អេនឌី ស្នើការគាំទ្រជាថ្មី ក្រោយប្រកាសចូលសម្ដែងវិញ

2014-10-21 15:48:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ អែនឌី អំពាវនាវឲ្យទស្សនិកជនបន្តការគាំទ្រដូចមុន ក្រោយប្រឡូកក្នុងការសម្ដែងឡើងវិញ និង ចេញមុខតាមរយៈ MV ចម្រៀងចំនួន ៥ បទរបស់ផលិតកម្មសាន់ដេ ជាមួយតារាចម្រៀង អ៊ីវ៉ា។

បុរសរហស្សនាមស្បែកស្អាតរូបនេះ បានចាកចេញពីការសម្ដែង ៦ ឆ្នាំ កន្លងមកហើយ ដោយមានមូលហេតុផ្ទាល់ខ្លួន ធ្វើឲ្យអ្នកគាំទ្រ និង មិត្តរួមអាជីពសិល្បៈ បានឃើញមុខម្ដងម្កាល លើទំព័រទស្សនាវដ្ដីនានាប៉ុណ្ណោះ ក្នុងឈុតបែបសិចស៊ីជាមួយតារាស្រីមួយចំនួន។ ទោះបីជាយ៉ាងណា វត្តមានរបស់គេ តែងធ្វើឲ្យតារាស្រីទាំងនោះមានកេរ្តិ៍ឈ្មោះល្បី និង មានទីផ្សារសិល្បៈហូរហែ។

បុរសសង្ហាសាច់សខាងលើ ប្រកាសជាសាធារណៈតាមរយៈ Sabay ថា នឹងឈានជើងចូលឲ្យជ្រៅក្នុងការងារសិល្បៈឡើងវិញ ព្រមទាំងចាប់ផ្ដើមទទួលរាល់ការហៅទៅសម្ដែងទាំងអស់ ប្រសិនបើមានផលិតកម្មណាចាប់អារម្មណ៍ និង ចរចាត្រូវរ៉ូវគ្នា។ តារាខាងលើអះអាងថា ខិតខំព្យាយាមឲ្យបានកាន់តែខ្លាំងជាងមុនទៅទៀត ខណៈតារាថ្មីកំពុងដុះដាលដូចផ្សិត។

សាមីខ្លួនដដែលអះអាងថា ការចាប់ផ្ដើមជាថ្មីមួយរយៈចុងក្រោយក្នុងការសម្ដែង គ្រាន់តែចង់ផ្ដោតសំខាន់លើការសម្ដែងប៉ុណ្ណោះ ខណៈវិស័យចម្រៀងស្ថិតនៅក្នុងការពិចារណា និង ស្រពិចស្រពិលនៅឡើយ។ ប៉ុន្តែ អែនឌី អះអាងថា មិនបោះបង់ចោលអាជីពជាក្ដីស្រមៃតាំងពីតូចបានទេ ដោយរង់ចាំអ៊ុតមើលសន្ទុះនៃការគាំទ្រសិន៕

អត្ថបទកម្សាន្ដជាច្រើនទៀត សូមចុចត្រង់នេះ

អត្ថបទ៖ សំ ជំនាញ

រូបថត៖ Facebook អែនឌី