គោលដៅទេសចរណ៍ទាំង១០នៅអាស៊ី សម្រាប់ថ្ងៃឆ្លងឆ្នាំ

2015-12-28 16:50:24
ចំនួនមតិ 0 | ចំនួនចែករំលែក 0

ចន្លោះមិនឃើញ

វិបសាយ HotelClub ដែលប្រៀបដូចជាសហគមន៍ទេសចរណ៍អនឡាញដ៏ធំមួយក្នុងលោក បានចាត់ថ្នាក់គោលដៅទាំង១០ប្រចាំទ្វីបអាស៊ី ដែលទេសចរគួរទៅក្នុងឱកាសថ្ងៃឆ្លងឆ្នាំខាងមុខ។ ក្នុងចំណោមគោលដៅទាំង១០នោះ ក៏មានខេត្តសៀមរាបផងដែរ។

១០. ហុងកុង

ក្រៅពីដើរផ្សារនៅតំបន់ Monk Kok ដ៏ល្បី ទេសចរក៏អាចភ្លក់រសជាតិឌីមសាំដ៏ឆ្ងាញ់ផងដែរ។ ទេសចរក៏នឹងរីករាយនៅសណ្ឋាគារលំដាប់ពិភពលោក និងកម្មវិធីកម្សាន្តសប្បាយនារាត្រីឆ្លងឆ្នាំ។

៩. Langkawi (ម៉ាឡេស៊ី)

Langkawi នៅតែជាគោលដៅទី១សម្រាប់អ្នកចង់លេងឆ្នេរនៅម៉ាឡេស៊ី។ មានឆ្នេរស្អាតៗ និងរីសតជាច្រើនសម្រាប់ស្វាគមន៍ទេសចរ អមដោយអាកាសធាតុដ៏អំណោយផលនាដើមខែមករាទៀតនោះ អ្នកនឹងកាន់តែរីករាយ។

៨. West Bengal (ឥណ្ឌា)

ឥណ្ឌាជាប្រទេសសម្បូរគោលដៅទេសចរណ៍មួយក្នុងតំបន់អាស៊ី ក្នុងនោះ West Bengal ជាគោលដៅធំមួយសម្រាប់ថ្ងៃឆ្លងឆ្នាំខាងមុខ។ ទេសចរនឹងអាចរីករាយនឹងសម្បតិ្តបេតិកភណ្ឌពិភពលោករបស់ UNESCO គឺផ្លូវរថភ្លើងកាត់ភ្នំ និងសម្រស់ធម្មជាតិជាច្រើនទៀត។

៧. កោះស៊ូម៉ាត្រា (ឥណ្ឌូណេស៊ី)

ចាវ៉ា និងបាលី ជាតំបន់ដែលទាក់ទាញភ្ញៀវទេសចមកកាន់ឥណ្ឌូណេស៊ី ប៉ុន្តែស៊ូម៉ាត្រាក៏មិនធម្មតាដែរ។ ធ្លាប់ឮឈ្មោះក្នុងបទសម្រៀងលោកស៊ីន ស៊ីសាមុត ស៊ូម៉ាត្រាជាកោះធំទី៦ក្នុងលោក ដែលល្អបំផុតសម្រាប់ដំណើរទេសចរណ៍ផ្សេងព្រេងដ៏អស្ចារ្យ។

៦. សិង្ហបុរី

អស្ថិរភាពសេដ្ឋកិច្ចសកល ហាក់មិនធ្វើឲ្យរង្គើកេរ្តិ៍ឈ្មោះសិង្ហបុរីក្នុងចិត្តអ្នកទេសចរនោះឡើយ។ ទីក្រុងដែនកោះដ៏តូចមួយនេះ ត្រូវបានគេមើលឃើញថាកំពុងអភិវឌ្ឍតាមរបៀបទីក្រុងឌូបៃ។ និយាយជារួម សិង្ហបុរី ជាទីក្រុង និងជាប្រទេសដែលផ្ដល់ភាពរីករាយដែលទេសចរពីគ្រប់ទិសទី។

