ក្រោយសម្ភាសការងារចប់ គួរផ្ញើអ៊ីមែលអរគុណអ្នកសម្ភាសន៍បែបណា?

2015-11-03 21:39:21
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេលក្រោយសម្ភាសការងារចប់ ការថ្លែងអំណរគុណតាមការផ្ញើអ៊ីមែលទៅកាន់អ្នកសម្ភាសន៍ គឺជារឿងដែលគួរធ្វើ បើទោះបីវាមិនសូវពេញនិយមនៅកម្ពុជាក៏ដោយ។ ការធ្វើបែបនេះ អាចធ្វើឲ្យអ្នកលេចធ្លោជាងបេក្ខជនដទៃ ព្រោះវាជាការជួយក្រើនរំលឹកអ្នកសម្ភាសន៍ឲ្យចងចាំពីអ្នក និងបញ្ជាក់ពីភាពយកចិត្តទុកដាក់ចំពោះតំណែងដែលអ្នកដាក់ពាក្យផងដែរ។ ខាងក្រោមជារបៀបខ្លះៗ ទាក់ទងនឹងរបៀបនៃការផ្ញើសារអរគុណ៖

១. អរគុណអ្នកសម្ភាសន៍

ចាប់ផ្ដើមពីខ្លឹមសារសរសេរអរគុណទៅដល់អ្នកសម្ភាសន៍។ ការអរគុណនោះគឺទៅលើការផ្ដល់ឱកាសឲ្យអ្នកបានសម្ភាសន៍។ អ្នកគួរដឹងពីមុខងារ និងតួនាទីអ្នកសម្ភាសន៍ ឲ្យបានច្បាស់លាស់ផងដែរ បន្ទាប់មកគួរសរសេរអំពីចំណាប់អារម្មណ៍របស់អ្នកបង្ហាញពីភាពរីករាយអំឡុងពេលធ្វើបទសម្ភាសន៍ បែបនេះជួយរំលឹកដល់អ្នកដែលបានសម្ភាសអ្នកឲ្យចាំរូបអ្នកបានល្អ។

២. រំលឹកឡើងវិញអំពីអារម្មណ៍រីករាយនឹងមុខដំណែងដែលបានដាក់ពាក្យ

បន្ទាប់ពីថ្លែងអំណរគុណ គួរសរសេររំលឹកឡើងវិញអំពីអ្វីកិច្ចសន្ទនាអ្វីដែលអ្នកបានបង្ហាញក្នុងបទសម្ភាសន៍ លើកឡើងអំពីចំណុចល្អៗ អំពីជំនាញ ឬការសិក្សាដែលសមទៅនឹងមុខដំណែងបានដាក់ពាក្យជាពិសេសអារម្មណ៍រីករាយនឹងការងារនោះ។ ព្យាយាមសង្ខេបចំណុចទាំងនោះឲ្យខ្លី មានន័យគ្រប់គ្រាន់។

៣. រំលឹកអំពីអ្វីចំណុចល្អ សំខាន់ៗ

ក្នុងការជ្រើសរើសការងារមួយចំនួនគឺមានបេក្ខជនដាក់ពាក្យច្រើន ដូចនេះការរំលឹកអំពីចំណុចសំខាន់ៗដែលអ្នកបានលើកឡើងទាក់ទងនឹងការងារដោយបង្ហាញថាអ្នកពិតជាសក្ដិសមនឹងការងារនោះ។ រំលឹកបែបគឺធ្វើឲ្យអ្នកជ្រើសរើសបុគ្គលិកនឹកឃើញអ្នក ហើយវាក៏ជាឱកាសមួយដែរ។

៤. ផ្ដល់ព័ត៌មានថ្មីដែលមិនបានប្រាប់ក្នុងបទសម្ភាសន៍

លើកពីចំណុចល្អៗដែលអ្នកគិតថាមិនបានលើកឡើងកាលពីនៅសម្ភាសន៍ គឺចំណុចណាដែលគិតថាជាកត្តាមួយដែលជួយជំរុញឲ្យអ្នកសម្រេចចិត្តជ្រើសរើសបុគ្គលិករើសយករូបអ្នក។ នេះជាឱកាសទីពីរដោយបានរំលឹកពីខ្លួនអ្នកផង និងជំរុញចិត្តអ្នកជ្រើសរើសតាមរយៈការថ្លែងអំណរគុណ។

៥. បង្ហាញពីការតាមដានព័ត៌មានការងារ

ទោះជាមិនអាចដឹងពីលទ្ធផលជាប់ឬធ្លាក់លើមុខដំណែងការងារនាពេលអនាគត ក៏គួរសរសេរបង្ហាញទៅអ្នកសម្ភាសអំពីការតាមដានព័ត៌មានពីការងារមុខដំណែងដែលបានដាក់ពាក្យ។ នេះគឺបង្ហាញថាអ្នកជាមនុស្សចាប់អារម្មណ៍ និងប្ដេជ្ញាចំពោះការងារនោះ។

៦. សរសេរខ្លីល្មមតែមានន័យល្អគ្រប់គ្រាន់

ព្យាយាមសរសេរខ្លឹមសារអរគុណ និងរំលឹកអំពីខ្លួនខ្លីៗមានន័យសំខាន់គ្រប់គ្រាន់ផ្ញើទៅអ្នកសម្ភាស ចៀសវាងសរសេរច្រើន ដែលបង្កជាការគួរឲ្យធុញទ្រាន់ទៅវិញ។ អ្នកបានលើកឡើងច្រើនពេលសម្ភាសដូចនេះការផ្ញើលិខិតអរគុណគ្រាន់តែជាការរលឹកមួយ។

៧. ផ្ញើក្នុងរយៈពេល២៤ម៉ោង (មិនលើសពីមួយថ្ងៃ)

គួរចាំថា ការផ្ញើលិខិតអំណរគុណទៅអ្នកសម្ភាសជ្រើសរើសបុគ្គលិក គឺនៅពេលថ្មីៗ ដែលអ្នកគិតថាពួកគេនៅចាំរូបអ្នកបានល្អ។ លើសពី១ថ្ងៃគឺអាចជារយៈពេលយូរមួយ ប៉ុន្តែក្នុងករណីភ្លេចក៏គួរផ្ញើទៅជាជាងមិនបានធ្វើអ្វីទាំងអស់ដែរ។ ជាចុងក្រោយអ្នកនឹងអាចរងចាំនូវដំណឹងល្អមួយក៏ថាបាន៕

គំរូលិខិតអរគុណ៖