Apple គ្រោងនឹងដាក់លក់ iPhone 5s ស៊េរីថ្មីដែលមានសមត្ថភាពខ្លាំងជាងមុន

2015-11-18 16:10:29
ចំនួនមតិ 0 | ចំនួនចែករំលែក 0

ចន្លោះមិនឃើញ

កន្លងមកឃើញថា មានការរាយការណ៍ជាច្រើនអំពីទូរសព្ទ iPhone អេក្រង់ទំហំ៤អ៊ីញកំពុងស្ថិតក្នុងការផលិត។ ដោយឡែកការរាយការណ៍ថ្មីមួយទៀតបានអះអាងថា ទូរសព្ទដែលកំពុងផលិតគឺជា “iPhone 5s Mark II”។

ការរាយការណ៍ពីវិបសាយ Macotakara ដែលជាប្រភពផ្ដល់នូវព័ត៌មាន iPhone នាពេលកន្លងមកបានលើកឡើងថា ទូរសព្ទ iPhone 5s ស៊េរីថ្មីនឹងមានទ្រង់ទ្រាយស្រដៀងនឹងទូរសព្ទដើមដែរ ប៉ុន្តែនឹងមានបំពាក់បន្ទះ Chip A8 ជំនួសឲ្យបន្ទះ Chip A7។ មិនតែប៉ុណ្ណោះក៏នឹងមាន Wi-Fi ល្បឿនលឿន 802.11ac និង Bluetooth 4.1 ថែមទៀតផង។ ចំណែកឯកាមេរ៉ាវិញនឹងមានសមត្ថភាពផ្ដិតយករូបភាពបានល្អជាងមុន ពោលនឹងមាន Aperture ទំហំ f/2.2 ។

ប្រភព Macotakara បានបញ្ជាក់ដែរថា iPhone 5s ស៊េរីថ្មីនេះបានត្រៀមរួចជាស្រេចសម្រាប់ការផលិត ហើយអាចនឹងចេញលក់នៅពេលវេលាណាមួយក្នុងឆ្នាំ២០១៦។

ចំពោះ iPhone អេក្រង់៤អ៊ីញដែលមានសមត្ថភាពខ្លាំងជាងមុននេះគឺជឿជាក់ថា អាចនឹងមានការគាំទ្រច្រើនពីសំណាក់អ្នកប្រើប្រាស់ ដោយសារបច្ចុប្បន្ននេះមនុស្សភាគច្រើនពេញចិត្តនឹងទូរសព្ទទំហំតូចជាជាងទំហំធំ ណាមួយវាមានតម្លៃសមល្មមផង៕ ចុចអាន៖ លើ iPhone មានចំណុចសម្ងាត់មួយអាចមើលឃើញពីកន្លែងដែលអ្នកធ្លាប់ទៅកាលពីមុនបាន