ផលិតកររឿង "វិញ្ញាណលោកម្ចាស់គ្រញូង" គ្រោងផលិតរឿងខ្មាតធំនាំចូលទីផ្សារអន្តរជាតិដើមឆ្នាំ២០១៥!

2014-10-18 15:48:03
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រី ពាន់ ភួងបុប្ផា ម្ចាស់ផលិតរឿង "វិញ្ញាណលោកម្ចាស់គ្រញូង" គ្រោងផលិតខ្សែភាពយន្តនាំចូលទីផ្សារអន្តជាតិនៅដើមឆ្នាំ២០១៥ខាងមុន។

ការផលិតនេះខណៈខ្សែភាពយន្តស្នាដៃចុងក្រោយរបស់អ្នកស្រីរឿង "វិញ្ញាណលោកម្ចាស់ក្រញូង" ត្រៀមនឹងដាក់បញ្ចាំងនៅរោងភាពយន្តលំដាប់អន្តរជាតិ Major Cineplex By Cellcard ថ្ងៃទី ២៣ ខែតុលានេះ។

ផលិតករល្បីឈ្មោះអ្នកស្រី ពាន់ ភួងបុប្ផា និយាយថា៖"យើងត្រៀមរួចរាល់អស់ហើយ ដោយសហការជាមួយផលិតកម្ម LD។ គាត់ផ្នែកបច្ចេកទេស ឯខាងខ្ញុំផ្នែកសាច់រឿង"។

ខ្សែភាពយន្តផលិតត្រៀមនាំចូលទីផ្សារអន្តរជាតិផលិតកររូបនេះមិនទាន់បង្ហើបពីចំណងជើងនៅឡើយទេ។ ក៏ប៉ុន្តែអ្នកស្រីបានប្រាប់ពីសាច់រឿងខ្លះៗ គឺទាក់ទងទៅនឹងការស៊ើបអង្កេត។ រឿងបែបស៊ើបអង្កេតរបស់អ្នកស្រីមានភាពប្លែងពីត្រង់ខ្មោចជាអ្នកដាក់ពាក្យបណ្ដឹង មិនមែនជាមនុស្សដូចខ្សែភាពយន្តដទៃឡើយ។

ដើមទុនក្នុងការផលិតខ្សែភាពយន្តខាងលើត្រូវម្ចាស់ពានអាណាចក្រតារាពីរម្នាក់ឯងក្នុងឆ្នាំ២០១៣កន្លងទៅប្រាប់ថា អាចនឹងក្បែរ ឬលើស២០ម៉ឺនដុល្លារ។

អ្នកស្រីបន្តថា មូលហេតុនាំឱ្យអ្នកស្រីផលិតខ្សែភាពយន្តនាំចូលទីផ្សារអន្តរជាតិ ក៏ព្រោះតែខ្សែភាពយន្តខ្មែរទទួលការចាប់អារម្មណ៍ច្រើនពីអ្នកទស្សនាទាំងក្នុង និងក្រៅប្រទេស។ ម្យ៉ាងទៀតការផលិតនេះក៏ដើម្បីបញ្ជាក់ពីសមត្ថភាពផលិតករខ្មែរ អាចផលិតខ្សែភាពយន្តល្អៗមិនចាញ់បរទេសនោះទេ។

យ៉ាងណាក៏ដោយគម្រោងនេះមិនទាន់ច្បាស់លាស់នៅឡើយទេ ដោយអ្នកស្រីរង់ចាំមើលខ្សែភាពយន្តខ្មែរមួយគឺរឿង "ស្បែកគង់" របស់ផលិតកម្ម Angkor Picture កំពុងតែបញ្ចាំងនៅទីផ្សារប្រទេសថៃ អាចជោគជ័យឬយ៉ាងណា។

“យើងរង់ចាំមើលទីផ្សាររឿង ស្បែកគង់ នៅថៃសិន បើយើងជោគជ័យនឹងផលិតរឿងនេះ តែបើមិនសូវជាជោគជ័យទេ យើងផលិតត្រឹមតែទីផ្សារក្នុងស្រុកដោយចាយទុនត្រឹម ៦ទៅ៧ម៉ឺនដុល្លារប៉ុណ្ណោះ"។ អ្នកស្រី ពាន់ ភួងបុប្ផាបន្ថែម។

ជាលើកទីមួយហើយសម្រាប់អ្នកស្រី ពាន់ ភួងបុប្ផា មានគំនិតផលិតខ្សែភាពយន្តនាំចូលទីផ្សារអន្តរជាតិ។ អ្នកស្រីធ្លាប់ទទួលបានការគាំទ្រជាខ្លាំងពីទស្សនិកជនអំឡុងផលិតខ្សែភាពយន្តឱ្យស្ថានីយទូរទស្សន៍ CTN។ កេរ្តិ៍ឈ្មោះល្បីល្បាញឈ្នះពានជាបន្តបន្ទាប់ពីកម្មវិធីអាណាចក្រតារាឆ្នាំទី១ និងឆ្នាំទី២កន្លងទៅ៕

អានអត្ថបទបន្ត៖“វិញ្ញាណលោកម្ចាស់គ្រញូង” មើលតែឈុតក្រៅឆាក ក៏ទំនងបាត់ហើយ!

អានអត្ថបទបន្ត៖មើល Trailer “វិញ្ញាណលោកម្ចាស់ក្រញូង” ត្រៀមនឹងបញ្ចាំងនៅ Major Cineplex By Cellcard!

អានអត្ថបទបន្ត៖នេះ…! គឺភាពយន្តខ្មែរដំបូងគេ ដែលនិយាយអំពីទឹកភ្នែកឈើព្រៃ

អត្ថបទ៖ អ៊ីង សុឡា