ទិដ្ឋភាពទីលានហែលទឹកស្តង់ដារអន្តរជាតិតម្លៃជិត ២លានដុល្លារនៅកំពង់ចាម

2015-10-08 22:28:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីលានហែលទឹកលក្ខណៈស្តង់ដារអន្តរជាតិ ដែលចំណាយប្រាក់សាងសង់អស់ប្រមាណ ១លាន ៨សែនដុល្លារមានឈ្មោះថា «មណ្ឌលកីឡាហែលទឹកតេជោសែន» ក្នុងខេត្តកំពង់ចាម បានសម្រេចការសាងសង់រួចរាល់១០០ភាគរយហើយ ដោយរង់ចាំតែការបើកសម្ពោធជាផ្លូវការនៅដើមខែធ្នូប៉ុណ្ណោះ។

លោក ហែម គីរី អគ្គលេខាធិការសហព័ន្ធកីឡាហែលទឹកកម្ពុជាបានប្រាប់ Sabay ថា៖ «បាទ! បើនិយាយទៅ សំណង់ទីលានហែលទឹកនៅកំពង់ចាមនេះរួចរាល់ ១០០%ហើយ... នៅសល់តែការកែកុនកន្លែងណាមិនសម ឬបំពេញចន្លោះខ្វះខាតតិចតួចប៉ុណ្ណោះ»។ លោកបានបញ្ជាក់បន្ថែមថា ការសម្ពោធដាក់ឲ្យប្រើប្រាស់ជាផ្លូវការនូវទីលានហែលទឹកដ៏ធំនេះ នឹងធ្វើឡើងនៅថ្ងៃទី២ ខែធ្នូខាងមុខ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន។

សហព័ន្ធកីឡាហែលទឹកក៏បានរៀបចំការប្រកួតជ្រើសរើសជើងឯកកីឡាហែលទឹកពានរង្វាន់សម្ដេចតេជោ ហ៊ុន សែន លើកទី១ រយៈពេល ៣ថ្ងៃ ដោយរាប់ចាប់ពីថ្ងៃទី៣០ ខែវិច្ឆិកា រហូតដល់ថ្ងៃទី២ ខែធ្នូ ដែលជាថ្ងៃបើកសម្ពោធទីលានហែលទឹកតែម្ដង។

កីឡាករ-កីឡាការិនីមកពីគ្រប់ក្លិបទូទាំងប្រទេសនឹងត្រូវប្រកាសឲ្យចូលរួមប្រកួតក្នុងព្រឹត្តិការណ៍ដ៏ធំនេះ។ ចំណែកកីឡាករ ហែមថុន ពន្លឺ និង កីឡាការិនី ហែមថុន វិទិនី ដែលទៅហ្វឹកហាត់នៅថៃមួយឆ្នាំកាលពីដើមខែកញ្ញា នឹងត្រូវកោះហៅឲ្យចូលរួម។ លោក ហែម គីរី បានបញ្ជាក់ថា ការប្រកួតនេះ នឹងត្រូវរៀបចំរៀងរាល់ឆ្នាំនៅមណ្ឌលកីឡាហែលទឹកតេជោសែនខេត្តកំពង់ចាម៕

ទស្សនាទិដ្ឋភាពទីលានហែលទឹកដែលទើបសាងសង់រួច៖