Louis van Gaal បាន​លើក​ឡើង​ថា លោក​គឺ​ជា​បុរស​ម្នាក់ ដែល​នឹង​ដឹក​នាំ​​ឲ្យ​ក្រុម​ Manchester United លើក​ពាន​​រង្វាន់​បាន​ ហើយ​លោក​បញ្ជាក់​ថា​​ក្លិប​​ដូច​ជា Man Utd ​ត្រូវ​តែ​​​ឈ្នះ​ពាន​រង្វាន់​អឺរ៉ុប​ UEFA Europa League រដូវ​កាល​នេះ។

​បន្ទាប់​ពី​ចាញ់​ Wolfsburg ៣-២ កាល​ពី​ថ្ងៃ​ពុធ​ ​ក្រុម​ជើង​ឯក​ពាន​រង្វាន់​កំពូល​អឺរ៉ុប​៣សម័យ​កាល​ Man Utd បាន​ធ្លាក់​ចេញ​ពី​ UEFA Champions League ហើយ ​តែ​​អាច​​ទៅ​លេង​នៅ​​ពាន​រង្វាន់​អឺរ៉ុប​លំដាប់​ទី​២​ UEFA Europa League នៅ​វគ្គ​ខ្វែង​៣២​ក្រុម។

នៅ​ពេល​អ្នកសារព័ត៌មាន​សួរ​​ថា ​តើ​លោក​រីករាយ​ទេ បើ​គ្រាន់​តែ​ឈ្នះ​ពាន​ Europa League ​រដូវ​កាល​នេះ? អ្នក​ចាត់ការ​សញ្ជាតិ​ហូឡង់​ Van Gaal បាន​ឆ្លើយ​តប​ថា៖ "គ្រាន់តែ? អ្នក​គិត​ថា​វា​គ្រាន់​តែ? ខ្ញុំ​មិន​គិត​ដូច្នោះ​ទេ។ ខ្ញុំ​ធ្លាប់​ឈ្នះ​ Europa League ​ជាមួយ​ក្រុម​ Ajax ​រដូវ​កាល​ដំបូង​របស់​ខ្ញុំ​រួច​ហើយ ហើយ​ខ្ញុំ​ពិត​ជា​រំភើប​​ខ្លាំង​ណាស់។ សម្រាប់​ខ្ញុំ​ Europa League គឺ​ជា​កម្មវិធី​ប្រកួត​ប្រជែង​មួយ​ដ៏​ធំ”។

“ឥឡូវ​យើង​​នឹង​លេង​នៅ​ Europa League ​ដូច្នេះ​យើង​ត្រូវ​តែ​ឈ្នះ​វា។ នោះ​មិន​មែន​ជា​រឿង​ងាយ​ស្រួល​ទេ ខ្ញុំ​​ហ៊ាន​និយាយ​យ៉ាង​ដូច្នោះ ប៉ុន្តែ​ប្រហែល​គ្មាន​នរណា​ស្ដាប់​ខ្ញុំ​ទេ។ ពួកគេ​មិន​ស្ដាប់​ខ្ញុំ ព្រោះ​ថា​ក្លិប​ដូច​ជា​ Man Utd ត្រូវ​តែ​ឈ្នះ​វា (Europa League)”។ អ្នកចាត់ការ​វ័យ​៦៤​ឆ្នាំ បាន​បញ្ជាក់​បន្ថែម៕

-ចុចអាន៖ Man Utd រិះគន់​បន្ទប់​ផ្លាស់​សំលៀកបំពាក់​​​ក្រុម​ Wolfsburg ​ថា​ក្ដៅ​ពេក

​ប្រែ​សម្រួល៖ វិន ជីវ័ន្ត ប្រភព៖ skysports