អ៊ុន សិទ្ធា ហូរឈាមស្រោចខ្លួនពេលថតរឿង "វិញ្ញាណលោកម្ចាស់គ្រញូង"

2014-10-20 22:44:52
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អ៊ុន សិទ្ធា បានរងរបួសហូរឈាមស្រោចខ្លួន ក្រោយត្រូវរបួសដោយគ្រាប់ព្រួញរបស់តួសម្ដែងជាមួយគ្នា ក្នុងរឿង "វិញ្ញាណលោកម្ចាស់គ្រញូង"។ នេះបើតាមសាមីខ្លួន។

លោក សិទ្ធា ប្រាប់ថា ហេតុការណ៍នោះ បានកើតឡើងក្នុងឈុតមួយដែលលោកម្ចាស់គ្រញូងដែលសម្ដែងដោយលោក ត្រូវប្រយុទ្ធតតាំងជាមួយនឹងអ្នកស្រុកដើម្បីការពារខ្លួន។ ដោយសារខ្វះការប្រុងប្រយ័ត្នពីដៃគូសម្ដែង បានធ្វើឲ្យតួឯកប្រុសរូបនេះត្រូវរបួសគួរសមនៅលើស្លាបប្រចៀវខាងឆ្វេងបណ្ដាលឲ្យហូរឈាមយ៉ាងខ្លាំង។

“តាមបច្ចេកទេសឥឡូវ គេគ្រាន់តែធ្វើជាបាញ់រួចកាត់ប្លង់គឺបានហើយ តែនេះគាត់បាញ់មែនទែន ខ្ញុំបានស្ដីឲ្យគាត់ថា ម៉េចធ្វើអីចឹង តែគាត់ថា គាត់បាញ់បង្ខុសទេ ឯអ្នកឈរមើលក៏ថាអីចឹងដែរ ប៉ុន្តែមិនដឹងម៉េច បែរជាត្រូវមែនទែន!"។

តារាប្រុសរូបនេះ បានប្រាប់ទៀតថា លោកធ្លាប់រងរបួសក្នុងពេលសម្ដែងជាញឹកញយ ប៉ុន្តែលើកនេះ រាងធ្ងន់ជាងមុនៗបន្តិច។ លោក បន្តថា លោកបានទន់ជង្គង់ភ្លាមៗ ក្រោយឃើញមានឈាមច្រើនលើដងខ្លួន។

ក្រោយពីជាសះ បានសល់ស្នាមដុំសាច់លើស្មារបស់ខ្លួនមកដល់សព្វថ្ងៃ ដែលចំណុចនេះ លោក សិទ្ធា យល់ថាជាស្នាមអនុស្សាវរីយ៍មួយក្នុងអាជីពជាតារាសម្ដែងជាច្រើនឆ្នាំមកនេះ ពិសេសរឿង "វិញ្ញាណលោកម្ចាស់គ្រញូង" ដែលនិយាយអំពីដួងព្រលឹងនៃព្រៃប្រឹក្សាដំបូងគេនេះ។

តាមទំនៀមរបស់ខ្មែរ ការសាងសង់ផ្ទះ ឬថតភាពយន្តក៏ដោយ គេរមែងរៀបចំពិធីក្រុងពាលី ដើម្បីសុំសេចក្ដីសុខពីម្ចាស់ទឹកម្ចាស់ដី។ លុះមុនពេលថតឈុតគ្រោះថ្នាក់ ហោចណាស់ក៏ត្រូវអុជធូបសុំសេចក្ដីសុខទៀតដែរ។ ឆកល្វែងលើបញ្ហានេះ គឺជាហេតុផលមួយដែលនាំឲ្យលោក អ៊ុន សិទ្ធា ត្រូវរបួស។

លោក អ៊ុន សិទ្ធា និងកញ្ញា តូតា ឈុតក្នុងរឿង "វិញ្ញាណលោកម្ចាស់គ្រញូង"

លោក អ៊ុន សិទ្ធា ថ្លែងថា "មុនចាប់ផ្ដើមឈុតនេះ អ៊ុំស្រីដែលជាតុបតែងឲ្យតួសម្ដែង បានប្រាប់ខ្ញុំដែរ ឲ្យអុជធូប ប៉ុន្តែខ្ញុំអត់ព្រមអុជ ចុងក្រោយក៏ជួបហេតុការណ៍ខាងលើនោះតែម្ដង"។

យ៉ាងណា លោក សិទ្ធា ប្រាប់ថា ក្រោយៗមក លោកតែងតែងអុជធូបសុំសេចក្ដីសុខរហូត ព្រោះខ្លាចមានជួបហេតុការណ៍គ្រោះថ្នាក់នេះទៀត"។

“វិញ្ញាណលោកម្ចាស់គ្រញូង" ជាខ្សែភាពយន្តរឿងខ្មោចទី១របស់អ្នកស្រី ពាន់ ភួងបុប្ផា និងជាភាពយន្តខ្មែរដំបូងដែលនិយាយពីការបាក់បែកព្រាត់ប្រាសក្នុងអំបូរឈើគ្រញូង ដោយស្នាដៃមនុស្ស។ ភាពយន្តខ្នាតធំនេះ ត្រៀមនឹងចាក់ផ្សាយជូនប្រិយមិត្តបានទស្សនានៅថ្ងៃទី ២៣ តុលា ២០១៤ខាងមុខនេះ នៅរោងភាពយន្តលំដាប់អន្តរជាតិ Major Cineplex By Cellcard៕

អត្ថបទពាក់ព័ន្ធនឹងជុំវិញសិល្បៈជាតិ សូមចុចទីនេះ…!!!

អត្ថបទពាក់ព័ន្ធនឹងបញ្ហាតារាជាតិ សូមចុចទីនេះ…!!!

អត្ថបទ៖ ទារិកា