អ្នកធ្លាប់អត់ ពេលពួកម៉ាកឡើងកូដមានបាន មិនសូវរាប់អានដូចមុន?
- 2015-12-31 17:44:14
- ចំនួនមតិ 0 | ចំនួនចែករំលែក 0
អ្នកធ្លាប់អត់ ពេលពួកម៉ាកឡើងកូដមានបាន មិនសូវរាប់អានដូចមុន?
ចន្លោះមិនឃើញ
គេសង្កេតឃើញថា មនុស្សដែលធ្លាប់រាប់អានគ្នាជិតស្និទ្ធ [មិនមែនទាំងអស់] បែរជាប្រែប្រួលលែងដូចពីមុន។ តើមកពីមូលហេតុអ្វី? តើអ្នកធ្លាប់ជួបបញ្ហានេះដែរឬទេ?
“បើទោះបីជាអ្នកហ្នឹងមាន ក្លាយជាឯកឧត្ដម ឬមហាសេដ្ឋីយ៉ាងណាក៏ដោយ ក៏នៅតែរាប់អានដែរ តែប្រសិនបើគេប្រកាន់ចរិតដូចដើម ដូចកាលមិនទាន់មាន មិនប្រកាន់ខ្ញុំនៅតែរាប់អាន"។ នេះជាការលើកឡើងរបស់លោក លាង លីណា។
អតីតនិស្សិតសាកលវិទ្យាល័យ ភូមិនភ្នំពេញរូបនេះបន្តថា ប៉ុន្តែបើសិនជាគេមានលុយកាក់ ហើយសូវមាត់ដូចមុន លោកក៏នឹងមិនហ៊ានរាប់អានដែរ។ លោកថា ៖ "បើគេព្រងើយកន្តើយមិននិយាយដូចមុន ខ្ញុំក៏ស្ងាត់ដែរ...”។
ចំណែកលោក ជឿន ជឺន បានប្រាប់ថា ពីមុនលោកមានពួកម៉ាកជិតស្និទ្ធបំផុតបីនាក់ ប៉ុន្តែក្រោយមកពេល ពួកគេឡើងកូដមក ទំនាក់ទំនងរបស់លោក បានប្រែប្រួលស្ទើរតែ ១០០%។ ចំពោះមូលហេតុលោកថា ដោយសារតែម្នាក់ៗរវល់នឹងការងារ មានប្រពន្ធកូន និងគ្មានពេល ៖ "គេក៏រវល់យើងក៏រវល់តាមបែបយើង អត់មានពេលជួបគ្នា អាការរាប់អាននៅតែមាន តែគ្រាន់ថាលែងស្និទ្ធស្នាលខ្លាំងដូចពីមុន ហើយយើងនៅតែស្រលាញ់គ្នា"។
ហេតុផលដោយឡែកផ្សេងទៀត បើទោះបីមិនមែនជារឿងរបស់ខ្លួនក៏ដោយ យុវជន វី ដារ៉ា បានប្រាប់ Sabay ៖ "ខ្ញុំមានមិត្តភ័ក្ដិម្នាក់ គាត់ថា គាត់លែងហ៊ានរាប់អានពួកម៉ាក ព្រោះតែរអៀសខ្លួន។ គាត់ថាពេលគេហៅទៅញ៉ាំអីម្ដងៗគេប៉ាវរហូត គាត់សុំចេញដែរតែគេមិនឱ្យចេញ យូរៗគាត់ចេះតែមានលេះនេះលេះនោះ ហើយទំនាក់ទំនងក៏ឃ្លាតឆ្ងាយទៅតាមហ្នឹងដែរទៅ"។
យុវជនម្នាក់ក៏បានទម្លាយឱ្យដឹងដែរ តែក្នុងន័យមិនបញ្ចេញឈ្មោះថា ទំនាក់ទំនងរូបគេនឹងមិត្តភ័ក្ដិម្នាក់ កាន់តែឆ្ងាយទៅៗ ដោយសារតែសម្ដីតូចសម្ដីធំ។ "រាប់អាននៅតែរាប់អាន តែធម្មតាគេធូរធារ គេតែងមានសម្ដីធំ ហើយធ្វើអីអាងទឹកលុយ។ ខ្ញុំអត់សូវចូលចិត្ត ...គាត់អត់ដូចមុន ហើយនិយាយនេះមិនមែនខ្ញុំច្រណែនគេទេ ខ្ញុំចង់ឱ្យតែពួកម៉ាកមានបានហ្នឹង...គ្រាន់តែខ្ញុំអត់ចូលចិត្តសម្ដីធំ សម្ដីឈ្លើយប៉ុណ្ណឹង"។
រីឯ ណាវី ក៏បានបង្ហាញចំណាប់អារម្មណ៍លើប្រធានបទមួយនេះដែរ។ និស្សិតច្បាប់នៅ RULE បានប្រាប់ថា ក្នុងរង្វង់មិត្តមិត្តិរបស់កញ្ញា មិនមានបញ្ហានេះឡើយ ប៉ុន្តែកញ្ញាពោលថា ករណីមិនសូវរាប់អានដូចពីមុននេះ អាចមានច្រើនចណុចដូចខាងក្រោម៖
-ច្រណែន៖ ឃើញគេមានបានជាងខ្លួនច្រណែន
-ខ្លាចចិត្តគ្នាទៅវិញទៅមក៖ ដូចការលើកឡើងខាងលើដែរ គេហៅមិនហ៊ានទៅ ហើយថ្ងៃក្រោយ អ្នកហៅលែងហ៊ានបបួល
-ក្រអឺតក្រទម មិនស្គាល់មិត្តភ័ក្តិ៖ លុយធ្វើឱ្យមនុស្សផ្លាស់ប្ដូរ ពីចរិតស្លូតមកកាច ឈ្លើយជាដើម
-អ្នកឡើងកូដរវល់ការងារ៖ ធម្មតាពេលមានលុយកាក់ គេអាចរវល់រឿងរកស៊ី ឬការងារជាដើម ដូច្នេះទើបធ្វើឱ្យម្ខាងទៀតយល់ថា គេមានលែងចង់រាប់អានខ្លួន៕
ច្បាប់ចរាចរណ៍ថ្មីផ្សាយច្រើនដង តែយុវវ័យខ្លះនៅតែមិនទាន់ដឹងរឿង
ហេតុអ្វីបុរសនារីឥលូវ អាយុច្រើន យូររៀបការម្ល៉េះ?
តើអ្នកយល់ថាមកពីមូលហេតុអ្វី?
អត្ថបទ៖ អ៊ុំ សុភក្តិ