៣ចំណុចដ៏ចាំបាច់ត្រូវធ្វើ ក្រោយសម្ភាសចប់ ព្រោះអាចជួយឲ្យអ្នកជាប់ការងារបាន

2015-10-27 21:56:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយសម្ភាសការងាររួច មុននិងក្រោយពេលចាកចេញពីកន្លែងសម្ភាស អ្នកស្វែងរកការងារធ្វើក៏គួរដឹងពីអ្វីដែលត្រូវធ្វើផងដែរ ដើម្បីឲ្យអ្នកសម្ភាសការងារមិនភ្លេច និងចងចាំរូបអ្នក។

តាមវិបសាយការងារ Live Career និងទស្សនាវដ្ដី Forbes បានឲ្យដឹងថា អ្នកស្វែងរកការងារធ្វើមួយចំនួនមិនបានខ្វាយខ្វល់តាមដាននូវព័ត៌មាន និងរំលឹកពីខ្លួនឯងទៅខាងក្រុមហ៊ុន ឬស្ថាប័នសម្ភាសឲ្យដឹងនោះទេ ខណៈដែលអ្នកសម្ភាសជាច្រើនចង់បានទង្វើបែបនេះ។ ខាងក្រោមនេះជាគន្លឹះមួយចំនួនដែលគួររំលឹក និងបង្ហាញពីខ្លួនអ្នកទៅក្រុមហ៊ុនដែលអ្នកដាក់ពាក្យក្រោយពេលសម្ភាសការងាររួច៖

១. ស្នើសុំព័ត៌មានបន្ថែមមួយចំនួនពីក្រុមហ៊ុនដែលបានសម្ភាសអ្នករួច

ព័ត៌មានបន្ថែមដូចជា ស្នើសុំនាមប័ណ្ណអ្នកដែលសម្ភាសមុនពេលចាកចេញ នេះធ្វើឲ្យពួកគេចងចាំអ្នក ហើយអ្នកអាចទទួលបានព័ត៌មានច្រើនថែមទៀត ដូចជាឈ្មោះពួកគេ លេខទូរសព្ទ អ៊ីម៉ែលជាដើម។ ក្រោយពេលសម្ភាសរួច ការធ្វើសកម្មភាពខាងលើគឺបង្ហាញចំណាប់អារម្មណ៍របស់អ្នកក្នុងការងារក្រុមហ៊ុន ឬស្ថាប័នដែលអ្នកដាក់ពាក្យ។ បន្ថែមពីនេះមន្ត្រីសម្ភាសអាចផ្ដល់ដំណឹងបន្ថែមអំពីមុខដំណែងដែលអ្នកបានដាក់ពាក្យ។ ក្រោយសម្ភាសរួចគួរកត់ត្រាអំពីចំណុចសំខាន់ៗមួយចំនួនដែលមិនបានលើកឡើងអំឡុងពេលសម្ភាសនិងលើកឡើងវិញតាមរយៈការអ៊ីម៉ែលទៅពួកគេ ឬសន្ទនាតាមទូរសព្ទបន្ថែម។

២. ទាក់ទងទៅអ្នកសម្ភាសអ្នកវិញក្នុងរយៈពេល៤៨ម៉ោង គួរធ្វើទំនាក់ទំនងភ្លាមៗទៅអ្នកសម្ភាសការងារក្រោយសម្ភាសអ្នករួច។ អ្នកជំនាញការងារជាច្រើនបាននិយាយថា វាមិនលឿនពេកក្នុងន័យរំខានគេ (អ្នកសម្ភាស) នោះទេ។ ចំណុចសំខាន់ៗដែលអ្នកត្រូវលើកឡើងប្រាប់ទៅអ្នកសម្ភាសគឺធ្វើឲ្យពួកគេស្គាល់ និងចងចាំរូបអ្នកបានល្អតាមរយៈការសរសេរសេចក្ដីថ្លែងអំណរគុណជាដើម។ ពេលមានជម្រើសណាមួយរវាងបេក្ខជនដទៃ អ្វីដែលអ្នកបានរំលឹកទៅកាន់ពួកគេនោះនឹងអាចជួយអ្នកបាន។ ក្នុងករណីភ្លេចមិនបានទូរសព្ទតាមដានព័ត៌មានពីគេក្នុងរយៈពេល៤៨ម៉ោងនោះ អ្នកគួរចាប់ផ្ដើមទាក់ទងសួរនាំពីគេភ្លាម ទោះយឺតពេលក៏ប្រសើរជាងមិនបានធ្វើអ្វីទាំងអស់ដែរ។

៣. ផ្ញើសារអេឡិចត្រូនិកអរគុណទៅកាន់អ្នកសម្ភាស

ផ្ញើសារអេឡិចត្រូនិក(អ៊ីម៉េល) អរគុណទៅអ្នកសម្ភាសគឺមិនត្រឹមតែឲ្យពួកគេងាយចងចាំរូបអ្នកទេ វាបង្ហាញថា អ្នកជាមនុស្សយកចិត្តទុកដាក់ មានចំណាប់អារម្មណ៍លើការងារ មានទំនួលខុសត្រូវ និងជាមនុស្សដើរទាន់សម័យកាលបច្ចេកវិទ្យាផងដែរ។ ទោះបីការសម្ភាសមិនបានល្អ ប៉ុន្តែអ្នកសម្ភាសអាចពិចារណារឡើងវិញនូវពេលមានជម្រើសណាមួយ និងជាឱកាសសម្រាប់ថ្ងៃក្រោយ។ អ្វីដែលគួរប្រយ័ត្ននោះគឺ បង្ការកុំឲ្យមានកំហុស វេយ្យាករណ៍ អត្ថន័យចំពោះសារអំណរគុណជាភាសាអង់គ្លេសជាដើម។ ជាចុងក្រោយអ្នកអាចនឹងរង់ចាំលទ្ធផលល្អពីអ្នកសម្ភាសក៏ថាបាន៕