ប៉ូលិស២នាក់ឃើញយន្តហោះធ្លាក់ឆេះ ឆ្លៀត Selfie ត្រូវបញ្ឈប់ពីការងារ
- 2015-10-08 22:01:23
- ចំនួនមតិ 0 | ចំនួនចែករំលែក 0
ប៉ូលិស២នាក់ឃើញយន្តហោះធ្លាក់ឆេះ ឆ្លៀត Selfie ត្រូវបញ្ឈប់ពីការងារ
ចន្លោះមិនឃើញ
ជារឿងកម្រនឹងជួបប្រទះមួយ មន្ត្រីប៉ូលិស២រូប ដែលថត Selfie នៅកន្លែងគ្រោះថ្នាក់ធ្លាក់យន្តហោះគួរឲ្យរន្ធត់មួយនៅតំបន់មាត់សមុទ្រ Shoreham ប្រទេសអង់គ្លេស ត្រូវបានបញ្ឈប់ពីការងារយ៉ាងអាម៉ាស់បំផុត។
ប៉ូលិសទាំងពីរនាក់មានអាយុ ២៣ឆ្នាំ និង២៤ឆ្នាំ ត្រូវបានគេស៊ើបអង្កេតរកឃើញថាមានកំហុស បន្ទាប់ពីពួកគេបានផ្ញើវីដេអូថត Selfie ទៅកាន់មិត្តរួមការងារផ្សេងទៀតនៅក្រុង Sussex។ ក្រោយស្ដាប់ទោសកំហុសខាងវិន័យ អ្នកទាំងពីរត្រូវគេសម្រេចបណ្ដេញចេញ តែពួកគេជ្រើសរើសយកការលាលែងពីមុខតួនាទីមុន។
មេប៉ូលិស Giles York ប្រចាំក្រុង Sussex ភាគអាគ្នេយ៍ប្រទេសអង់គ្លេស បានមានប្រសាសន៍ថា ប៉ូលិសដែលបានបម្រើការជាង២ឆ្នាំទាំង២រូបនេះ បានសម្ដែងអារម្មណ៍សោកស្ដាយ និងទទួលស្គាល់កំហុស ដែលពួកគេបានប្រព្រឹត្តិ។ ប៉ុន្តែវាជាបញ្ហាសម្រាប់មន្ត្រីទាំងពីរ ដែលបង្ហាញកាយវិការមិនយោគយល់ និងមិនមានក្ដីមេត្តា ចំពោះជនរងគ្រោះ និងគ្រួសារជនរងគ្រោះ។
បញ្ជាក់ផងដែរថា យន្តហោះនេះដែលធ្លាក់មានឈ្មោះ Hawker Hunter បានជួបគ្រោះថ្នាក់តាំងពីថ្ងៃទី២២ ខែសីហាមកម្ល៉េះ ដោយបានសម្លាប់មនុស្ស ១១នាក់ ក្នុងពេលសម្ដែងការហោះហើរនៅមាត់សមុទ្រ Shoreham។ យ៉ាងណាក្ដី រឿងរ៉ាវថត selfie នៃមន្រ្ដីប៉ូលិសទាំង២រូបខាងលើ ទើបត្រូវបានដោះស្រាយប៉ុណ្ណោះ៕
ចុចអាន៖ មើលទិដ្ឋភាពដ៏កម្រនៃព្រលានយន្តហោះថ្មីរបស់កូរ៉េខាងជើង
ប្រែសម្រួល៖ឡេង ភារុណ ប្រភព៖ the sun