ឱកាសបានការងារសម្បូរបែបសម្រាប់សិស្សនិស្សិតកំពុងរកការងារធ្វើ

2014-10-21 18:44:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្ត សិស្ស និស្សិត ដែលកំពុងស្វែងរកការងារ ឬអ្នកចង់ផ្លាស់ប្ដូរការងារទាំងឡាយ អាចទៅកាន់សាលពិព័រណ៍ការងារថ្នាក់ជាតិឆ្នាំ២០១៤នេះដែលមានការងារជាង ៤០០០ កន្លែងកំពុងរង់ចាំនៅអគារពិព័រណ៍ D E និង F នៃមជ្ឈមណ្ឌលកោះពេជ្រ ដែលចាប់បើកឲ្យចូលស្វែងរកដោយស៊េរីនៅថ្ងៃទី២១តុលានេះដល់ទី២២តុលាស្អែក។

ក្រុមហ៊ុន ស្ថាប័ន ចំនួន៦៥ កំពុងបើកឲ្យមានការចុះឈ្មោះរកការងារនៅក្នុងសាលដែលសិស្សនិស្សិតរាប់រយនាក់កំពុងសម្រុកទៅ។ ក្រៅពីក្រុមហ៊ុនអាជីវកម្មនានា នៅមានក្រុមហ៊ុនឯកទេសជ្រើសរើសបុគ្គលិកធំៗក្នុងប្រទេសក៏កំពុងផ្ដល់ឱកាសការងារសម្បូរបែបនៅទីនោះដែរដូចជាក្រុម HrInc ក្រុមហ៊ុន EBM Col, Ltd និងក្រុមហ៊ុន Camhr ជាដើម។

លោក លី វណ្ណរិទ្ធ ប្រធានផ្នែកប្រតិបត្តិការប្រចាំក្រុមហ៊ុនសេវាជ្រើសរើសបុគ្គលិក Camhr ថារយៈពេល២ថ្ងៃនេះក្រុមហ៊ុនលោកនឹងបើកឲ្យ សិស្ស និស្សិតទាំងឡាយបំពេញបែបបទស្វែងរកការងារ យ៉ាងសម្បូរដែលពួកគេពេញចិត្ត។

រីឯតំណាងក្រុមហ៊ុនជ្រើសរើសបុគ្គលិក EBM Col., Ltd វិញក៏បញ្ជាក់ពីការបើកចំហជាទូទៅដល់យុវជន និងអ្នកចង់រកការងារធ្វើថាអាចទៅចុះឈ្មោះស្វែងរកនៅបញ្ជររបស់ក្រុមហ៊ុននេះបាន។ សិស្ស និស្សិត គ្រាន់តែទៅចុះឈ្មោះ កម្រិតចំណេះដឹង ទុកលេខទូរសព្ទ ឬ អ៊ីម៉ែល និងជ្រើសរើសជំនាញការងារណាដែលខ្លួនពេញចិត្ត។ ក្រុមហ៊ុន EBM នឹងទាក់ទងទៅសម្ភាសនិងវាយតម្លៃ នៅពេលក្រុមហ៊ុនណាមួយដែល ជាអតិថិជនខ្លួនត្រូវការ។

ឯកឧត្ដម ហុង ជឿន ប្រធានទីភ្នាក់ងារជាតិមុខរបរ និង ការងារ ពន្យល់ថា ពិព័រណ៍ការងារថ្នាក់ជាតិនេះរៀបចំឡើងដើម្បីបើកឱកាសឲ្យសិស្ស និស្សិត កំពុងរកការងារធ្វើ អាចជួបជាមួយនិយោជក ដែលត្រូវការបុគ្គលិក។ យុវជន ទាំងឡាយក៏នឹងទទួលបានបទពិសោធន៍ និងចំណេះដឹងល្អៗពី អ្នកបណ្ដុះបណ្ដាលការងារ និងវាគ្មិនដែលបកស្រាយក្នុងពិព័រណ៍ប្រចាំឆ្នាំមួយនេះ៕