គ្រូ Lee បានប្រាប់បញ្ហាប្រឈមពីរដែលជម្រើសជាតិកម្ពុជាកំពុងជួបប្រទះ
- 2015-10-10 15:00:26
- ចំនួនមតិ 0 | ចំនួនចែករំលែក 0
គ្រូ Lee បានប្រាប់បញ្ហាប្រឈមពីរដែលជម្រើសជាតិកម្ពុជាកំពុងជួបប្រទះ
ចន្លោះមិនឃើញ
លោក Lee Tae Hoon គ្រូបង្គោលរបស់ក្រុមជម្រើសជាតិកម្ពុជាបាននិយាយពីបញ្ហាប្រឈមពីរនៅពេលបច្ចុប្បន្ននេះដែលសមាជិកក្រុមទាំងមូលកំពុងតែជួបប្រទះ។ ដោយបញ្ហាពីរនោះគឺកត្តាសុខភាពរបស់កីឡាករ និងបញ្ហាដែលមិនមានពេលគ្រប់គ្រាន់សម្រាប់ហ្វឹកហាត់។
ក្រុមជម្រើសជាតិកម្ពុជាបានប្រមូលផ្ដុំហ្វឹកហាត់នៅថ្ងៃទី២ខែតុលាសប្ដាហ៍មុននេះ ប៉ុន្តែពេលនោះសមាជិកទាំងអស់មិនបានទៅចូលរួមឱ្យបានគ្រប់គ្នានោះទេ ដោយសារតែមានកីឡាករខ្លះត្រូវប្រកួតនៅក្លិបអាជីពសិន ហើយខ្លះទៀតត្រូវពន្យារពេលដោយសារតែមានបញ្ហាតិចតួច។ ហ្វឹកហាត់ជុំគ្នាបានតែមួយថ្ងៃ ក្រុមរបស់លោក Lee ក៏ត្រូវទៅប្រកួតកម្ដៅសាច់ដុំជាមួយភ្នំពេញក្រោនកាលពីល្ងាចម្សិលមិញ ដោយទទួលជ័យជម្នះ ៣-២ ។
ទោះជាទទួលបានលទ្ធផលល្អយ៉ាងនេះមែន ប៉ុន្តែគ្រូបង្វឹកសញ្ជាតិកូរ៉េខាងត្បូងរូបនេះបាននិយាយថាលោកនៅតែមានការបារម្ភដដែល ចំពោះការប្រកួតជាមួយក្រុមសិង្ហបុរីនៅថ្ងៃទី១៣ខាងមុខនេះ។ រឿងទីមួយដែលលោកបារម្ភជាងគេគឺបញ្ហាសុខភាពរបស់កីឡាករមិនល្អទេ ព្រោះថាពួកគេអាចនឹងមិនមានពេលសម្រាកគ្រប់គ្រាន់។ ចំណែកឯរឿងទីពីរវិញ គឺការហ្វឹកហាត់ឱ្យលេងស៊ីចង្វាក់គ្នា។ សមាជិកក្រុមជម្រើសជាតិទាំងអស់មិនមានពេលច្រើនទេក្នុងការហាត់ ដោយសារតែត្រូវចេញទៅប្រទេសសិង្ហបុរីស្អែកនេះ ខណៈដែលទៅដល់បានមួយរយៈខ្លីក៏ត្រូវចូលប្រកួតទៅហើយ។
យ៉ាងណាមិញ លោក Lee នៅតែមានជំនឿជាក់ថាកម្ពុជានឹងអាចធ្វើបានល្អជាងប្រកួតកាលពីលើកមុននៅកីឡដ្ឋានជាតិអូឡាំពិក (កម្ពុជាចាញ់សិង្ហបុរី ៤-០) ដោយលោកនឹងព្យាយាមរកវិធីឱ្យកីឡាកររក្សាកម្លាំងឱ្យបានល្អ និងលេងឱ្យស្មារតីជាក្រុម៕
អត្ថបទ៖ មុន្នី រម្យ