គ្រាន់តែអាហារខ្ជះខ្ជាយនៅចិនមួយឆ្នាំ អាចចិញ្ចឹមមនុស្ស២០០លាននាក់

2014-10-18 16:01:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ចិនមានប្រជាជនជិត ១,៤ពាន់លាននាក់ ច្រើនជាងគេនៅលើពិភពលោក ដូច្នេះប្រទេសនេះក៏សំបូរទៅដោយបញ្ហាច្រើនរាប់មិនអស់ដែរ។ បើតាមរដ្ឋបាលចំណីអាហារចិន បានបង្ហាញកាលពីពេលថ្មីៗថា នៅទូទាំងប្រទេសចិនខ្ជះខ្ជាយលើចំណីអាហារគិតជាប្រាក់ ៣២ពាន់លានដុល្លារ។

ទឹកប្រាក់ដ៏ច្រើននេះ អាចគ្រប់គ្រាន់ចិញ្ចឹមមនុស្សជាង ២០០លាននាក់ក្នុងមួយឆ្នាំ។ ខណៈមនុស្សមួយចំនួនបានខ្ជះខ្ជាយទៅលើអាហារប្រចាំថ្ងៃ ប្រជាជនចិនប្រមាណ ៨២លាននាក់ទៀតកំពុងរស់នៅក្រោមបន្ទាត់នៃភាពក្រីក្រ និងខ្វះអាហារចិញ្ចឹមជីវិត។ ជារៀងរាល់ឆ្នាំ ចំណីអាហារ ៧០លានតោនត្រូវបានខ្ជះខ្ជាយតាមរយៈការដឹកជញ្ជូន ដំណើរការវេចខ្ចប់ និងសកម្មភាពផ្សេងៗទៀត ដែលធ្វើឲ្យបាត់បង់ដល់ទៅ ៦ភាគរយនៃផលិតផលដើម។

លោក Wu Zidan ដែលជាអ្នកជំនាញវិភាគ និងជាអនុប្រធានរដ្ឋបាលចំណីអាហារចិន បានបញ្ចេញរបាយការណ៍ទាំងនេះនៅចំពេលយុទ្ធនាការដ៏តឹងរ៉ឹងដែលដាក់ ចេញដោយប្រធានាធិបតី Xi Jinping កាលពីដើមឆ្នាំនេះ។ យុទ្ធនាការដ៏តឹងរ៉ឹងនោះគឺ បញ្ជាឲ្យគ្រប់សណ្ឋាគារ និងភោជនីយដ្ឋានទាំងអស់លប់បំបាត់ភាពខ្ជះខ្ជាយអាហារ។

អ្នកជំនាញខ្លះបានរិះគន់ទៅលើភាពខ្ជះខ្ជាយនៃទម្លាប់ចាស់របស់ប្រជាជនចិន ដែលបន្សល់ទុកអាហារខ្លះនៅក្នុងចានដើម្បីគោរពម្ចាស់ផ្ទះ ជាជាងបរិភោគអស់ពីចានដែលមានន័យថាម្ហូបអាហារអស់ និងគ្មានអ្វីទទួលទានទៀត៕

ចេកអាំង និងអាពីងបំពងស្រុកខ្មែរ ជាប់ជាអាហារចិញ្ចើមផ្លូវមានរសជាតិឆ្ងាញ់៖ ចុចអាន

ប្រែសម្រួល៖ គង់ វិសាល

ប្រភព៖ business-standard