សៅ ឧត្តម ទម្លាយរឿងមិនចូលច្រៀងក្នុងផលិតកម្ម

2015-11-30 17:43:45
ចំនួនមតិ 0 | ចំនួនចែករំលែក 0

ចន្លោះមិនឃើញ

សៅ ឧត្តម បានថ្លែងមកកាន់ Sabay ក្នុងកម្មវិធីបើកបវេសនកាលសកលវិទ្យាល័យភូមិន្ទភ្នំពេញកាលពីម្សិលមិញថា មានផលិតកម្មជាច្រើនទាក់ទងលោកទៅច្រៀង ប៉ុន្តែដោយសារជាប់កុងត្រាជាមួយកម្មវិធី Cambodian Idol រហូតដល់ខែធ្នូ ឆ្នាំ២០១៦ទើបមិនទាន់គិតគូរជាមួយបណ្ដាផលិតកម្មផ្សេងទៀត។

ឧត្តមថ្លែងថា “មានផលិតកម្មច្រើនគួរសមដែរបានទាក់ទងបង ប៉ុន្តែបងមិនអាចទាន់ទៅច្រៀងឲ្យគេបានទេ ណាមួយបងនៅជាប់កុងត្រាជាមួយកម្មវិធី Cambodian Idol រហូតដល់ខែធ្នូ ២០១៦ទើបផុត"។

ទន្ទឹមនឹងរឿងជាប់កុងត្រាផងនោះជាមួយកម្មវិធីខាងលើ បេក្ខជនមកពីខេត្តស្វាយរៀងរូបនេះប្រាប់ថា លោកក៏ចង់ទុកពេលវេលាសម្រាកមួយរយៈសិនដែរ ដោយក្នុងរយៈពេលនេះទទួលតែកម្មវិធីប្រគំតន្ត្រី ឬកម្មវិធីសប្បុរសធម៌នានាមួយចំនួនប៉ុណ្ណោះ។

បើទោះបង្ហើបថា មានផលិតកម្មជាច្រើនទាក់ទង ប៉ុន្តែមិនទៅ ដោយសារជាប់កុងត្រាជាមួយហង្សមាស ប៉ុន្តែ ឧត្តម មិនព្រមអធិប្បាយលម្អិតថាតើ លោករៀបចំអនាគតយ៉ាងជាមួយផលិតនេះ ឬក៏ថា ផលិតកម្មផ្ដល់លក្ខខណ្ឌបែបណាដល់លោកនោះឡើយ។ តារាចម្រៀងវ័យ ២៩ឆ្នាំរូបនេះ បញ្ជាក់ថា មិនទាន់អាចបកស្រាយបានទេ ព្រោះជារឿងផ្ទៃក្នុងលោក និងក្រុមហ៊ុន។

ជាមួយឆន្ទៈចង់ទុកពេលវេលា សម្រាកមួយរយៈសិន សៅ ឧត្តម ប្រាប់ទៀតថា លោកក៏មិនទាន់មានច្រៀងនៅតាមភោជនីយដ្ឋាន ឬទីកន្លែងណាមួយដែរ៕

អត្ថបទ៖ ថា ម៉ាលីដា