ប្រជាជនវៀតណាមអស់ប្រាក់រយពាន់លានដុងពីការឆបោកថ្មីលើអនឡាញ

2014-10-21 21:54:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ការឆបោកនៅលើអនឡាញបានធ្វើឲ្យប្រជាជនវៀតណាមរាប់ពាន់នាក់ក្លាយជាជនរងគ្រោះ បើគិតជាទឹកប្រាក់គឺស្មើនឹង ៤៨៧ ពាន់លានដុង (២៣ លានដុល្លារ)។ នេះបើតាមការឲ្យដឹងរបស់ក្រសួងសន្តិសុខសាធារណៈ។

ក្រុមហ៊ុន Khai Thai ដែលមានមូលដ្ឋានក្នុងទីក្រុងហាណូយ កំពុងជាប់ពាក់ព័ន្ធនឹងករណីឆបោកនៅលើអនឡាញតាមរយៈរចនាសម្ព័ន្ធពីរ៉ាមីតខុសច្បាប់។ ប៉ូលិសបានធ្វើការចាប់ខ្លួននាយកគ្រប់គ្រងទូទៅរបស់ក្រុមហ៊ុនសញ្ជាតិតៃវ៉ាន់លោក Hsu Ming Jung និងនាយកគ្រប់គ្រងសាខាជាជនជាតិវៀតណាមចំនួន ៥ នាក់ទៀត។

ការចាប់ខ្លួននោះប៉ូលិសបានរឹបអូសទឹកប្រាក់ ២០ ពាន់លានដុង (៩៤២០០ ដុល្លារ) ពីការិយាល័យរបស់ក្រុមហ៊ុនដដែល និង ៧០ ពាន់លានដុងពីផ្ទះរបស់លោក Jung អមជាមួយកុំព្យូទ័រ និងឯកសារពាក់ព័ន្ធមួយចំនួន។

បើតាមសម្ដីឧត្ដមសេនីយ៍ទោ Tran Trong Luong នៃក្រសួងសន្តិសុខសាធារណៈនេះជាគម្រោងបោកប្រាស់ថ្មីដែលមិនធ្លាប់ជួបប្រទះពីមុនមកទេ។

ក្រុមហ៊ុនបានប្រើវិធីឆបោកដោយតាំងខ្លួនជាក្រុមហ៊ុនវិនិយោគរូបិយវត្ថុបរទេស និងមាសដ៏មានសក្ដានុពលមួយ។ ដើម្បីអាចបញ្ចុះបញ្ចូលអតិថិជនឲ្យមកចូលប្រើសេវាកម្មរបស់ពួកគេ ក្រុមនេះបានជួយបុគ្គលិករាប់រយនាក់ ដោយផ្ដល់ប្រាក់ខែខ្ពស់ និងជួលការិយាល័យធំក្នុងអគារទំនើប។ បុគ្គលិករបស់ក្រុមហ៊ុនត្រូវបានក្រុមហ៊ុនបំពាក់បំប៉នឲ្យបញ្ចុះបញ្ចូលអតិថិជនដាក់ប្រាក់ដើម្បីប្ដូរទៅវិញនូវអត្រាការប្រាក់ដ៏ខ្ពស់។ ប្រសិនបើបុគ្គលិកណាចាប់បានអតិថិជនធំនោះគេអាចបានប្រាក់រង្វាន់ដល់ទៅរាប់រយលានដុង។

ដំណើរការទាំងអស់ត្រូវបានអនុវត្តតាមរចនាសម្ព័ន្ធរាងពីរ៉ាមីតដែលខុសនឹងច្បាប់។ ក្រុមហ៊ុន Khai Thai ត្រូវបានបង្កើតឡើងក្នុងឆ្នាំ ២០១១ និងបានកែសម្រួលអាជ្ញាប័ណ្ណមុខជំនួញរបស់ខ្លួន ៦ ដងហើយ។

ពេលនេះប៉ូលិសកំពុងស៊ើបអង្កេតបន្តលើករណីបោកប្រាស់ដែលមិនធ្លាប់មានក្នុងប្រទេសកុម្មុយនិស្តមួយនេះ៕

អាន៖ សេវាបញ្ចូលបទភ្លេងមួយបទនៅសល់ប៉ុន្មានហើយឥឡូវនេះ?

ប្រែសម្រួល៖ សីហា ប្រភព៖ thanhniennews