រឿងខ្មែរមួយ ចាយទុនជាង១៣ម៉ឺនដុល្លារ បើកសម្ពោធហើយ

2015-12-30 16:39:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តរឿង “ល្បុក្កតោចម្លែក” របស់ផលិតកម្ម Z Entertainment បានបើកសម្ពោធល្ងាចមិញនៅរោងភាពយន្តទំនើប Major Cineplex by Cellcard ដោយខ្សែភាពយន្តមួយនេះបានចំណាយទុនក្នុងផលិតរហូតដល់ទៅជាង១៣ម៉ឺន។

ចាងហ្វាងផលិតកម្ម Z Entertainment លោក លៀង ខេងហេង បានឲ្យដឹងថា “ល្បុក្កតោចម្លែក” គឺជា ខ្សែភាពយន្តបែបបុរាណខ្មែរ ផលិតកម្មយ៉ាងសម្រិតសម្រាំងបំផុត ដើម្បីឆ្លើយតបទៅនឹងទីផ្សារភាពយន្តកម្ពុជាបច្ចុប្បន្ន ដោយនៅក្នុងនោះផលិតកម្មបានចំណាយពេលក្នុងការផលិតរយៈពេល១ឆ្នាំនិងបានចំណាយដើមទុនក្នុងការផលិត ហូតដល់ទៅជាង១៣ម៉ឺនឯណោះ។

ចាងហ្វាងផលិតកម្មរូបនេះ បានលើកឡើងទៀតថា ចំណុចសំខាន់ខ្សែភាពយន្តមួយនេះ ផលិតកម្មបានបញ្ចូលក្បាច់គុនខ្មែរជាច្រើន តែក្បាច់គុនទាំងនោះមានលក្ខណៈបែបកំប្លែង ដើម្បីបង្កបរិយាកាសសាច់រឿងទាំងមូលមានភាពទាក់ទាញអ្នកទស្សនា។ អ្វីដែលពិសេសជាងនេះទៅទៀត ផលិតកម្មបានប្រមូលកីឡាករប្រដាល់ល្បីៗរបស់ខ្មែរជាច្រើន មកចូលរួមសម្ដែង ក្នុងនោះមានដូចជា វ៉ន វីវ៉ា សេន ប៊ុនថេន អូត ភូថង ពេជ្រ សុផាន់ ម៉ឺន សុភា ធន សុភា រួមទាំងតារាសម្ដែងក្បាច់គុន សុខ សុវណ្ណដែន លោក សេង សុខចាន់ ព្រមទាំងតារាកំប្លែង និងសម្ដែងជាច្រើនអ្នកទៀត។

តួឯកប្រុសនៅក្នុងខ្សែភាពយន្តមួយនោះ គឺតារាចម្រៀង កែវ វាសនា ចំណែកតួឯកស្រីមានរហូតដល់ទៅ២នាក់ គឺ កញ្ញា ម៉ារីលីន និង កញ្ញា រូ ចាន់តារា ។

ចាងហ្វាងផលិតកម្មរូបនេះបានវាយតម្លៃថា តាមរយៈវីដេអូ Trailer ផ្លូវការដែលបានចេញផ្សាយលើបណ្ដាញសង្គមកន្លងមក មានការគាំទ្រខ្លាំងពីទស្សនិកជនជាច្រើន ដោយអ្នកទាំងនោះបានបង្ហាញឆន្ទៈចង់មកទស្សនាខ្សែភាពយន្តមួយនេះជាខ្លាំង។ ដូចនេះលោករំពឹងថា រឿង “ល្បុក្កតោចម្លែក” ជាខ្សែភាពយន្តដំបូងរបស់ផលិតកម្ម Z Entertainment នឹងទទួលបានការគាំទ្រច្រើនជាក់ជាមិនខាន។ រឿង “ល្បុក្កតោចម្លែក” នឹងចាក់បញ្ចាំងជាផ្លូវការនៅចាប់ពីថ្ងៃទី០១ ខែ មករា ឆ្នាំ ២០១៦ តទៅនៅតាមរោងភាពយន្តទំនើបទាំងអស់ ក្នុងរាជធានីភ្នំពេញ និង ខេត្ត សៀមរាប៕