្មោះផ្សារមួយចំនួន “ផ្សារអ៊ីអន” “ផ្សារធំថ្មី” ជាដើម"។

ប្រិយមិត្តប្រើប្រាស់មួយចំនួនបានដឹងរួចមកហើយការអភិវឌ្ឍន៍ក្តារចុចឆ្លាតវៃរបស់លោកគ្រុយ វណ្ណា ដែលជួយឲ្យការប្រើអក្សរខ្មែរនៅលើទូរសព្ទ កាន់តែមានភាពងាយស្រួលនិងរហ័សជាងមុន។ ឥឡូវក្រុមការងាររបស់លោកបានអភិវឌ្ឍការចុចជំនាន់ថ្មីដោយបន្ថែមមុខងារទស្សន៍ទាយពាក្យនិងដែលបានដាក់ឲ្យប្រើប្រាស់កាលពីថ្ងៃសៅរ៍ចុងសប្ដាហ៍មុននេះ។

លោកគ្រុយ វណ្ណាបានឲ្យដឹងបន្ថែមថា ក្តារចុចឆ្លាតវៃជំនាន់ថ្មីដែលមានភ្ជាប់មុខងារទស្សន៍ទាយពាក្យអាចប្រើនៅលើប្រព័ន្ធប្រតិបត្តិការ Android។ សម្រាប់នៅលើ iOS អាចដាក់ដំណើរការនៅចុងខែតុលានេះ។

ប្រិយមិត្តអាចទាញយកបានតាមរយៈតំណភ្ជាប់នេះ http://goo.gl/fdzO4x សម្រាប់ប្រព័ន្ធប្រតិបត្តិការ Android ដែលមាន Version ចាប់ពី Android 4.0 (Ice Cream Sandwich)។

អត្ថបទ៖ រក្សា