តារា​សម្ដែងចិន​​ល្បី​ឈ្មោះ​ ​Fan Bing Bing ​បាន​អៀន​ឡើង​ក្រហម​មុខ នៅ​ពេលមិត្ត​ប្រុស​និយាយ​រឿង​សម្ងាត់​របស់​ពួក​គេ​ត្រង់​ៗ​ពេក​នៅ​លើ​ទូរទស្សន៍។

កាល​ពី​ថ្ងៃ​ទី២ ខែ​ធ្នូ កម្មវិធី​ជជែក​កម្សាន្ត​ដ៏​ពេញ​និយម​របស់​តៃវ៉ាន់ "Kangxi Lai Le” បាន​ថត​ភាគ​បញ្ចប់​របស់​ខ្លួន​ជាមួយ​នឹង​ភ្ញៀវ​កិត្តិយស​ចូល​រួម​នោះ​គឺ គូ​ស្នេហ៍​ល្បី​ឈ្មោះ​របស់​វិស័យ​សិល្បៈ​ចិន Li Chen និង Fan Bing Bing។

អ្នក​ដែល​បាន​ទស្សនា​ផ្ទាល់​នៅ​ទី​នោះ​បាន​បង្ហើប​ថា ដោយ​សារ​តែ​ចរិក​មិន​ចេះ​ខ្មាស​អៀន​របស់​ខ្លួន ពិធី​ករ​​កម្មវិធីដែល​ជា​ប្អូន​ស្រី​​តារា​សម្ដែង​​សាន់ឆាយ នាង Dee Hsu បាន​សួរ​ភ្ញៀវ​កិត្តិយស​នូវ​សំនួរ​ដែល​ធ្វើ​ឲ្យ​ពួក​គេ​អៀន​ឡើង​ក្រហម​មុខ។ Li Chen ត្រូវ​បាន Dee Hsu សួរ​ពី​រឿង​លើ​គ្រែ។ តារា​សម្ដែង​នេះ​ មិន​ខ្មាស​អៀន​ក៏​ឆ្លើយ​តាម​ត្រង់​ ធ្វើ​ឲ្យ​មិត្ត​ស្រី​អង្គុយ​នៅ​ក្បែរ​ដាស់​តឿន​ថា "បង​មិន​ចាំ​បាច់​ត្រូវ​ឆ្លើយ​ត្រង់​ដល់​ថ្នាក់​ហ្នឹង​ទេ"។

ពិធី​ករ​កម្មវិធី​បាន​សួរ Li Chen “តើ​លើក​ចុង​ក្រោយ​អ្នក​ទាំង​ពីរ 'ស្និទ្ធស្នាល' គ្នា​គឺ​នៅ​ពេល​ណា"? Li Chen បាន​ឆ្លើយ​តាម​ត្រង់​ថា "ថ្ងៃ​ទី​មួយ​បន្ទាប់​ពី​ខ្ញុំ​ត្រលប់​មក​ពី​អូស្ត្រាលី​វិញ​" (Li Chen ទៅ​អូស្ត្រាលី​ដើម្បី​ថត​កម្មវិធី “Running Man”)។ Dee hsu មិន​បញ្ឈប់​ត្រឹម​ហ្នឹង​ហើយ​ជីក​សួរ​ទៀត​ថា "លោក​កំពុង​រង​របួស​នៅ​ដៃ ហើយ​ធ្វើ​យ៉ាង​ម៉េច​ទៅ"? តារា​សម្ដែង​នេះ​បាន​តប​ថា "អាច​ប្រើ​ដៃ​ម្ខាង​ទៀត​ជួយ​បាន"។

ការ​ឆ្លើយ​តាម​ត្រង់​របស់ Li Chen បាន​ធ្វើ​ឲ្យ​មិត្ត​ស្រី​អៀន​ឡើង​ក្រហម​មុខ ហើយ​បាន​និយាយ​ខ្សឹប​ៗ​ថា "ការ​ពិត​បង​ឯង​ឆ្លើយ​លំអិត​លំអៀង​បន្តិច​​ក៏​បាន​ដែរ មិន​ចាំ​បាច់​ឆ្លើយ​ត្រង់​ដល់​ថ្នាក់​នោះ​ទេ"។ "Kangxi Lai Le” គឺ​ជា​កម្មវិធី​ទូរទស្សន៍​ដ៏​ល្បី​ឈ្មោះ​របស់​តៃវ៉ាន់​ដែល​ត្រូវ​បាន​ផលិត​ឡើង​តាំង​ពី​ឆ្នាំ ២០០៤ មក​ម្ល៉េះ។ Chungta Production បាន​សម្រេច​ចិត្ត​បញ្ឈប់​កម្មវិធី​នេះ​ក្រោយ​ពេល​ចាក់​ផ្សាយ​បាន​រយៈ​ពេល ១១ ឆ្នាំ៕

ចុចអាន៖ចៀវៃ បដិសេធ​មិន​ព្រម​ធ្វើ​អ្នក​កំដរ​ឲ្យ Fan BingBing

ប្រែសម្រួល៖ សុវណ្ណផៃ ប្រភព៖kenh14