បុគ្គលបច្ចេកវិទ្យាល្បីៗបីរូបប្រាប់ពីទម្លាប់ពេលទំនេរ

2015-12-01 17:33:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ទម្លាប់ជាកត្តាកំណត់លទ្ធផលដ៏អស្ចារ្យមួយក្នុងជីវិត របស់បុគ្គលជោគជ័យទាំងឡាយ ជាពិសេសបុគ្គលបច្ចេកវិទ្យាដែលតម្រូវឲ្យមានការអត់ធ្មត់ ព្យាយាម និងមានកាលវិភាគប្រចាំថ្ងៃរបស់ខ្លួនច្បាស់លាស់ ដើម្បីសម្រេចនូវអ្វីមួយដែលចង់បាន។ បុគ្គលល្បីៗក្នុងស្រុកបីរូបបានប្រាប់ Sabay ពីទម្លាប់ពេលទំនេររបស់ពួកគាត់ និងពន្យល់ថា តើវាមានឥទ្ធិពលបែបណាដល់លទ្ធផលដែលគាត់ខំប្រឹងប្រែង?

អឹចឹង! តោះទៅសិក្សាពីពួកគាត់ទាំងអស់គ្នា៖

@ លោក អៀ អ៊ុយ ស្ថាបនិកហ្គេម Asva The Monkey

ស្ថាបនិកហ្គេមខ្មែរដែលល្បីដល់ជប៉ុនរូបនេះបាននិយាយថា លោកមានពេលទំនេរតែថ្ងៃអាទិត្យទេ ហើយពេលទំនេរនេះលោកត្រូវទៅ Toast Masters Club (Publish Speaking Club) ជាក្លឹបដែលត្រូវប្រជុំគ្នារៀងរាល់អាទិត្យដើម្បីប្រកួតប្រជែងការឡើងនិយាយជាសាធារណៈ ហើយយូរៗម្តង លោកទៅមើលកុននៅរោងភាពយន្តដើម្បីជាការកម្សាន្តបន្ទាប់ពីសម្រាកពីការងារ។ លោកបានបន្ថែមថា លោកចូលចិត្តលេងហ្គេមណាស់ ហើយក៏ជាទម្លាប់នៅពេលទំនេរដែរ។

@ លោក គ្រុយ វណ្ណា ស្ថាបនិកក្ដារចុចឆ្លាតវៃ

ស្ថាបនិកក្ដារចុចឆ្លាតវៃដែលបានបញ្ចប់ការសិក្សាមកពីប្រទេសជប៉ុនរូបនេះបានប្រាប់ថា លោកចូលចិត្តហែលទឹក មើលកុន និងទៅញ៉ាំអីជាមួយមិត្តភក្តិនៅចុងសប្ដាហ៍ ហើយឆ្លៀតពេលស្រាវជ្រាវបន្ថែមដូចជានៅ Chatime ជាដើម។

លោកបានបន្ថែមថា "ការស្រាវជាវគ្មានដែនកំណត់ទេ" អឹចឹងនៅកន្លែងណាក៏រៀនបានដែរ ទើបជាហេតុធ្វើឲ្យលោក ស្ទើរតែគ្មានទំនេរសោះ ទោះជានៅកន្លែងធ្វើការក៏ត្រូវបន្ថែមម៉ោងដែរ ព្រោះលោកចូលចិត្តអ្វីដែលថ្មីៗ។

@ លោក ដាញ់ ហុង ស្ថាបនិកខ្មែរយូនីកូដ

ស្ថាបនិកខ្មែរយូនីកូដដែលធ្វើឲ្យអក្សរខ្មែរមានការពេញនិយមប្រើប្រាស់ទូទាំងប្រទេសរូបនេះ បានរៀបរាប់ថា ចំណូលចិត្តរបស់លោកពេលទំនេរគឺមើលទេសភាពដែលស្អាតៗ ព្រោះវាធ្វើឲ្យអារម្មណ៍ស្រស់ស្រាយ និងបង្កើតគំនិតច្នៃប្រឌិត។

លោកលើកឡើងថា ពេលទំនេរខ្ញុំមិនភ្លេចទេ ការស្វែងរកអ្វីដែលថ្មីៗ ព្រោះជាចំណូលចិត្តរបស់ខ្ញុំ ហើយក៏សំណូមពរដល់យុវវ័យ គួរយកពេលទំនេរអានសៀវភៅយ៉ាងតិចណាស់ក៏ ៥ ទៅ ១០ នាទីដែរ និងធ្វើអ្វីមួយតាមទេពកោសល្យរបស់ខ្លួន ជាជាងយកពេលទំនេរ ទៅប្រើប្រាស់គ្រឿងញៀន និងបង្កអសន្តិសុខដល់សង្គម។

តើពេលទំនេរប្រិយមិត្តចូលចិត្តអ្វីដែរ?