Asus បង្អួតកុំព្យូទ័រថ្មី មានសមត្ថភាពអស្ចារ្យ ដែលគេមិនធ្លាប់ប្រទះពីមុនមក

2015-10-19 18:01:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Asus បានបង្ហាញពីរូបរាងកុំព្យូទ័រម៉ូដែលថ្មីរបស់ខ្លួន ដែលជាការបង្កើតឡើងដ៏អស្ចារ្យមួយក្នុងចំណោមកុំព្យូទ័រដែលគេបានបង្ហាញកន្លងមក។

យោងតាមព័ត៌មានទទួលបានកាលពីពេលថ្មីៗបានឲ្យដឹងថា កុំព្យូទ័រ ASUS ROG GX700 នេះមានបំពាក់នូវបណ្ដុំ Hardware ដែលសុទ្ធសឹងតែមានសមត្ថភាពកំពូលៗ។ វាមានបំពាក់នូវ CPU និង GPU ជំនាន់ចុងក្រោយបង្អស់គឺ CPU Skylake និង GPU Maxwell ឯក្រាហ្វិកវិញគឺប្រភេទ GeForce GTX 980។ ចំពោះ CPU Skylake ដែលគេបានបំពាក់គឺ Core i7-6700K មានល្បឿនដល់ទៅ 4.0Ghz ឯណោះ ហើយវាថែមទាំងមានបំពាក់ RAM ប្រភេទ DDR4 ទំហំមិនតិចជាង 64GB នោះឡើយ។ មិនតែប៉ុណ្ណោះក៏មានបំពាក់នូវ Storage ប្រភេទ SSD ដែលមានល្បឿនលឿន និងមានរន្ធសម្រាប់ភ្ជាប់ជាច្រើនផងដែរ។

ក្រៅពី Hardware ដែលមានសមត្ថភាពពិសេសៗដូចនេះហើយ ASUS ROG GX700 ក៏មានការរចនារូបរាងយ៉ាងស្រស់ស្អាតនិងមាន នូវប្រព័ន្ធបញ្ចុះកម្ដៅយ៉ាងពិសេសថែមទៀតផង។ ប្រព័ន្ធបញ្ចុះកម្ដៅដោយទឹក គឺអាចធ្វើការភ្ជាប់ទៅនឹងផ្នែកខាងក្រោយនៃកុំព្យូទ័រដោយមិនត្រូវការប្រើប្រាស់ខ្សែឡើយ។ នេះគឺជាលើកទីមួយហើយដែលក្រុមហ៊ុន ASUS បានប្រើប្រាស់ប្រព័ន្ធបញ្ចុះកម្ដៅដោយទឹកបែបនេះ។ ក្រៅពីអាចបញ្ចុះកម្ដៅរបស់ CPU ហើយវាក៏អាចជួយឲ្យ ដំណើរការក្រាហ្វិកមានល្បឿនលឿនជាងមុន៤៣ភាគរយ, CPU មានល្បឿនលឿនជាងមុន៤៨ភាគរយ និង Memory មានល្បឿនលឿនជាងមុន៣១ភាគរយ។ នេះបើយោងតាមការលើកឡើងរបស់វិស្វករក្រុមហ៊ុន ASUS។

គួរបញ្ជាក់ថា កុំព្យូទ័រនេះមានអេក្រង់ចំនួនពីរជម្រើសគឺប្រភេទ HD 1080p និង ប្រភេទ 4K ដែលមានទំហំ១៧,៣អ៊ីញ។ ចំពោះតម្លៃវិញក្រុមហ៊ុនមិនបានបញ្ជាក់នៅឡើយនោះទេ ប៉ុន្តែរំពឹងថានឹងមានតម្លៃចន្លោះពី២០០០ដុល្លារទៅ៣០០០ដុល្លារ អាស្រ័យលើប្រភេទ Hardware ហើយអាចនឹងដាក់លក់ក្នុងពេលឆាប់ៗ៕

ចុចអាន៖ Microsoft ហ៊ានទិញ MacBook ចាស់ៗ ៣០០ ដុល្លារបើម្ចាស់វាទិញកុំព្យូទ័រ Windows 10

ប្រែសម្រួល៖ ហៃ សុខហេង ប្រភព៖ WCCFTech