តារាៗណាខ្លះ ដែលល្បីតាំងពីឪពុកម្ដាយដល់កូន?

2015-10-27 18:34:36
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងពិភពហូលីវូដ ឬបរទេសភាគច្រើន តារាៗដែលឪពុកម្ដាយជាតារាល្បីឈ្មោះស្រាប់ ច្រើនល្បីឈ្មោះតាមដែ ឬអាចនិយាយថាល្បីជាងអ្នកមានគុណផងក៏ថាបាន ក្រោយហក់ចូលប្រឡូកក្នុងវិស័យនេះ។ ចំណែកឯស្រុកយើងវិញ ក៏មានសិល្បករ សិល្បការិនីខ្លះ មានលំនាំដូចគ្នានេះដែរ គឺល្បីតាំងពីជំនាន់មុន មកដល់ជំនាន់ក្រោយ។ ថ្ងៃនេះ Sabay នឹងបង្ហាញថា ពួកគេទាំងនោះ ស្ថិតក្នុងត្រកូលណាខ្លះ៖

១.យាយ ណយ សំណាង និងកូនប្រុស វណ្ណា ស័ក្ដិ

លោកយាយ ណយ សំណាង ដែលមានជន្មាយុ ៧២ ឆ្នាំមកហើយនោះ គឺជាតារាជើងចាស់ដែលចេះសិល្បៈស្ទើរគ្រប់ទម្រង់ទាំង ល្ខោន ភ្លេងការ អាយ៉ៃ យីកេ មហោរី កំប្លែង និងទេពកោសល្យមួយចំនួនទៀត។ ចំណែកកូនប្រុសលោកយាយ គឺ វណ្ណា ស័ក្ដិ ជាតារាចម្រៀងដែលវិវត្តន៍ខ្លួនពីអ្នករាំប្រចាំបុស្ដិ៍លេខ ៥ មកជាតារាចម្រៀងប្រចាំផលិតកម្ម M ។ បទរបស់ វណ្ណា ស័ក្ដិ ដែលប្រិយមិត្តគាំទ្រខ្លាំង គឺបទ "ពេលស្រវឹងទើបដឹងថានឹកអូនជាងគេ”។

២.តាសង់ស៊ីស និងកូនស្រី សុន ស្រីពេជ្រ

តារាកំប្លែងស្ងួតលោកតា សង់ស៊ីស មានកូនស្រីប្រុសពីរនាក់ក៏ប្រឡូកក្នុងវិស័យសិល្បៈនេះដែរ គឺលោក សង់ សេត និងកញ្ញា សុន ស្រីពេជ្រ តែកូនស្រីលោកតាទទួលបានកេរ្តិ៍ឈ្មោះល្បីជាងកូនប្រុស។ ស៊ុន ស្រីពេជ្រ គឺជាតារាចម្រៀងច្រៀងឲ្យផលិតកម្មរស្មីហង្សមាស តែកញ្ញាមានឈ្មោះល្បីតាមរយៈបទចម្រៀងរបស់ក្រសួងទេសចរណ៍។

៣.យាយ យ៉យ និងកូនប្រុស នាយ ព្រែក

នួន សារី ជាឈ្មោះពិតរបស់ យាយ យ៉យ ។ យាយ យ៉យ ក៏ជាតារាជើងចាស់ដែលចេះសិល្បៈច្រើនទម្រង់មិនចាញ់យាយ ណាង ប៉ុន្មានដែរ។ តារាវ័យ ៥៩ ឆ្នាំរូបនេះលេ ចធ្លោខ្លាំងក្រោយចាប់ដៃគូច្រៀងអាយ៉ៃជាមួយលោក ព្រហ្ម ម៉ាញ។ តារាស្រីសម្បុរសណ្ដែកបាយខាងលើ ក៏មានកូនប្រុសម្នាក់ដែលកំពុងមានឈ្មោះល្បីក្នុងវិស័យសិល្បៈដែរ នោះគឺលោក ខេង រតនៈ ហៅនាយព្រែក។ រលកក្រោយរូបនេះ ធ្លាប់ល្បីឈ្មោះខ្លាំងពេលសម្ដែងជាមួយកំពូលតារាចម្រៀង ព្រាប សុវត្ថិ ច្រើនលើកច្រើនសារ ហើយបច្ចុប្បន្នលោកគឺជាពិធីករមួយរូបផងដែរ៕

