រឿង៦យ៉ាងដែលនារីមិនគួរតាមតែចិត្តបុរសដែលនាងស្រលាញ់
- 2015-12-15 18:45:44
- ចំនួនមតិ 0 | ចំនួនចែករំលែក 0
រឿង៦យ៉ាងដែលនារីមិនគួរតាមតែចិត្តបុរសដែលនាងស្រលាញ់
ចន្លោះមិនឃើញ
នារីៗភាគច្រើនមិនសូវជាងាយដាក់ចិត្តស្រលាញ់មនុស្សប្រុសណាម្នាក់ងាយៗទេ ប៉ុន្តែបើនាងស្រលាញ់ហើយ មានរឿងជាច្រើនដែលនារីៗនឹងហ៊ានធ្វើដើម្បីមនុស្សប្រុសដែលនាងស្រលាញ់បាន។ ប៉ុន្តែករណីមួយចំនួន នាងមិនគួរធ្វើតាមតែចិត្តមិត្តប្រុសគ្រប់ពេលនោះឡើយ។
១. កែប្រែទម្លាប់ល្អរបស់ខ្លួនឯង
សកម្មភាពល្អៗដែលមិត្តនារីតែងធ្វើជាចំណែកមួយក្នុងជីវិតរបស់នាងតាំងតែពីដើមរៀងមក។ វាជាទម្លាប់ល្អមួយដែលធ្វើឲ្យជីវិតរបស់នាងមានភាពស្រស់បំព្រង។ នៅពេលមនុស្សប្រុសណាម្នាក់ចង់ផ្លាស់ប្ដូរអត្តចរិតល្អរបស់នាងចេញ គឺមានន័យថារូបគេមិនឲ្យតម្លៃ និងគោរពស្រលាញ់អ្នកដោយចិត្តស្មោះឡើយ។ វាជារឿងសំខាន់មួយដែលមនុស្សស្រីមិនគួរដាក់ចិត្ត ដាក់កាយ លើមនុស្សប្រុសណាដែលមិនចេះឲ្យតម្លៃនាង និងមិនគោរព ការងារ ឬវេលារបស់នាងជាដើម។ ផ្ទុយទៅវិញ មិត្តនារីគួរស្វែងរកមនុស្សប្រុសណាម្នាក់ ដែលជឿជាក់ និងឲ្យតម្លៃលើចរិយាមារយាទនាងផ្ទាល់ ទោះបីវាត្រូវការពេលវេលាយូរ ប៉ុន្តែមនុស្សប្រុសបែបនោះប្រាកដជាមាន។
២. គេចង់ឲ្យអ្នកផ្លាស់ប្ដូររូបរាងខាងក្រៅ
វាជារឿងល្អមួយសម្រាប់មិត្តស្រីចង់តែងខ្លួនឲ្យបានស្អាតបាតសមរម្យដើម្បីមនុស្សប្រុសដែលនាងស្រលាញ់។ វាមិនមែនជាបញ្ហាអ្វីទេ ដោយគ្រាន់តែស៊ីពេលបន្តិច ក្នុងការ ធ្វើសក់ ផាត់មុខ ពេលចេញទៅក្រៅជាមួយមិត្តប្រុស។ ប៉ុន្តែករណីមិត្តប្រុសសុំឬជាការបង្ខំឲ្យអ្នកត្រូវតែស្លៀកពាក់ ឲ្យត្រូវចិត្តគេ កាត់សក់តម្រូវចិត្តគាត់ ឬវះកាត់កែសម្ផស្ស តមអាហារនោះ គឺបង្ហាញថាគាត់មិនសូវជាស្រលាញ់អ្នកស្មោះទេ។ បើមាននរណាម្នាក់ បង្ហាញពីចិត្តគេថាអ្នកស្អាត បើទោះជាអ្នកនៅក្នុងរបៀបបែបណាក៏ដោយ នោះហើយគឺជាស្នេហាពិតសម្រាប់អ្នក។
៣. តមអាហារខ្លួនឯង
ពេលមានស្នេហាមនុស្សស្រីអាចនឹងធ្វើតាមអ្វីដែលជាការចង់បានរបស់មិត្តប្រុស សូម្បីតែរឿងសម្រកទម្ងន់ឲ្យដូចម៉ូដែលក៏នាងហ៊ានព្រម។ ប៉ុន្តែគួរចាំថា អ្នកមិនមែនតារាម៉ូដែលឯណា? អ្នកគឺអ្នក ជាមនុស្សស្រីដែលស្អាតសម្រាប់ខ្លួនអ្នក ដូចនេះអ្នកមិនគួរត្រូវមិនញ៉ាំអាហារព្រឹកល្ងាចឲ្យស្រករាងតាមតែចិត្តគេនឹកឃើញនោះទេ។ ការហាត់ប្រាណ ញ៉ាំគ្រប់គ្រាន់ គេងគ្រប់គ្រាន់ គឺជាការរក្សាទម្ងន់របស់អ្នក បើការស្រលាញ់របស់បុរសម្នាក់ចូលចិត្តអ្នក ដូចទៅនឹងអត្ថន័យនៃបទចម្រៀង "Just The Way You Are" របស់លោក Bruno Mars នោះហើយគឺជាការស្រលាញ់ពិត។
