តួស្រទន់ ក្នុងរឿង "ស្រទន់មន្តស្នេហ៍" ជាអ្នកណា?

2015-10-27 17:33:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តដែលនិយមគាំទ្រប្រលោមលោក Sabay គ្រាន់តែឃើញពាក្យថា "ស្រទន់" ច្បាស់ជានឹកទៅដល់រឿង "ស្រទន់មន្តស្នេហ៍" ដែលជាស្នាដៃរបស់អ្នកនិពន្ធ ម៉ីសន សុធារី ជាមិនខាន។

មកដល់ចំណុចនេះ សុំរំលឹកទៅដល់តួ ស្រទន់ បន្តិច នាងជានារីម្នាក់ដែលមានចរិតស្លូតបូតសុភាពរាបសារ ចូលចិត្តនិយាយត្រង់ឃើញអ្វីថាហ្នឹង។ ក្នុងរឿង "ស្រទន់មន្តស្នេហ៍" នេះទៀតសោត នាងត្រូវបានតួផ្សេងៗតាមធ្វើបាបនាងឥតល្ហែ ប៉ុន្តែ បានតួប្រុសឈ្មោះ ដេត ភូមិន្ទ តាមជួយនាងគ្រប់ពេលវេលាទៀតផង។

តើតួស្រទន់មានជីវប្រវត្តិបែបណា? តោះតាមដានជាមួយ Sabay ទាំងអស់គ្នា៖

ស៊ឹម ស្រីមុំ ជាឈ្មោះពិតរបស់ស្រទន់ នាងមានអាយុ ២១ឆ្នាំ កម្ពស់ ១៦៥ សង់ទីម៉ែត្រ ទម្ងន់ ៤៥ គីឡូក្រាម បងប្អូន ២នាក់ ប្រុស១ ស្រី១ នាងជាកូនពៅ។ លោក ឪពុក ឈ្មោះ ស៊ឹម សឿន ជាអ្នកម៉ៅការសំណង់ អ្នកម្ដាយឈ្មោះ តាំង ហ្កិចទៀង ធ្វើការនៅរោងចក្រ។

ជីវិតពេលនៅសិក្សា

ដោយសារជីវភាពខ្វះខាត លោកឪពុកក៏ឈឺ ស្រីមុំត្រូវបង្ខំចិត្តឈប់រៀន តាំងពីថ្នាក់ទី៧មកម្ល៉េះ។ ស្រីមុំ ប្រាប់ថា ឪពុកម្ដាយមិនចង់ឲ្យនាងឈប់រៀនទេ ប៉ុន្តែ បើសិនជាទៅរៀន នាងត្រូវការលុយដើម្បីចំណាយទៅលើសម្ភារៈសិក្សាមួយចំនួនទើបបាន។ គួបផ្សំនឹងជីវភាពខ្វះខាតផងនោះ នាងមិនអាចបន្តទៀតបានទេ។ សព្វថ្ងៃនេះនាង រៀនអង់គ្លេសនៅផ្ទះតិចតួចដើម្បីពង្រឹងចំណេះដឹងនាងបន្ថែមទៀត ។

ជីវិតចូលសិល្បៈ

ស្រីមុំ បោះជំហានចូលសិល្បៈតាមរយៈការប្រលងកញ្ញាឯក ប្រីជតុន ឆ្នាំ ២០១៣ ។ នាងប្រាប់ថា ការប្រលងតែងតែមានចាញ់ឈ្នះ ដោយនាងបានឈានដល់វគ្គជម្រុះ ១០នាក់ចុងក្រោយ។ បន្ទាប់ពីធ្លាក់នៅក្នុងការប្រលងនោះ មានខាងក្រុមដើរម៉ូដមួយចាប់អារម្មណ៍នាងក៏បានទាក់ទងឲ្យទៅដើរម៉ូដឲ្យ។ វិវត្តន៍ខ្លួនពីមួយថ្ងៃទៅមួយថ្ងៃ ខាងផលិតកម្មនានាបានមើលឃើញពីសមត្ថភាព និងស្គាល់នាងតាមរយៈការដើរម៉ូដក៏ត្រូវបានផលិតកម្មផ្សេងៗទាក់ទងថត MV ។ បទទាំងនោះមានដូចជាបទ "ខ្ញុំខ្លាចហើយលុយ " "បែកអូនបងមានលុយចាយច្រើនជាងមុន" "កុំដុតបងឈឺពេក" "លាក់ទឹកភ្នែកក្រោយខ្នង " ចំណែករឿងកុនវិញបាន ២ ដូចជា "រនាតស្នេហ៍" និង "អ្នកលេងជើងខ្វេរ"ជាដើម។

ការលំបាកក្នុងវិស័យសិល្បៈ

ការលំបាកអ្នកណាក៏មានដែរ អ្នកខ្លះជួបប្រទះបែបនោះអ្នកខ្លះបែបនេះ អាស្រ័យទៅតាមរឿងរបស់ពួកគេ។ ចំពោះ ស្រីមុំ វិញ នាងពិបាករឿងយានជំនិះសម្រាប់ធ្វើដំណើរពេលទៅណាម្ដងៗ ជាពិសេសពេលទៅធ្វើការ ជួនកាលត្រូវទៅជាមួយ មិត្តភក្តិ ជួនកាលឪពុកអ្នកជូនទៅ ជួនកាលទៀតក៏ម៉ូតូឌុប។

ស្រីមុំ ឬស្រទន់ ក្នុងវីដេអូចម្រៀង "បើសិនជាអូននៅជិតបង" របស់ Sabay E-novel

"ហើយម៉ូតូឌុបហ្នឹងញឹកញាប់ជាទីបំផុតបង ព្រោះពេលខ្លះការងារមានគេទាក់ទងភ្លាមៗប៉ាញ៉ុមគាត់មកយកអត់ទាន់ចឹងមានតែម៉ូតូឌុប"។ ស្រីមុំ ថ្លែង។

ស្រីមុំ បន្ត៖ “ ហើយបងការងារខ្លះគេត្រូវហៅខ្ញុំទៅថត ប៉ុន្តែមានមនុស្សនៅចាំរារាំង ថាមិនបាច់ឲ្យហៅខ្ញុំទេ ព្រោះគេថាខ្ញុំឥឡូវមានការងារច្រើនហើយ។ អ្នកខ្លះទៀតគេមើលងាយ ព្រោះខ្ញុំអ្នកក្រ គេមិនចង់និយាយរក ហើយគេមើលមកយើងដូចមិនដល់គេចឹងបង"។

គោលបំណងថ្ងៃអនាគត

តួស្រីស្រទន់ ក្នុងរឿង "ស្រទន់មន្តស្នេហ៍" ប្រាប់ថា បើសិនជាមានលុយគ្រប់គ្រាន់នាង នឹងបើកហាងអ៊ុតសក់មួយ ព្រោះជំនាញនេះ ស្រីមុំ ចេះតាំងពីនាងមានអាយុ ៩ ឆ្នាំមកម្ល៉េះ និង ទិញយានជំនិះសម្រាប់ធ្វើដំណើរ កុំចាំតែពឹងគេ។ ចំពោះវិស័យសិល្បៈវិញបើមានខាងផលិតកម្មទាក់ទងច្រើនការងារកាន់តែរីកចម្រើន និងមាន ទស្សនិកជនស្គាល់ច្រើន នាងនឹងបន្តអាជីពសិល្បៈដដែល៕

ហេង ពិទូ ពីតារាចម្រៀងទៅជាឯកអគ្គរាជទូតនៃចម្រៀង Original

អត្ថបទ៖ ថា ម៉ាលីដា