ព្រលានយន្តហោះល្អជាងគេឆ្នាំ២០១៥ មាននៅប្រទេសណាខ្លះ?

2015-10-21 15:28:11
ចំនួនមតិ 0 | ចំនួនចែករំលែក 0

ចន្លោះមិនឃើញ

បញ្ជីឈ្មោះព្រលានយន្តហោះល្អជាងគេទាំង១០សម្រាប់ឆ្នាំ២០១៥ ដែលបានបោះឆ្នោតដោយអ្នកដំណើរជុំវិញពិភពលោកក្នុងរយៈពេលស្ទង់មតិ៩ខែបានចុះផ្សាយក្នុងវិបសាយ Skytrax។ ចំណាត់ថ្នាក់នេះបានធ្វើឡើងដោយផ្នែកលើភាពពេញចិត្តពីសំណាក់អតិថិជនជាអ្នកធ្វើដំណើរ សេវាកម្ម និងទំនើបកម្មនៅទីនោះ។ ព្រលានយន្តហោះទាំង១០ នោះ មានដូចខាងក្រោម៖

១. ព្រលានយន្តហោះ Changi ប្រទេសសិង្ហបុរី

ព្រលានយន្តហោះ Changi នាំអ្នកធ្វើដំណើរទៅដល់គោលដៅជាង២០០កន្លែងលើពិភពលោក។ ការចេញដំណើរ និងការមកដល់គោលដៅចំនួន៥០០០លើកក្នុងមួយសប្ដាហ៍ធ្វើឡើងតាមរយៈជើងហោះហើរអន្តរជាតិចំនួន៨០ផ្សេងៗគ្នា។ ក្នុងព្រលានយន្តហោះឈ្នះពានល្អជាងគេ៣ឆ្នាំជាប់គ្នានេះ ក៏មាននូវកន្លែងកម្សាន្តទំនើបៗ រោងកុន ហាងទំនិញ និងហាងអាហារជាច្រើន រូមទាំងការបម្រើសេវាកម្មយ៉ាងល្អ។

២. ព្រលានយន្តហោះអន្តរជាតិ Incheon ប្រទេសកូរ៉េ

ជាព្រលានយន្តហោះធំជាងគេក្នុងប្រទេសកូរ៉េខាងត្បូង និងស្ថិតក្នុងចំណោមព្រលានយន្តហោះមមាញឹកជាងគេមួយក្នុងពិភពលោក។ ក្នុងព្រលានយន្តហោះមានហាងអាហារ និងហាងទំនិញជាលក្ខណៈទំនើបច្រើន ក្រៅពីនេះក៏មានការសម្ដែងសិល្បៈជាក្រុម និងមានសារមន្ទីរវប្បធម៌កូរ៉េនៅទីនោះផងដែរ។ កាលពីឆ្នាំ២០១៣ ព្រលានយន្តហោះនេះមានអ្នកធ្វើដំណើរចំនួន ៤១,៧លាននាក់។

៣. ព្រលានយន្តហោះ Munich ប្រទេសអាល្លឺម៉ង់

ព្រលានយន្តហោះ Munich ជាព្រលានយន្តហោះមមាញឹកមួយក្នុងទ្វីបអឺរ៉ុប និងមមាញឹកជាងគេលំដាប់ទីពីរក្នុងប្រទេសអាល្លឺម៉ង់ដោយភ្ជាប់បណ្ដាញគោលដៅហោះហើរជុំវិញពិភពលោក។ នៅក្នុងព្រលានធំស្កឹមស្កៃនេះមានហាងទំនិញជាង១៥០ ហាងអាហារចំនួន៥០កន្លែងដូចទីក្រុងដែលធ្វើឲ្យអ្នកដំណើរទេសចរកម្សាន្តទស្សនាមិនធុញទ្រាន់។ នៅទីនោះក៏សួនកម្សាន្ត កន្លែងវាយកូនហ្គោល និងសារមន្ទីរយន្តហោះសម្រាប់អ្នកដំណើរទស្សនាផងដែរ។

