បុរសដែលរងការបាញ់នៅប៉ារីស ក៏ធ្លាប់រួចជីវិតពីភេរវកម្មអគារភ្លោះនៅញីវយ៉ក

2015-11-24 15:58:02
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសវ័យ៣៦ឆ្នាំ សញ្ជាតិអាមេរិកម្នាក់ ដែលរងរបួសជើងអំឡុងពេលខ្មាន់កាំភ្លើងបាញ់ប្រហារនៅទីក្រុងប៉ារីស ក៏ធ្លាប់រួចជីវិតពីភេរវកម្មដ៏សាហាវនៅអគារពាណិជ្ជកម្មពិភពលោកភ្លោះនាទីក្រុងញីវយ៉ក សហរដ្ឋអាមេរិក កាលពីថ្ងៃទី១១ ខែកញ្ញា ឆ្នាំ២០០១ផងដែរ។

Matthew គឺជាបុរសដែលមានជីវិតថ្លៃ ដែលអាចគេចខ្លួនផុតជាលើកទី២ពីភេរវកម្ម បន្ទាប់ពីពួកខ្មាន់កាំភ្លើង ISIS បាញ់រះនៅរោងមហោស្រព Bataclan ធ្វើឲ្យមានអ្នកស្លាប់ដល់៨៩នាក់ នៅទីក្រុងប៉ារីស កាលពីយប់ថ្ងៃទី១៣ ខែវិច្ឆិកា។ បុរសរូបនេះ បានប្រាប់ឲ្យដឹងថា ពេលឭស្នូរកាំភ្លើង លោកបានរត់រកផ្លូវចេញតែម្ដង តែយ៉ាងណា លោកនៅតែត្រូវ១គ្រាប់ចំជើង។

លោកបាននិយាយប្រាប់ក្រោយពេលរបួសនោះថា៖ "ខ្ញុំបានវារចេញមួយដង១សង់ទីម៉ែត្រ រហូតដល់ចំណុច១ ខ្ញុំបានឃើញច្រកចេញ។ ខ្ញុំបានយកម្រាមដៃរបស់ខ្ញុំទៅតោងច្រកចេញ រហូតចេញបាន”។

បន្ទាប់មកទៀត Matthew បានចេញផុតពីសាល ហើយអស់កម្លាំងក៏សន្លប់នៅចិញ្ចើមផ្លូវ តែសំណាងល្អលោកត្រូវបានអ្នកសារព័ត៌មានបារាំង Le Monde លោក Daniel Psenny ជួយសង្គ្រោះទាន់ពេល ឲ្យចាកឆ្ងាយពីតំបន់កើតហេតុ។

នេះជាលើកទី២ហើយ សម្រាប់ Matthew ដែលអាចរួចជីវិតពីភេរវកម្ម ខណៈដែលកាលពីភេរវកម្មអគារពាណិជ្ជកម្មពិភពលោកអាមេរិក លោកបានធ្វើដំណើរថ្មើរជើងក្បែរ South Tower of the World Trade Center បំណងទៅចូលរួមការប្រជុំនៅទីនោះ តែយន្តហោះរបស់ភេរវកម្មបានហោះបុកអគារ North Tower មុន ធ្វើឲ្យលោករួចជីវិតបាន៕