រឿងរ៉ាវមិនទាន់បញ្ចប់ ក្រុមគ្រួសារ Ahmed Mohamed ទាមទារសំណង១៥លានដុល្លារ

2015-11-27 18:47:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមគ្រួសាររបស់ Ahmed Mohamed បានសម្រេចចិត្តធ្វើការទាមទារនូវប្រាក់សំណង១៥លានដុល្លារពីសមត្ថកិច្ចនៃរដ្ឋតិចសាស រួមជាមួយនឹងការសុំទោសអំពីទង្វើដែលពួកគេបានធ្វើ។

រំលឹកទៅកាលពីខែកញ្ញាកន្លងទៅ កុមារ Mohamed បានធ្វើឲ្យកក្រើករាល់បណ្ដាញសារព៌ត័មានអន្តរជាតិ នៅពេលដែលគេយកនាឡិកាផលិតដោយខ្លួនឯងទៅសាលារៀន ហើយមានអ្នកយល់ច្រឡំថា វាជាគ្រប់បែករហូតដល់មានការហៅសមត្ថកិច្ចឲ្យមកចាប់ខ្លួនកុមាររូបនេះទៀតផង។

បន្ទាប់ពីកើតមានហេតុការណ៍នេះរួច Mohamed ទទួលបានការគាំទ្រយ៉ាងច្រើនពីសំណាក់អ្នកប្រើប្រាស់បណ្ដាញសង្គម រួមទាំងបុគ្គលល្បីៗជាច្រើននាក់ រួមទាំងលោកប្រធានាធិបតី Barack Obama ផងដែរ។

ទោះជាមានការគាំទ្រនិងលើកទឹកចិត្តយ៉ាងខ្លាំងក្លានេះក្ដី មេធាវីតំណាងក្រុមគ្រួសារ Mohamed បានឲ្យដឹងថា កុមារវ័យ១៤ឆ្នាំរូបនេះរងរបួសខាងផ្នែកផ្លូវចិត្តយ៉ាងធ្ងន់ធ្ងរ ហើយគេស្ថិតនៅក្នុងភាពភ័យខ្លាចជារៀងរហូតក្នុងសហគមន៍រស់នៅរបស់គេ។

លោកមេធាវី Kelly Hollingsworth បានលើកឡើងទៀតថា ផលប៉ះពាល់នេះគឺបណ្ដាលមកពីវិធីដែលគេបានប្រើដើម្បីដោះស្រាយរឿងក្ដីនេះឯង។ មេធាវីរូបនេះបន្តទៀតថា រឿងក្ដីនេះនឹងធ្វើឲ្យ Mohamed ត្រូវរស់នៅជាមួយពាក្យថាគ្រាប់បែកជារៀងរហូត និងត្រូវរងការសើចចំអកពីមនុស្សជាច្រើន។

ប្រសិនបើមន្ត្រីមានសមត្ថកិច្ចដែលបានពាក់ព័ន្ធក្នុងរឿងក្ដីនេះមិនព្រមធ្វើតាមការទាមទារ សម្រាប់ការសុំទោស និងផ្ដល់សំណងជាទឹកប្រាក់ក្នុងរយៈពេល៦០ថ្ងៃទេនោះ គេនឹងធ្វើការដាក់ពាក្យបណ្ដឹងទៅតុលាការ៕

ចុចអាន៖ មហាសេដ្ឋីវ័យក្មេង Mark Zuckerberg សូមផ្អាកពី Facebook ពីរខែដើម្បីមើលថែកូន