ចាន់ វឌ្ឍនាកា ក្លាយជាទូតសុច្ឆន្ទៈផ្លូវការមួយឆ្នាំរបស់ក្រុមហ៊ុន SEATEL

2016-01-11 23:05:14
ចំនួនមតិ 0 | ចំនួនចែករំលែក 0

ចន្លោះមិនឃើញ

មុននេះបន្តិច ខ្សែប្រយុទ្ធវ័យក្មេងរបស់ក្រុមជម្រើសជាតិកម្ពុជា និងជាសមាជិកក្លឹបបឹងកេតអង្គរ ចាន់ វឌ្ឍនាកា បានចុះហត្ថលេខាធ្វើជាទូតសុច្ឆន្ទៈរយៈពេលមួយឆ្នាំរបស់ក្រុមហ៊ុនផ្ដល់សេវាអ៊ីនធឺណិត និងទូរសព្ទ SEATEL។

ពិធីចុះហត្ថលេខាបានប្រព្រឹត្តទៅនៅទីស្នាក់ការកណ្ដាលក្រុមហ៊ុន SEATEL ផ្ទាល់ ដោយមានការចូលរួមពីលោក Yang Liqun អគ្គនាយកក្រុមហ៊ុន លោក Feng Yang នាយកផ្នែកទីផ្សាររបស់ក្រុមហ៊ុន លោក បែ មករា អ្នកចាត់ការទូទៅក្លឹបបឹងកេតអង្គរ និងកីឡាករវ័យក្មេង ចាន់ វឌ្ឍនាកា ជាទូតសុច្ឆន្ទៈឯកសិទ្ធិប្រចាំក្រុមហ៊ុន SEATEL។

មូលហេតុដែលក្រុមហ៊ុន SEAEL ជ្រើសរើស ចាន់ វឌ្ឍនាកា ជាទូតសុច្ឆន្ទៈ ដោយសារកីឡាករវ័យក្មេងរូបនេះ កំពុងលេចធ្លោក្នុងវិស័យកីឡាបាល់ទាត់ និងមានល្បឿនលឿនប្រៀបដូចជាការផ្ដល់សេវាកម្មរបស់ក្រុមហ៊ុនលោកដែរ។ បន្ទាប់ពីចុះហត្ថលេខារួច ក្រុមហ៊ុន SEAEL បានផ្ដល់ទូរសព្ទម៉ាក 4G Samsung S6 Edge ដល់កីឡាករ ចាន់ វឌ្ឍនាកា និងលោក បែ មករា ដើម្បីសាកល្បងប្រើប្រាស់ផងដែរ។

ខ្សែប្រយុទ្ធ ចាន់ វឌ្ឍនាកា ដែលរកគ្រាប់បាល់បាន ៣៧ គ្រាប់នៅរដូវកាល២០១៥ នៃលីគកំពូលរបស់កម្ពុជា នឹងក្លាយជាកីឡាករបាល់ទាត់ទី៤ ក្នុងការធ្វើជាទូតសុច្ឆន្ទៈឲ្យក្រុមហ៊ុនឯកជននានាបន្ទាប់ពី ប្រាក់ មុន្នីឧត្ដម, គួច សុកុម្ភៈ និង ឃួន ឡាបូរ៉ាវី៕