អភិបាលខេត្តបាត់ដំបងយល់ព្រមសំណើ Angelina Jolie ហើយ

2016-01-13 19:30:05
ចំនួនមតិ 0 | ចំនួនចែករំលែក 0

ចន្លោះមិនឃើញ

អភិបាលខេត្តបាត់ដំបងលោក ច័ន្ទ សុផល បានព្រមឱ្យថតរឿង "មុនដំបូងខ្មែរក្រហមសម្លាប់ប៉ាខ្ញុំ" តបតាមសំណើររបស់ Angelina Jolie រួចរាល់ហើយកាលពីពេលថ្មីនេះ។

“ព្រោះនេះជាកិត្តិយសខេត្តរបស់ខ្ញុំ ហើយឆ្លុះបញ្ចាំងពីការរក្សាបានសន្តិសុខ សុវត្ថិភាព និងសណ្ដាប់ធ្លាប់សាធារណៈ" ។ លោកថ្លែងមកកាន់ Sabay មុននេះបន្តិច។ លោកបន្តថា ក្រុមការងារត្រូវចាប់ផ្ដើមថតនៅចុងឆ្នាំ ២០១៦ ក្នុងក្រុងបាត់ដំបង, តំបន់ស្ពាន និងសំណង់អគារចាស់ៗ ក៏ដូចជាដងផ្លូវមួយចំនួន ដែលមានស្ថានភាពប្រហាក់ប្រហែលជំនាន់មុន។

អភិបាលខេត្តខាងលើបន្ថែមទៀតថា Angelina Jolie ក៏ត្រូវការពលរដ្ឋក្នុងខេត្តបាត់ដំបងជាច្រើននាក់ ដើម្បីចូលរួមសម្ដែងក្នុងរឿងដែរ ដោយផ្ដល់ប្រាក់ឧបត្ថម្ភមួយចំនួន។ ហើយក្នុងនាមថ្នាក់ដឹកនាំខេត្តលោកអះអាងថា បានយកចិត្តទុកដាក់ពង្រឹងការសហការល្អជាមួយតារាហូលីវូដរូបនេះ ធ្វើយ៉ាងណាកុំឱ្យនាងមានការក្រែងចិត្ត និងធានារក្សាសុវត្ថិភាពគ្រប់បែបយ៉ាងពេលដំណើរការថត។

ជាមួយគ្នានោះ លោកអភិបាលខេត្តសង្ឃឹមថា ខេត្តរបស់លោកនឹងមានភ្ញៀវទេសចរទៅទស្សនាកាន់តែច្រើនបន្ទាប់ពីការថតភាពយន្តបែបប្រវត្តិសាស្ត្រនេះ។ ម្យ៉ាងទៀត ក្រៅពីសក្ដានុពលកសិកម្ម បាត់ដំបង ក៏សម្បូររមណីយដ្ឋានធម្មជាតិ, ធម្មជាតិប្រវត្តិសាស្ត្រ និងសំណង់ប្រវត្តិសាស្ត្រជាច្រើនផងដែរ។ លោកស្នើឱ្យប្រជាពលរដ្ឋទាំងអស់ចូលរួមថែរក្សាបរិស្ថានក្នុងខេត្ត និងចូលរួមលើកស្ទួយសោភ័ណភាព៕

អត្ថបទ៖ សំ ជំនាញ

រូបថត៖ Facebook