តារា Youtube ល្បី ត្រូវគេជេរផ្អើល ដោយសារវីដេអូ Prank 'សម្លាប់មិត្តភក្តិ'

2015-12-02 14:59:39
ចំនួនមតិ 0 | ចំនួនចែករំលែក 0

ចន្លោះមិនឃើញ

តារា Youtube វ័យក្មេងល្បីឈ្មោះដែលធ្លាប់តែត្រូវបានគេសរសើរថាមានគំនិតធ្វើវីដេអូប្លែកៗនោះ ត្រូវបានគេរិះគន់ និងការដៀលត្មះហួសពីការរំពឹងទុក ក្រោយធ្វើវីដេអូលេងសើច ឬ Prank បែបរន្ធត់ ពោលគឺក្មេងប្រុសម្នាក់នៅមុខមិត្តភក្ដិរបស់គេដែលស្រែកយំស្ទើរគាំង។

អ្នកដែលបានមើលវីដេអូនេះលើ Youtube ជាច្រើននាក់ បានបញ្ចេញកំហឹង និងហៅវីដេអូនៃការសម្លាប់នេះថាជារឿងថោកទាប និងគួរឲ្យអាម៉ាស់នៅលើសហគមន៍ Youtube។

វីដេអូនេះចាប់ផ្ដើមដំបូងដោយអ្នករៀបចំគម្រោងផ្ទាល់គឺ Colby Brock អាយុ១៨ឆ្នាំ និងយុវជនរងគ្រោះឈ្មោះ Sam Golbach អាយុ ១៩ឆ្នាំ។ គេទាំង២បានជិះក្នុងរថយន្តតូចជាមួយគ្នា រួច Colby បានឈប់កន្លែងស្ងាត់មួយដើម្បីចុះពិនិត្យរថយន្ត ពេលនោះមានជនទីបីរត់ពីក្រោយយកមួកខ្មៅទៅគ្របមុខយុវជន Sam ជិត។ បន្ទាប់មកជនទីបី រួមនឹង Colby បានចងជើង បិតបង់ខ្មៅលើមាត់ Sam រួចយកទៅដាក់គូទរថយន្ត បើកទៅកាន់ផ្ទះស្ងាត់មួយកន្លែង។

Sam Golbach ត្រូវគេដាក់ឲ្យអង្គុយលើកៅអីដោយចងខ្លួនជាប់ តែបានដកមួក និងបង់ស្អិតខ្មៅចេញពីមាត់ ចំណែក Colby ត្រូវឈរលុតជង្គង់ព័ទ្ធដៃទៅក្រោយ មួកគ្របក្បាលជិត។ ដោយមិននិយាយហេតុផលវែងឆ្ងាយជនទីបីគ្របមុខ សល់ប្រឡង់ភ្នែក បានយកកាំភ្លើងជ័របាញ់ក្បាលរបស់ Colby ដែលជាមិត្តល្អរបស់ Sam តាមបែបក្រុមភេរវករ ISIS សម្លាប់អ្នកទោស ធ្វើឲ្យ Colby ដេកដួលភ្លាមៗ។

ក្រោយឃើញហេតុការណ៍បាញ់សម្លាប់មិត្តរបស់ខ្លួនស្រស់ៗផ្ទាល់ភ្នែក Golbach បានស្រែកយំមែនទែន រហូតស្លេកមុខ ស្លេកមាត់ ទើបលោក Colby ក្រោកពីស្លាប់មកលួងថាជាវីដេអូលេងសើចប៉ុណ្ណោះ។

យ៉ាងណាក្ដី ជនទីបីក្នុងវីដេអូ គឺលោក Sam Pepper ដែលជាអ្នកបង្ហោះវីដេអូនេះ បាននិយាយថាលោកមិនគិតថាមានអ្នកស្អប់លោកច្រើនទេព្រោះលើ Youtube Channel របស់លោកមានអ្នកគាំទ្រជាង ២លាននាក់ និង Twitter មានជាង ១លាននាក់ផងដែរ។ បើងាកទៅមើលប្រភពដើមវីដេអូវិញ គេឃើញអ្នកចូលចិត្ត (Like) ជាង ២ម៉ឺននាក់ តែអ្នកមិនចូលចិត្ត (Dislike) ដល់ទៅជាង ២៤ម៉ឺននាក់ឯណោះ ខណៈវីដេអូមានអ្នកចូលមើល ៣លានដង៕

សម្រាប់ប្រិយមិត្តវិញ គិតថាសាច់រឿង Prank ដែលរៀបចំដោយ Sam Pepper និង Colby Brock ដើម្បីបន្លាច Sam Golbach នេះ គឺជារឿងជ្រុលហួសហេតុដូចការរិះគន់ជាច្រើនដែរឬទេ?

ចុចអាន៖ បង្កើតរូបខ្មោចដូចបេះបិទបន្លាចសង្សារ ធ្វើឲ្យនាងភ័យស្ទើរលស់ព្រលឹង

ប្រែសម្រួល៖ឡេង ភារុណ ប្រភព៖ metro