ជនអនាមិក៖ ហ្សូរីដា គួរតែត្រូវបានការលើកទឹកចិត្តច្រើនជាង
- 2015-12-01 22:11:31
- ចំនួនមតិ 0 | ចំនួនចែករំលែក 0
ជនអនាមិក៖ ហ្សូរីដា គួរតែត្រូវបានការលើកទឹកចិត្តច្រើនជាង
ចន្លោះមិនឃើញ
ជនអនាមិកម្នាក់ បានទូរសព្ទមកកាន់គេហទំព័រ Sabay ឈឺឆ្អាលចំពោះករណីរបស់ ដួង ហ្សូរីដា ដែលថ្មីៗនេះទទួលបានការរិះគន់ខ្លាំងពីប្រិយមិត្តលើបណ្ដាញសង្គមជុំវិញការងារជាពិធីការិនីរបស់នាងក្នុងកម្មវិធី "ពានរង្វាន់តារាឯកសាំងហ្គាពួរ"។
បុរសដែលពុំព្រមប្រាប់ឈ្មោះម្នាក់ ថ្លែងមកកាន់ Sabay ថា "ខ្ញុំឃើញគេរិះគន់នាង តែសម្រាប់ខ្ញុំ នាងគួរតែត្រូវបានលើកទឹកចិត្តច្រើនជាង ព្រោះនាងអត់មានបានធ្វើខុសដាក់នរណាទេ ល្អមិនល្អជាការងាររបស់នាងតើ ហើយម្នាក់ៗ ឃើញតែទៅរិះគន់នាងទៅវិញ ខ្ញុំគិតថាដូចជាមិនសមហេតុផលទាល់តែសោះ!”។
ដួង ហ្សូរីដា ទទួលបានការរិះគន់ ជុំវិញការប្រើប្រាស់ភាសាអង់គ្លេសថ្មីៗនេះក្នុងកម្មវិធី "ពានរង្វាន់តារាឯកសាំងហ្គាពួរ" រៀបចំដោយស្ថានីយទូរទស្សន៍ខ្សែកាប PPCTV ដែលនាងកាន់នាទីជាពិធីការិនី រួមជាមួយតារាប្រុសស្រី៤រូបទៀតមាន ញ៉ែម សុគន្ធ ប៉ែន ចំរុង អេឡិច ច័ន្ទត្រា និង ម៉ាឡែន។ ក្រោយចប់កម្មវិធីថ្ងៃនោះ ហ្សូរីដា ទទួលបានការរិះគន់ជាហូរហែ ជុំវិញការប្រើប្រាស់ភាសាអង់គ្លេស មិនបានល្អ និងការបញ្ចេញសំឡេងជាដើម។
ជុំវិញករណីដដែល ជនដែលមិនព្រមបញ្ចេញអត្តសញ្ញាណ និងមិនដឹងថា ត្រូវជាអ្វីនឹងប្រធានក្រុម Cambodia Super Model រូបនេះ ថ្លែងទៀតថា ហ្សូរីដា គឺគួរឲ្យអាណិត។ "ខ្ញុំនៅតែនិយាយដដែល នាងគួរទទួលបានការលើកទឹកចិត្ត និងរឹតតែគួរអោយអាណិតទៀត ជានារីខ្មែរម្នាក់ ធ្វើបានប៉ុណ្ណឹងសរសើរនាងទៅ ព្រោះល្អមិនល្អ តែនាងបានកែប្រែស្ថានការណ៍មិនឲ្យកាន់តែអាក្រក់ជាងនេះទៀត"។
លោក បន្តទៀតថា "ដូចនាងបានប្រាប់ហើយថា អត់បានដឹងមុនកាលៈទេសៈត្រូវប្រើប្រាស់ភាសាអង់គ្លេសនោះទេ ព្រោះក្រុមការងារមិនបានប្រាប់មុន តែដល់ពេលទ័លច្រក នាងត្រូវគេរុញឲ្យទៅសម្រួលស្ថានការណ៍ភ្លាមៗ អីចឹងស្រមៃមើល បើយើងខ្លួនឯងវិញអាចធ្វើបានប្រហែលនាងទេ ហើយនាងក៏បានទទួលហើយថា នាងមិនល្អគ្រប់ដប់នោះទេ អីចឹងសម្រាប់ខ្ញុំ នាងគឺគួរឲ្យអាណិតជាង...!”។
មិនត្រឹមជនអាថ៌កំបាំងទេ ប៉ុន្តែអ្នកនាង ចន ច័ន្ទលក្ខិណា ដែលជាមិត្តរួមអាជីពមានទំនាក់ទំនងជិតស្និទ្ធនឹង ហ្សូរីដា ក៏ផ្ញើសារលើកទឹកចិត្តនាងដែរ ដោយស្នើកុំនាងបាក់ទឹកចិត្តចំពោះរឿងដែលកើតឡើង។
វិលមកសាមីខ្លួន ដួង ហ្សូរីដា វិញបើទោះ ត្រូវគេរិះគន់ដូច្នេះ ប៉ុន្តែនាងរក្សាឥរិយាបថមិនតបត។ នៅលើ Facebook របស់ខ្លួន នាងសរសេរថា នោះគ្រាន់តែចេតនារបស់មនុស្ស៣-៤នាក់ដែលស្អប់នាង ហើយបង្កើតគណនីក្លែងក្លាយមកវាយប្រហារមានចេតនា ធ្វើឲ្យប៉ះពាល់ដល់អាជីពរបស់នាងប៉ុណ្ណោះ។
ដូច្នេះ គ្មានហេតុផលអ្វីនាងត្រូវតបត ព្រោះនាងជាមនុស្សរបស់មហាជន រមែងមានអ្នកស្អប់ អ្នកស្រឡាញ់។ នាងបន្តថា មិនត្រឹមតែមិនបាក់ទឹកចិត្ត ប៉ុន្តែផ្ទុយទៅវិញនាងថា អ្វីដែលកើតឡើងនេះ កាន់តែក្រើនរំលឹកនាងឲ្យកាន់តែខិតខំថែមទៀត៕
ប្រភពទម្លាយមូលហេតុ ម៉ៅ ហាជី ចុះកុងត្រាជាមួយផលិតកម្មថោន សៅ ឧត្តម ទម្លាយរឿងមិនចូលច្រៀងក្នុងផលិតកម្ម
អត្ថបទ៖ ទារិកា