តា និងយាយពីរនាក់សុខចិត្តដាច់បាយក៏មិនសុំទានគេ
- 2015-11-06 13:50:14
- ចំនួនមតិ 0 | ចំនួនចែករំលែក 0
តា និងយាយពីរនាក់សុខចិត្តដាច់បាយក៏មិនសុំទានគេ
ចន្លោះមិនឃើញ
លោកតាឈ្មោះ ឌួង និងលោកយាយជាប្រពន្ធឈ្មោះ សំអាត សុខចិត្តដាច់បាយក៏នៅតែប្រកបរបររើសអេតចាយតាមផ្លូវមិនសុំទានពីអ្នកដទៃ ដោយរើសចាប់ពីក្រោយវត្តនាគវ័ន្ត រហូតមកដល់ស្តុបទេពផនជារៀងរាល់យប់។
លោកតា ឌួង បានឲ្យដឹងថា លោកមានអាយុ ៦៨ ឆ្នាំ។ ចំណែកប្រពន្ធគាត់ឈ្មោះ សំអាត មានអាយុ៧៤ ឆ្នាំសព្វថ្ងៃប្រកបរបររើសអេតចាយដោយមួយថ្ងៃសល់លុយចំណេញប្រហែល ៧ពាន់ឬ១ម៉ឺនរៀល។ តា និងយាយប្រកបរបរនេះតាំងពីឆ្នាំ ១៩៩៦ មកម៉្លេះ បុន្តែលោកគ្មានសល់អ្វីក្រៅពី រទះជាប់ខ្លូន ដែលប្រកបរបររាល់ថ្ងៃនេះឡើយ។ មានថ្ងៃខ្លះដាច់បាយម្ដងម្កាលដែរគឺពេលមេឃភ្លៀង ដោយសារមិនអាចចេញទៅរើសបាន។ ម្យ៉ាងទៀតផ្ទះដែលបាំងក្ដាបីបួនសន្លឹកនៅលើដីគេក្រោយវត្តនាគវ័ន្តលិចទឹកមិនអាចដេកបានទេ ពេលមានភ្លៀងម្ដងៗ។
លោកតាប្រាប់ទាំងអួលដើមកទៀតថា លោករើសនៅម្ដុំក្រោយវត្តនាគវ័ន្ត បន្តតាមផ្លូវរហូតមកដល់ស្តុបទេពផនទើបឈប់សម្រាកនៅទីនោះ។ ក្នុងពេលឈប់តែងតែមានបងប្អូន ដែលធ្វើដំណើរឃើញគេអាណិតគេឲ្យមួយរយពីររយ ប៉ុន្តែមិនបានសុំទានគេទេ។ តា និងយាយបញ្ជាក់ថា "យើងអត់ហើយចៅ គេឲ្យយកទៅបើមិនយកបានអីហូប។ តាមចិត្តមិនចង់បានរបស់គេទេសុខចិត្តអត់អីហូបក៏មិនហាមាត់សុំគេដែរ ប៉ុន្តែធ្វើម៉េចបើរកអង្ករច្រកឆ្នាំងគ្មានផង។ ពេលរើសមិនបានមានបងប្អូនជិតខាងគេឲ្យនេះឲ្យនោះដែរមករហូតនឹងចៅ"។
លោកតា ឌួង បន្ថែមថា ពេលថ្ងៃរើសអេតចាយមិនបានទេ ចឹងហើយទើបមករើសពេលយប់ ដល់ពេលម៉ោងប្រហែល ១ ឬ ១ជាងតិចទើបទៅដល់ផ្ទះវិញ៕
អត្ថបទ៖ ស្រី សុវណ្ណដារ៉ា