៤. គេចង់ឲ្យអ្នកធ្វើតាមតែចិត្តគេគ្រប់ពេល
បុរសនិងនារី បើទោះជាស្ថិតក្នុងទំនាក់ទំនងស្នេហានឹងគ្នា ប៉ុន្តែពួកគេទាំងពីរគឺមានសិទ្ធស្មើគ្នានិងភាពឯករាជ្យដូចគ្នា។ ជាគូសង្សារអាចមានចិត្តដូចគ្នា និងចេះសម្របសម្រួលតាមគ្នាបានច្រើន ប៉ុន្តែបើខាងបុរសចង់ឲ្យមិត្តនារីម្នាក់ធ្វើតាមតែចិត្តរហូត ទោះបីនាងស្រលាញ់បុរសនោះខ្លាំងយ៉ាងណាក៏ដោយ តែមិនគួរឲ្យគេគ្រប់គ្រងជីវិតរហូត ហើយពាក្យសម្ដីរបស់គាត់មិនមែនជាច្បាប់ដែលតម្រូវឲ្យនាងធ្វើតាមរហូតនោះទេ...ព្រោះម្នាក់ៗគឺមានសិទ្ធស្មើគ្នា។
៥. លាក់ការចេះដឹងរបស់ខ្លួន
ពិតណាស់ នារីមួយចំនួនអាចមានចំណេះដឹងច្រើនជាបុរស មិនថាតែរឿងជួសជុលម៉ូតូ ពេលមេរោគឆ្លងចូលកុំព្យូទ័រ នាងអាចនឹងយល់ដឹងច្រើនជាងមិត្តប្រុសខ្លួន។ ប៉ុន្តែមិត្តនារីទាំងនោះ តែងគិតថា ការធ្វើមិនដឹងមិនយល់ពីអំពីកិច្ចការនោះ អាចជាការទាក់ទាញមួយពីការជួយពីមិត្តប្រុសៗ។ ប៉ុន្តែនោះមិនមែន ទាំងអស់នោះទេ បុរសៗមួយចំនួនគឺចូលចិត្តមនុស្សស្រីដែលរឹងប៉ឹង ចេះសព្វបែបយ៉ាងទៅវិញ ទោះបីមនុស្សប្រុសភាគច្រើនចូលចិត្តក្លាយជាតួអង្គជិះសេះសជួយស្រីស្អាត ប៉ុន្តែគេក៏ពេញចិត្តមនុស្សស្រីមានចំណេះដឹងទូលំទូលាយច្រើនដែរ ដែលជាហេតុឲ្យមនុស្សស្រីមិនគួរលាក់ការចេះដឹងរបស់ខ្លួននោះទេ។
៦. បោះបង់ចោលបំណងប្រាថ្នារបស់ខ្លួន
ពេលមានទំនាក់ទំនងស្នេហាមិនមែនមានន័យថាអ្នកត្រូវបោះបង់ក្ដីស្រមៃរបស់ខ្លួនទៅតាមមនុស្សដែលអ្នកស្រលាញ់នោះទេ។ គេអាចពេញចិត្តគាំទ្រឬមួយមិនយល់ស្របនឹងក្ដីបំណងរបស់អ្នកដោយមានហេតុផល ប៉ុន្តែអ្វីដែលសំខាន់នោះ គឺការលើកទឹកចិត្តគ្នាទៅវិញទៅមក។ បើគេអាចនឹងគាំទ្រជួយលើកទឹកចិត្តអ្នកឲ្យសម្រេចក្ដីប្រាថ្នានោះ នោះហើយទើបជាការស្រលាញ់ពិត។ ដូចនេះ កុំបោះបង់ចោល បើកអាជីវកម្ម ទៅរៀនតថ្នាក់អនុបណ្ឌិត ទៅរត់ម៉ារ៉ាតុងហាលថ្ងៃក្ដៅ ទៅចូលរួមស្ម័គ្រចិត្តការងារសង្គម ទៅប្រលងចម្រៀង អ្នកនឹងអាចធ្វើបាន ៕
ប្រែសម្រួល៖ មាន រតនា ប្រភព៖ familyshare
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