៥. ម៉ាល់ឌីវ

ម៉ាល់ឌីវជាប្រទេសដែនកោះដ៏ស្រស់ស្អាតក្នុងមហាសមុទ្រឥណ្ឌា ដែលនឹងផ្ដល់ឲ្យទេសចរនូវដំណើរកម្សាន្តមិនអាចបំភ្លេចបាន។ តើអ្នកនឹងត្រូវចំណាយលុយច្រើនមែនទេ? មិនខុសទេ អ្វីៗគឺថ្លៃ ប៉ុន្តែវាសក្ដិសមនឹងថ្លៃដែលអ្នកចំណាយ។

៤. ខេត្តសៀមរាប (កម្ពុជា)

ទោះបីជាពេលខ្លះរថយន្តក្រុងទេសចរណ៍ស្ទះតម្រៀបជូរគ្នាតាមផ្លូវទៅកាន់អង្គរវត្តក៏ពិតមែន ប៉ុន្តែភាពអស្ចារ្យនៃទីក្រុងខ្មែរបុរាណមួយនេះ មិនអាចបញ្ឈប់ចិត្តទេសចរបរទេសដែលអន្ទះសាចង់ឃើញម្ដងហើយម្ដងទៀតនោះទេ។ អច្ឆរិយពិភពលោកមួយនេះ នៅតែជាគោលដៅទេសចរណ៍មួយដែលទាក់ទាញចិត្តមនុស្សពីគ្រប់ផ្នែកនៃពិភពលោកមកទស្សនា។ ទេសចរក៏នឹងសប្បាយរីករាយនឹងការកម្សាន្តនាពេលរាត្រីឆ្លងឆ្នាំក្នុងក្រុងសៀមរាបផងដែរ។

៣. ក្រុង Gyeongju (កូរ៉េខាងត្បូង)

Gyeongju ជាបេតិកភណ្ឌពិភពលោក UNESCO ដ៏ល្អបំផុតមួយក្នុងប្រទេសកូរ៉េខាងត្បូង។ តំបន់ប្រវត្តិសាស្រ្ដមួយនេះ អាចបង្វែរចិត្តទេសចរពីរដ្ឋធានីសេអ៊ូល មកទស្សនាទីក្រុងវប្បធម៌ ប្រវត្តិសាស្រ្ដដ៏សម្បូរបែប។

២. កោះ Borneo

Borneo ជាកោះធំបំផុតនៅអាស៊ី និងធំបំផុតទី៣ក្នុងលោក ដែលស្ថិតក្នុងប្រជុំកោះម៉ាឡេ នៅក្នុងដែនដីប្រ៊ុយណេ ឥណ្ឌូណេស៊ី និងម៉ាឡេស៊ី។ វាជាកន្លែងនៃឆ្នេរដ៏ស្រស់ស្អាត ព្រៃត្រូពិកដែលមានជីវិតសត្វជាច្រើន ការកម្សាន្តនៅចំណុចខ្ពស់បំផុតនៃកោះ ក៏ដូចជាការមុជចុះមើលទេសភាពបាតសមុទ្រផងដែរ។

១. តូក្យូ (ជប៉ុន)

តូក្យូជាទីក្រុងធំបំផុតរបស់ជប៉ុនដែលទាក់ទាញទេសចរជាច្រើនក្នុងមួយឆ្នាំៗ។ ទេសចរអាចដើរទិញឥវ៉ាន់ ការកម្សាន្តសម្បូរបែប ភ្លក់អាហារជប៉ុន ក៏ដូចជាស្វែងយល់ពីវប្បធម៌ចំណាស់របស់ប្រទេសនេះ តាមរយៈសារមន្ទីរ និងប្រាសាទបុរាណជាដើម៕

ចុចអាន៖ វីដេអូពិសេស៩នាទីពីកម្មវិធីល្បីអាមេរិក “Survivor” ដែលមកថតនៅកោះរុងនិងអង្គរវត្ត

ដោយ៖ សុវត្ថិ

ប្រភព៖ HotelClub