ណូម័រ ត្រៀមថតរឿង"ក្រឡអីហ្នឹង វគ្គ២"ចុងខែនេះ

2014-09-17 17:12:23
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា អន រ៉ាស៊ីសុមេត្តា ហៅណូម័រ ដែលធ្លាប់បង្ហាញមុខក្នុងរឿង "ក្រឡអីហ្នឹង" វគ្គ១កាលពីពេលកន្លងទៅ បានខ្សឹបប្រាប់ Sabay នៅព្រឹកនេះថា ឆាប់ៗខាងមុខ គ្រោងថតរឿងខាងលើក្នុងវគ្គ២ទៀតថែមទៀត។ អានអត្ថបទ៖ សិរីមន្ត លេងស្ទីលដោះអាវត្រដាងស្លាបរាំឡូយអស់ស្ទះក្នុងបទ “កុម្ម៉ង់ដូស្មោះស្នេហ៍

ដំណើរការថតរឿង "ក្រឡអីហ្នឹងវគ្គ២" ត្រូវបានតារាស្រីរាងតូចច្រឡឹងម្នាក់នេះប្រាប់ថា ចាប់ផ្ដើមពីថ្ងៃទី២៦ ខែ កញ្ញា ឆ្នាំ ២០១៤ នេះទៅ ដែលជាថ្ងៃ ពិធីក្រុងពាលី តែម្ដង ។ នៅមិនទាន់ដឹងថា ត្រូវសម្ដែងជាតួអ្វីនោះទេ ព្រោះសាច់រឿងទាំងអស់មិនទាន់បានដឹងនៅឡើយ តែគ្រាន់តែដឹងថា នាងជាតួសំខាន់ម្នាក់ ដូចកាលនៅវគ្គ១ដែរ។ កាលពីវគ្គ១ ដើរតួជា សិស្សសាលា ជាមួយអ្នកនាងសុខ សោម៉ាវត្តី លោក សុវណ្ណា រាហ៍ លោក ប៊ីអាយជី នាយក្រួច ជាដើម។

ណូម័រ បានឲ្យដឹងទៀតថា តារាសម្ដែងកាលពីវគ្គ១ត្រូវមកសម្ដែងទាំងអស់ សូម្បីតែអ្នកនាង សារ៉ាយ សក្ខណា ដែលមានស្វាមីទៅរស់នៅសហរដ្ឋអាមេរិកក៏ ត្រូវជិះយន្តហោះ ទាំងមានផ្ទះពោះមកថតដែរ។

សមាជិកក្នុងក្រុម Girl Mini បានលើកឡើងទៀតថា នាងពិតជាសប្បាយចិត្តខ្លាំងណាស់នៅពេលដែល មានឱកាសបានសម្ដែងរឿង "ក្រឡអីហ្នឹងវគ្គ២" បែបនេះ ហើយសង្ឃឹមយ៉ាងមុតមាំថា តាមរយៈរឿងមួយនេះ នឹងជួយបង្កើនប្រជាប្រិយភាពឲ្យនាងមួយកម្រិតថែមទៀតជាក់ជាមិនខាន។ ក្នុងនោះដែរ ណូម័របានប្ដេជ្ញាថា ខិតខំប្រឹងសម្ដែងឲ្យអស់ពីសមត្ថភាពមិនឲ្យម្ចាស់ផលិតកម្មខកបំណងឡើយ ។ អានអត្ថបទ៖ ស្នាមញញឹមតារាល្បីៗ ក្នុងថ្ងៃបើកសម្ពោធ ETV ល្ងាចមិញ

កញ្ញា អន រ៉ាស៊ីសុមេត្តា ហៅណូម័រ បានផ្ដើមអាជីពសិល្បៈក្នុងក្រុម Girl Mini ដែលមានសមាជិក៥នាក់សុទ្ធតែស្រី។ តារាស្រីម្នាក់នេះក៏ធ្លាប់ថតស្ប៉តពាណិជ្ជកម្មមួយចំនួនដែរ ចំពោះខ្សែភាពយន្តវិញក្រៅពីរឿង " ក្រឡអីហ្នឹង" នាងធ្លាប់ថត រឿងខ្លីមួយទៀតឈ្មោះថា "ព្រហ្មចារី"។ ស្រីស្រស់វ័យ១៩ឆ្នាំម្នាក់នេះបានបង្ហើបជាចុងក្រោយថា ក្រោយពីថតបញ្ចប់រឿងខាងលើ នាងគ្រោងថតរឿងថ្មីមួយទៀត ប៉ុន្តែសុំលាក់សិន៕

អត្ថបទ៖ ខុត សីហា