៤. ព្រលានយន្តហោះអន្តរជាតិ ហុងកុង ប្រទេសចិន

ព្រលានយន្តហោះអន្តរជាតិហុងកុង បម្រើសេវាកម្មជើងហោះហើរជាង១០០ទៅកាន់ទីតាំង ប្រហែល១៨០គោលដៅនៅក្នុងពិភពលោក។ ព្រលានយន្តហោះនេះធ្លាប់ជាប់ជាព្រលានយន្តហោះប្រចាំឆ្នាំល្អច្រើនដងក្នុងពានរង្វាន់ព្រលានយន្តហោះពិភពលោក។

៥. ព្រលានយន្តហោះអន្តរជាតិតូក្យូ Haneda ប្រទេសជប៉ុន

ព្រលានយន្តហោះល្អជាងគេលំដាប់ទី៥ សម្រាប់ឆ្នាំ២០១៥នេះ គឺជាកន្លែងប្រមូលផ្ដុំនៃអ្នកធ្វើដំណើរជាអ្នកជំនួញ និងអ្នកទេសចរជាច្រើននាក់។ បន្ថែមពីនេះ ព្រលានយន្តហោះ Haneda ក៏មានភាពល្បីល្បាញខាងសេវាកម្មទាន់ចិត្ត បរិស្ថានស្អាត និងកន្លែងដើរទិញឥវ៉ាន់ល្អៗច្រើនផងដែរ។

៦. ព្រលានយន្តហោះ Zurich ប្រទេសស្វីស

ជាព្រលានយន្តហោះអន្តរជាតិធំជាងគេក្នុងប្រទេសស្វីស ប្រមូលផ្ដុំនូវជើងហោះហើរច្រើន។ សម្រាប់អ្នកធ្វើដំណើរអាចជួលកង់ជិះកម្សាន្ត ទៅកន្លែងជិះស្គី និងសារមន្ទីរប្រទេសស្វីសនៅទីនោះបាន។

៧. ព្រលានយន្តហោះអន្តរជាតិ Central ប្រទេសជប៉ុន

ស្ថិតនៅលើកោះសិប្បនិម្មិតក្បែរទីក្រុងណាហ្គោយ៉ា ព្រលានយន្តហោះនេះមានអ្នកធ្វើដំណើរជាច្រើន។ នៅឆ្នាំ២០១៤ ព្រលានយន្តហោះអន្តរជាតិជប៉ុន Central មានអ្នកធ្វើដំណើរចំនួន៩,៨លាននាក់។ នៅទីនោះក៏មានជាន់កម្ពស់ខ្ពស់អាចឲ្យអ្នកដំណើរទស្សនាកប៉ាល់ និងទេសភាពនៃកំពង់ផែណាហ្គោយ៉ាបានផងដែរ។

៨. ព្រលានយន្តហោះ London Heathrow ប្រទេសអង់គ្លេស

ជាព្រលានយន្តហោះមមាញឹកជាងគេក្នុងប្រទេសអង់គ្លេស និងស្ថិតក្នុងចំណោមព្រលានយន្តហោះមមាញឹកជាងគេមួយនៅអឺរ៉ុបដោយមានអ្នកធ្វើដំណើរច្រើន។ ក្នុងឆ្នាំ២០១៣ ព្រលានយន្តហោះនេះមានអ្នកធ្វើដំណើរចំនួន ៧២,៤ លាននាក់។

៩. ព្រលានយន្តហោះ Amsterdam Schiphol ប្រទេសហូឡង់ដ៍

ជាព្រលានយន្តហោះមមាញឹកមួយក្នុងតំបន់អ៊ឺរ៉ុប ក្នុងឆ្នាំ Amsterdam Schiphol មានអ្នកធ្វើដំណើរចំនួន៥៥លាននាក់ក្នុងឆ្នាំ២០១៥។ នៅទីនោះក៏មានកន្លែងកម្សាន្តជាច្រើនរួមទាំងបណ្ណាល័យសម្រាប់អានសៀវភៅទៀតផង។

១០. ព្រលានយន្តហោះអន្តរជាតិរដ្ឋធានីប៉េកាំង ប្រទេសចិន

ជាព្រលានយន្តហោះមមាញឹកលំដាប់ទីពីរក្នុងពិភពលោក ព្រលានយន្តហោះអន្តរជាតិរដ្ឋធានីប៉េកាំងដើរតួនាទីសំខាន់ក្នុងមុខចំណូលរបស់ចិន។ ក្នុងឆ្នាំ២០១៣ព្រលានយន្តហោះនេះមានអ្នកដំណើរចំនួន៨៣, ៧លាននាក់៕