២០បទ Melody ថ្មីសុទ្ធស្វាគមន៍ពិធីបុណ្យអុំទូក២០១៤

2014-10-22 17:05:20
ចំនួនមតិ 0 | ចំនួនចែករំលែក 0

ចន្លោះមិនឃើញ

បទចម្រៀងមាន Melody ថ្មីសុទ្ធចំនួន២០បទ ស្មើនឹង ២វ៉ុល សុទ្ធបទប្រជាប្រិយមិត្តខ្មែរយើង ត្រូវបានផលិតកម្មសាន់ដេដឹកនាំក្រុមការងារចុះថតជាវីដេអូចម្រៀង (MV) នៅស្ថានីយទូរទស្សន៍ប៉ុស្តិ៍លេខ៣នាថ្ងៃម្សិលមិញនេះ។

"នេះជាឆ្នាំដំបូងបង្អស់របស់ផលិតកម្មសាន់ដេដែលបានរៀបចំពិធីបុណ្យអុំទូកអកអំបុក និងសំពះព្រះខែ។ ហើយនេះគឺជាអាល់ប៊ុមថ្មីស្រឡាងចំនួន២វ៉ុលព្រមគ្នាដែលយើងធ្វើ Melody ថ្មីទាំងអស់"។

លោក ឡាយ សុខចំរើន នាយកគ្រប់គ្រងទូទៅរបស់សាន់ដេបញ្ជាក់ប្រាប់ Sabay ម្សិលមិញ។

សិល្បករ សិល្បការិនីបានមានចិត្តត្រេកអរ និងសាទរចំពោះការវិលត្រឡប់ជាថ្មីនៃពិធីបុណ្យអុំទូកអកអំបុក និងសំពះព្រះខែ បន្ទាប់ពីបានខកខានអស់រយៈពេល៣ឆ្នាំ ដោយសារគ្រោះទឹកជំនន់ និងកាន់ព្រះរាជមរណៈទុក ព្រះបរមរតនកោដ្ឋ។

លោក ខេមរៈ សិរីមន្ត ដែលជាតារាចម្រៀងដ៏ល្បីប្រចាំផលិតកម្មសាន់ដេ ប្រាប់ថាអបអរនឹងពិធីបុណ្យជាតិដ៏ធំនេះ លោកមានបទចម្រៀង Melody ថ្មីសុទ្ធចំនួនបីបទទុកជាចំណងដៃសម្រាប់ពុកម៉ែបងប្អូន និងអ្នកគាំទ្រទាំងអស់។

ងាកមកលោក អេនឌី តារាចម្រៀង ដើរម៉ូដ និងសម្ដែងឯណេះ ក៏មានចិត្តសោមនស្សរីករាយដូចគ្នា។ លោកថា ពិធីបុណ្យអុំទូកក្រៅពីផ្ដល់ភាពសប្បាយរីករាយ ក៏បានផ្ដល់អត្ថប្រយោជន៍ជាច្រើនដល់សិល្បករ សិល្បការិនីផងដែរ។ "សិល្បករ សិល្បការិនីជាច្រើនមានឱកាសបានក្នុងពិធីបុណ្យអុំទូកនៅក្នុងកម្មវិធីផ្សេងៗដែលអាចរកចំណូលបានច្រើន។ បើបាត់បង់ពិធីបុណ្យអុំទូកនេះ គឺដូចយើងផ្អាកការងាររយៈពេល៣ថ្ងៃដែរ"។

http://youtu.be/AQxELzCLrRE

ពិធីបុណ្យអុំទូក លយប្រទីប អកអំបុក និងសំពះព្រះខែនឹងចូលមកដល់ចាប់ពីថ្ងៃទី ០៥-០៧ វិច្ឆិកាខាងមុខនេះ។ ទូកប្រណាំងជាច្រើនរយគូ កីឡាករ រួមទាំងរាប់ម៉ឺននាក់ត្រៀមនឹងមកជួបជុំគ្នាប្រារព្ធពិធីប្រពៃណីមួយនេះ។ ឆ្លៀតឱកាសនេះ កញ្ញា កុល ដាវី តារាសម្ដែងល្បីឈ្មោះម្នាក់ ចូលខ្លួនមកផ្ដល់ការលើកទឹកចិត្តដល់កីឡាករ និងសូមជូនពរប្រជាពលរដ្ឋ និងកីឡាករទូកទាំងអស់ដែលឡើងមករាជធានី ធ្វើដំណើរបានសេចក្ដីសុខ សុវត្ថិភាពទាំងអស់គ្នា។

ក្រោយចាប់ផ្ដើមដំណើរថតពេញមួយថ្ងៃនាថ្ងៃម្សិលមិញ ផលិតកម្មសាន់ដេ ត្រៀមនឹងចេញអាល់ប៊ុមអបអរពិធីបុណ្យអុំទូករបស់ខ្លួននៅក្នុងរង្វង់សប្ដាហ៍ក្រោយ។ ថ្នាក់ដឹកនាំផលិតកម្ម ស្នើសុំប្រជាពលរដ្ឋចូលរួមគាំទ្រអាល់ប៊ុមពិសេសនេះទាំងអស់គ្នា៕

អត្ថបទ៖ ទារិកា