ចង់ក្លាយជាអ្នកបង្កើតហ្គេម ហួយលីង សម្រេចរៀន IT ដែលនារីភាគច្រើនមិនប្រាថ្នា

2015-11-12 15:40:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលសិស្សស្រីភាគច្រើន ចូលចិត្តរៀនជំនាញ ធនាគារ គណនេយ្យ គ្រប់គ្រង ច្បាប់ និងជំនួញជាដើមនោះ ប៉ុន្តែកញ្ញា ទា ហួយលីង បែរជារៀន «ព័ត៌មានវិទ្យា» ជាជំនាញដែលពេញនិយមសម្រាប់តែប្រុសៗទៅវិញ។ អតីតសិស្សវិទ្យាល័យព្រះយុគន្ធរ បង្ហើបឱ្យដឹងថា អនាគតនាងចង់ក្លាយជាអ្នកបង្កើតហ្គេមដ៏ល្បីឈ្មោះម្នាក់។

សមាជិកគ្រួសារសុទ្ធតែរៀនជំនាញផ្សេង ដូច្នេះតើអ្វីជាកត្តាជំរុញឱ្យ ហួយលីង ចាប់ជំនាញព័ត៌មានវិទ្យា? ចំពោះមូលហេតុ យុវតីសម្បុរសជាកូនចៅចិន បានទម្លាយថា ព្រោះតែកញ្ញាចូលចិត្តលេងហ្គេមតាំងពីតូច ហើយមកដល់ពេលនេះ កញ្ញាលេងបានច្រើនហ្គេមហើយ។

ក្រៅពីនេះនៅមានកត្តាចម្បងមួយផ្សេងទៀត ដែលធ្វើឱ្យកញ្ញាចាប់ចិត្ត គឺឱកាសការងារ និង មានការជ្រោមជ្រែងយ៉ាងកក់ក្ដៅពីក្រុមគ្រួសារ។

“ខ្ញុំចូលចិត្តហ្គេមតាំងពីថ្នាក់ទី៦ ខ្ញុំចង់ក្លាយជាអ្នកបង្កើតហ្គេម បង្កើត App និង Software អីចឹងទៅ។ ចំណែកម៉ាក់ក៏ឱ្យខ្ញុំរៀនជំនាញហ្នឹងដែរ ព្រោះគាត់យល់ថា ស្រីៗអត់សូវរៀនចឹងឱកាសការងារច្រើន។ បើសិនមិនអាចសម្រេចក្ដីស្រមៃបាន ខ្ញុំក៏អាចធ្វើផ្នែកផ្សេងដូចជាបង្កើតវិបសាយជាដើម។ ក្រុមហ៊ុនណាក៏ត្រូវការអ្នកចេះ IT បើចេះ ស្រីៗច្បាស់មានអាទិភាពជាង"។

ចំពោះជំនាញដែលភាគច្រើនជាសិស្សប្រុសនេះ យុវតីវ័យ១៩ឆ្នាំ ក៏បានបង្ហាញក្ដីបារម្ភថា រៀនមិនទាន់គេខ្លះដែរ ប៉ុន្តែវាមិនមានអ្វីចោទទេ ព្រោះកញ្ញាជឿជាក់ថា សិស្សស្រីក៏មានសមត្ថភាពក្នុងជំនាញនេះ ឬអាចរៀនពូកែខ្លាំង ជាងសិស្សប្រុសទៀតផង។

ក្នុងជំនាញព័ត៌មានវិទ្យា ហួយលីង ត្រូវចំណាយពេលសិក្សាបួនឆ្នាំ តែបើគិតមកដល់ត្រឹមថ្ងៃនេះ អ្នកកើតនៅទីក្រុងភ្នំពេញ ទើបរៀនបានមួយសប្ដាហ៍ប៉ុណ្ណោះ នៅសាកលវិទ្យាល័យន័រតុន។ នៅឆ្នាំមូលដ្ឋានឆមាសទី១ កញ្ញាត្រូវរៀន៥មុខវិជ្ជាដូចជា៖

Human & society
Principles of Business
English
Introduction to Computer
Mathematics for Computer

តាមការបញ្ជាក់សិស្សស្រី ក្នុងថ្នាក់របស់អតីតសិស្សវិទ្យាល័យព្រះយុគន្ធរ ដែលទើបបញ្ចប់បាក់ឌុបថ្មីៗនេះ មានស្រីតែ២នាក់ប៉ុណ្ណោះ ក្នុងចំណោមសិស្សជាង៥០នាក់។ ទោះមានសិស្សស្រីមិនច្រើនមែន ប៉ុន្តែកញ្ញាថានឹងខំប្រឹងប្រែង ដើម្បីសម្រេចក្ដីស្រមៃរបស់ខ្លួន៕

អាន៖ និស្សិត IT មកពីឧត្តរមានជ័យ ប្រឹងស្រាវជ្រាវដើម្បីជួយពន្យល់មេរៀនមិត្តភ័ក្ដិ