អ្នកវិទ្យាសាស្ត្ររកឃើញកូនតោក្រៀមស្វិតជាង១ម៉ឺនឆ្នាំនៅស៊ីបេរី

2015-11-18 16:30:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអ្នកវិទ្យាសាស្ត្របានបញ្ចេញឲ្យឃើញកូនតោផុតពូជ ២ក្បាល ដែលនៅជាប់រោមខ្លួន និងព្រុយពុកមាត់នៅឡើយ ក្រោយកប់ក្រោមទឹកកកជាង១២០០០ឆ្នាំនៅតំបន់ស៊ីបេរី ប្រទេសរុស្ស៊ី។

សត្វបន្សល់តាំងពីសម័យបុរាណនេះមានឈ្មោះ Uyan និង Dina ដែលត្រូវបានគេគាស់ចេញពីទឹកកក និងមានរូបរាងអាចចំណាំបាន ដោយសារវាត្រូវកប់ក្រោមទឹកកកយ៉ាងល្អ។ កូនតោទាំងពីរក្បាល ត្រូវបានរកឃើញកាលពីខែមុន តែគេទើបបង្ហើបឲ្យដឹងថាជាកូនតោទំហំប៉ុនឆ្មាស្រុកប៉ុណ្ណោះ។

ប្រធានដឹកនាំការសិក្សាពពួកថនិកសត្វលោក Dr. Albert Protopopov ប្រចាំនាយកដ្ឋានវិទ្យាសាស្ត្រ Yakutian បានប្រាប់ថា ការរកឃើញនេះ ធ្វើឲ្យមានចម្ងល់កាន់តែខ្លាំង អំពីកូនតោដែលរក្សាបានរោមដងខ្លួន ព្រុយ ត្រចៀកបានល្អ។ លោកបន្តថា ពូជកូនតោទាំងពីរ មិនមាននៅលើពិភពលោកទេ។ គាត់សន្និដ្ឋានថា ពួកវាបានងាប់នៅក្នុងរូងមួយ ដោយសារការបាក់ទឹកកកសង្កត់ ហើយទីតាំងនោះមិនបានរងផលប៉ះពាល់ដោយការប្រែប្រួលអាកាសធាតុឡើយ។

កូនតោទាំងពីរត្រូវបានរកឃើញចម្ងាយ ១០៥០គីឡូម៉ែត្រ ភាគឦសានទីក្រុង Yakutsk តំបន់ស៊ីបេរី ដោយសារមានការប្រះទឹកកកនៅទន្លេ Uyandina ហើយក៏ត្រូវគេរកឃើញតែម្ដង។ ក្រោយសិក្សា ក្រុមអ្នកជំនាញសន្និដ្ឋានថាវាមានអាយុ ១ ឬ ២សប្ដាហ៍ប៉ុណ្ណោះ។ ពេលនេះ គេកំពុងសិក្សាស្វែងយល់បន្ថែមទៀត អំពីភាពខុសប្លែកគ្នារវាងតោសម័យបុរាណ ជាមួយតោបច្ចុប្បន្ន និងរកមើលមូលហេតុដែលវាអាចរស់នៅ និងការពារខ្លួនបានពីបរិយាកាសត្រជាក់ខ្លាំងផងដែរ៕