៤.វ័រ សារុន និង សារុន កល្យាណ ឬ Jimmy Kiss

តារាចម្រៀងស្រករក្រោយ ដែលមាននិន្នាការមិនចម្លងបទបរទេស ពោលគឺនិពន្ធបទចម្រៀងដោយខ្លួនឯង លោក Jimmy Kiss ជាកូនប្រុសរបស់លោក វ័រ សារុន អតីតតារាចម្រៀងល្បីល្បាញក្នុងទសវត្សរ៍ ៦០ តាមរយៈបទ “ម៉ាក់ស៊ី” និង បទ “ញៀនបារី” ជាដើម។ អតីតតារាចម្រៀងជើងចាស់រូបនេះ សព្វថ្ងៃរស់នៅរាជធានីភ្នំពេញ និងបានបោះបង់សិល្បៈទាំងស្រុង។

៥.នាយ កុយ និងកូនប្រុស នាយ កយ

តារាកំប្លែងដែលនៅតែទទួលបានប្រជាប្រិយភាពមិនចេះរីងស្ងួតលោក ជួង ជី ហៅនាយកុយ បានអូសទាញកូនប្រុស នាយ កយ ឲ្យប្រឡូកក្នុងអាជីពកំប្លែងជាមួយគ្នា។ នាយកយ ក៏ត្រូវបានទស្សនិកជនសរសើរថាមានតិចនិកកំប្លែងមិនចាញ់ឪពុកប៉ុន្មានដែរ។

៦.ហួរ ឡាវី និងកូនស្រី វី ដាណែត

លោក ហួរ ឡាវី គឺជាតារាចម្រៀងសម័យជើងចាស់សំឡេងស្អកគ្មានពីរតាំងពីទសវត្សរ៍ ៨០ រហូតដល់បច្ចុប្បន្ន។ សព្វថ្ងៃលោកជាតារាចម្រៀងប្រចាំក្រុមសិល្បៈក្រសួងការពារជាតិ និងជាគ្រូបង្ហាត់ប្រចាំក្លឹបសិល្បៈតារាមាស។ លោកធ្លាប់បានសាងកេរ្តិ៍ឈ្មោះល្បីល្បាញតាមរយៈបទចម្រៀងជាច្រើន ដូចជាបទ “អោយបងសុំស្រឡាញ់ផង” និង បទ "ស្គាល់តែក្លិនមិនបានខ្លួន” “អាណែតមាសបង” ជាដើម។ ចំណែកកូនស្រីលោក វី ដាណែត គឺជាតារាចម្រៀងក្នុងផលិតកម្មរស្មីហង្សមាស ដែលកំពុងទទួលបានប្រជាប្រិយភាពពីសំណាក់យុវវ័យ។

៧.តាវីតាមីនសេ និងកូនស្រី ប៉េងប៉ោង

តារាកំប្លែងមិនរីងស្ងួត វីតាមីនសេ មានអាយុ ៦៧ ឆ្នាំរូបនេះ មានអតីតភាពជាអ្នកសម្ដែងល្ខោនបាសាក់។ ពេលហក់ចូលអាជីពជាអ្នកកំប្លែងនេះ លោកក៏បានអូសទាញកូនស្រីគឺអ្នកស្រី មឿន និមល ហៅនាង ប៉េងប៉ោង មកចូលក្នុងវិស័យនេះដែរ។

៨. សុះ ម៉ាត់ និងកូនប្រុស សុះ ម៉ាច

សព្វថ្ងៃលោក សុះ ម៉ាច ជាតារាចម្រៀង និងជាប្រធានសមាគមសិល្បករខ្មែរ។ ប្រធានសមាគមរូបនេះ ជាកូនប្រុសបង្កើតអតីតតារាចម្រៀង សុះ ម៉ាត់ ល្បីល្បាញរួមជំនាន់អធិរាជសំឡេងមាស ស៊ីន ស៊ីសាមុត ក្នុងទសវត្ស ៦០- ៧០ តាមរយៈបទចម្រៀងជាច្រើនដូចជាបទ " អាកាសយាន” បទ "ផ្ញើកងចងដៃ” “ទឹកភ្នែកម្ដាយខ្ញុំ” ជាដើម។ លោក សុះ ម៉ាត់ ស្លាប់ក្នុងរបប ប៉ុល ពត ហើយស្នាដៃចម្រៀងជាច្រើន ហាក់នៅរាយប៉ាយទាំងក្នុង និង ក្រៅប្រទេស៕

អត្ថបទ៖ទ្រី រ៉ាវី