ការ​ជជែក​គ្នា​ថ្មី​មួយ​កំពុង​តែ​ពុះ​កញ្ជ្រោល​លើ​បណ្ដាញ​អ៊ីនធឺណិត​ទាក់​ទង​នឹង​ថាមពល​ថ្ម​​របស់​ iPhone 6s និង​ 6s Plus ​ទាំង​ឡាយ​ដែល​​អាច​ប្រើ​ក្នុង​​សុពល​ភាព​ខុស​គ្នា​ដោយ​សារ​តែ​មាន​បំពាក់​ Processor ខុស​គ្នា។

បន្ទះ​ Chip A9 ដែល​ក្រុមហ៊ុន​បាន​​បំពាក់​លើ​ទូរសព្ទ​ជំនាន់​ថ្មី​របស់​ខ្លួន​​​ផលិត​ចេញ​ពី​ក្រុមហ៊ុន​ពីរ​ខុសគ្នា​គឺ​ ក្រុមហ៊ុន​ TSMC និង​ ក្រុមហ៊ុន​ Samsung ដោយ​បន្ទះ​ Chip របស់​ក្រុមហ៊ុន​ទាំង​ពីរ​គឺ​មាន​ទំហំ​ខុស​គ្នា។ បន្ទះ​ Chip ដែល​ផលិត​ដោយ​ក្រុមហ៊ុន​ TSMC មាន​ទំហំ​១៦​ណាណូម៉ែត្រ​ និង​បន្ទះ​ Chip ផលិត​ដោយ​ Samsung មាន​ទំហំ​១៤​ណាណូម៉ែត្រ។

អ្នក​ប្រើ​ប្រាស់​មួយ​រូប​ដែល​មាន​ទូរសព្ទ​​ iPhone 6s Plus បំពាក់​បន្ទះ​ Chip A9 ផលិត​ដោយ​ក្រុមហ៊ុន​ពីរ​ផ្សេង​គ្នា​បាន​​​ធ្វើ​តេស្ត​លើ​សមត្ថភាព​ថ្ម​របស់​ទូរសព្ទ​ទាំង​ពីរ​។ ​ជា​លទ្ធផល​ឃើញ​ថា​ Chip របស់​ក្រុមហ៊ុន​ TSMC អាច​ប្រើ​ប្រាស់​បាន​យូរ​ជាង​ Chip របស់​ Samsung ប្រមាណ​ជា​ពីរ​ម៉ោង​ឯ​ណោះ។ អ្នក​ប្រើ​ប្រាស់​មួយ​រូប​នេះ​បាន​បញ្ជាក់​ផង​ដែរ​ថា ​គាត់​បាន​ធ្វើ​តេស្ត​ជា​ច្រើន​ដង​ដោយ​លទ្ធផល​គឺ​ដូច​គ្នា ហើយ​ទូរសព្ទ​ទាំង​ពីរ​តេស្ត​ដោយ​​មាន​ការ​កំណត់​ Setting ដូច​គ្នា។

យោង​តាម​ការ​ប៉ាន់​ស្មាន​មួយ​​បាន​បង្ហាញ​ផង​ដែរ​ថា​ មាន​ទូរសព្ទ​ iPhone 6s Plus ៧០​ភាគ​រយ​ដែល​បំពាក់​ Chip របស់​ក្រុមហ៊ុន​ TSMC ដោយ​ឡែក​ iPhone 6s មាន​តែ​៤០​ភាគ​រយ​ប៉ុណ្ណោះ​ដែល​បំពាក់​បន្ទះ​ Chip នេះ។

ប្រសិន​បើ​អ្នក​ទិញ​ទូរសព្ទ​ iPhone 6s ឬ 6s Plus តាម​អនឡាញ​​នោះ​អ្នក​មិន​អាច​ដឹង​បាន​ទេ​ថា ​ទូរសព្ទ​នោះ​មាន​បំពាក់​ Chip របស់​ក្រុមហ៊ុន​ណា។ ប៉ុន្តែ​ប្រសិន​បើ​អ្នក​ចង់​ដឹង​ពី​​ប្រភេទ​នៃ​ Chip ទូរសព្ទ ​​អ្នក​គឺ​គ្រាន់​តែ​ដំឡើង​កម្ម​វិធី​ Lirum Device Info Life ដែល​មាន​លើ​ App Store។ បើក​កម្មវិធី​នោះ​ឡើង​រួច​ស្វែង​រក​ពាក្យ​ Model ប្រសិន​បើ​បង្ហាញ​ឃ្លា​ N66MAP ឬ N71MAP នោះ​ទូរសព្ទ​អ្នក​ប្រើ​បន្ទះ​ Chip របស់​ TSMC តែ​បើ​បង្ហាញ​ឃ្លា​ N66AP ឬ N71AP នោះ​មាន​ន័យ​ថា​ ជា​បន្ទះ​ Chip របស់​ Samsung៕

ចុច​​ទី​នេះ​ដើម្បី​ទាញ​យក​កម្មវិធី​ Lirum Device Info Life

  ចុច​អាន៖ iPhone 6s ឆ្លាក់​រូប ​វ្ល៉ាឌីមៀរពូទីន ​ចេញ​លក់ហើយ​ តែ​តម្លៃ​ជាង​ ៣ ពាន់​ដុល្លារ​

ប្រែ​សម្រួល៖ ហៃ​ សុខ​ហេង ប្រភព៖ CultofMac​​​​​​​​​​​​​