Microsoft និងអេស៊ីលីដាឈានចុះកិច្ចព្រមព្រៀងទិញលក់កម្មវិធីមានតម្លៃទឹកប្រាក់ច្រើនលានដុល្លារ

2015-11-18 19:25:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Microsoft បានឈានទៅចុះកិច្ចព្រមព្រៀងជាមួយធនាគារអេស៊ីលីដាការទិញកម្មវិធី Microsoft ដែលមានតម្លៃទឹកប្រាក់ច្រើនលានដុល្លារ។

លោក Bharat Mirchandani នាយកផ្នែកលក់ប្រចាំទីផ្សារថ្មីរបស់ក្រុមហ៊ុន Microsoft ប្រចាំតំបន់អាស៊ីអាគ្នេយ៍បានឲ្យដឹងថា ការចុះកិច្ចព្រមព្រៀង Microsoft Enterprise Agreement នឹងជួយបង្កើនផលិតភាពការងាររបស់ធនាគារអេស៊ីលីដាជាធនាគារក្នុងស្រុកធំបំផុតមួយក្នុងការប្រតិបត្តិការអាជីវកម្មឲ្យមានភាពរលូន និងទប់ស្កាត់រាល់ភាពងាយរងគ្រោះផ្នែកសន្តិសុខព័ត៌មានវិទ្យា។

លោកបន្តថា ការប្រើប្រាស់កម្មវិធីខុសៗគ្នាច្រើនដែលមិនស៊ីសង្វាក់គ្នា នាំឲ្យរាំងស្ទះនិងនាំឲ្យកើតមានហានិភ័យខ្ពស់ ដូច្នេះការចុះកិច្ចព្រមព្រៀងទិញអាជ្ញាប័ណ្ណកម្មវិធីរបស់ Microsoft នឹងជួយធនាគារនេះទទួលបានប្រព័ន្ធកម្មវិធីទាន់សម័យកាល ដែលអាចឆ្លើយតបទាន់ពេលវេលាទៅតម្រូវការរបស់អតិថិជន។

ការងាកទៅប្រើប្រាស់កម្មវិធី Microsoft Office សម្រាប់គ្រប់គ្រងប្រព័ន្ធបច្ចេកវិទ្យាងាយៗជាឧបករណ៍បេសកកម្មសំខាន់ ដែលធនាគារអេស៊ីលីដាមើលឃើញថានឹងជួយសម្រួលដល់ការធ្វើការងាររបស់បុគ្គលិកនិងការបង្កើនផលិតភាពអាជីវកម្មរបស់ខ្លួន។

លោក ម៉ាច ម៉ារី អនុប្រធានជាន់ខ្ពស់និងជាប្រធានផ្នែក IT នៃធនាគារអេស៊ីលីដាបានឲ្យដឹងថា កម្មវិធី Microsoft Office ជាផលិតផលចំណាស់មួយជាដំណោះស្រាយដ៏ល្អសម្រាប់ការងារការិយាល័យ។ ការចុះកិច្ចព្រមព្រៀងជាមួយក្រុមហ៊ុន Microsoft នឹងធ្វើឲ្យធនាគារអាចសន្សំសំចៃលើការចំណាយ បង្កើនផលិតភាពការងារប្រសើរជាងមុននិងអាចទប់ស្កាត់ភាពងាយរងគ្រោះផ្នែកសន្តិសុខព័ត៌មានវិទ្យា។

យ៉ាងណា អ្នកគ្រប់គ្រងរូបនេះមិនបង្ហើបពីតម្លៃនៃកិច្ចព្រមព្រៀងនេះទេ ដោយគ្រាន់បញ្ជាក់ថាតម្លៃមិនក្រោមលានដុល្លារនោះទេ។

លោកបញ្ជាក់បន្ថែម ក្នុងកិច្ចព្រមព្រៀងដែលត្រូវចំណាយទឹកប្រាក់ដ៏ច្រើនសម្បើមនេះមានសុពលភាពរយៈពេល ៣ ឆ្នាំ ហើយដែលធនាគារត្រូវបង់ជា ៣ ដំណាក់កាលរហូតដល់ឆ្នាំ ២០១៨៕