ផលិតករភាពយន្តដ៏ល្បីតំណាងឲ្យខ្មែរមួយរូបជាប់ពានរង្វាន់ពហុវិស័យអាស៊ី

2014-10-23 00:03:31
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក រិទ្ធី ប៉ាន់ ផលិតករភាពយន្ដខ្មែរ បានទទួលពានរង្វាន់ពហុវិស័យអាស៊ី។ ពានរង្វាន់ពហុវិស័យអាស៊ី (ERIA) គឺជា ពានរង្វាន់ចម្រុះជាតិសាសន៍អាស៊ី ក្រោមការសហការរៀបចំរបស់វិទ្យាស្ថាន ស្រាវជ្រាវសេដ្ឋកិច្ចសម្រាប់អាស៊ាន និង បណ្ដាប្រទេសក្នុងតំបន់អាស៊ី ដែលពិធីប្រកាសអ្នកជាប់ជយលាភីបានធ្វើនៅសណ្ឋាគារ អាំងទែរកង់ទីណង់តាល់ កាលពីព្រឹកថ្ងៃទី ២២ ខែ តុលា ឆ្នាំ២០១៤។

លោក រិទ្ធី ប៉ាន់

ពានរង្វាន់ពហុវិស័យអាស៊ី មានទីតាំងនៅទីក្រុង ហ្សាកាតា ប្រទេសឥណ្ឌូនេស៊ី ហើយគោលបំណងនៃការបង្កើតឲ្យមានកម្មវិធីផ្ដល់ពានរង្វាន់ចម្រុះជាតិសាសន៍ទាំងអស់នេះឡើង គឺដើម្បីបង្រួមគំលាតរវាងបណ្ដាប្រទេសប្រចាំតំបន់អាស៊ីឲ្យកាន់តែតូច ឈានទៅរកការរួមបញ្ចូលគ្នារវាងវប្បធម៌ និង សេដ្ឋកិច្ច ជាពិសេសការរីកចម្រើនក្នុងសង្គម និង មានស្ថេរភាព។

លោក ហ៊ីដេតុស្សិ នីស្សិមូរ៉ា ប្រធានវិទ្យាស្ថាន ស្រាវជ្រាវសេដ្ឋកិច្ចសម្រាប់ អាស៊ាន និងអាស៊ីបូព៌ាបានបញ្ជាក់ថា ពាន់រង្វាន់ពហុវិស័យអាស៊ីនេះ ធ្វើឡើងរៀងរាល់ពីរឆ្នាំម្ដង ហើយនេះ ជាលើកទីពីរក្នុងការផ្ដល់ពាន់រង្វាន់ទៅឲ្យបុគ្គល និង សមាគម ដែលបានសម្រេចសមិទ្ធផលកិត្តិយសធំបំផុត នៅក្នុងវិស័យសង្គម វិទ្យាសាស្ត្រ សេដ្ឋកិច្ច និង វប្បធម៌។

បន្ថែមពីលើនេះ សម្តេច នរោត្តម សេរីវុឌ្ឍ ប្រធាននាយកវិទ្យាស្ថានខ្មែរ សម្រាប់សហប្រតិបត្តិការ និង សន្តិសុខ មានបន្ទូលថា ឆ្នាំនេះអ្នកដែលទទួលបានពានរង្វាន់ពហុវិស័យអាស៊ីមាន៥រូប។ ហើយព្រះអង្គមានសេចក្ដីរំភើបខ្លាំងណាស់ ក្នុងចំណោម ប្រទេសអាស៊ីបូព៌ាចំនួន១៦ ប្រទេស ដែលបានស្នើដាក់ឲ្យជ្រើសរើសបេក្ខជនសម្រាប់ផ្នែកនីមួយៗ ក្នុងនោះមានខ្មែរយើងមួយរូបផងដែរ គឺលោក ប៉ាន់ រិទ្ធី លើផ្នែកវប្បធម៌។

ខណៈដែល អ្នកទទួលពានរង្វាន់ធំ គឺរង្វាន់ពហុវិស័យអាស៊ី បានទៅលើលោក Manmohan Singh អតីតនាយករដ្ឋមន្ត្រីឥណ្ឌា ហើយពានរង្វាន់ផ្នែកសេដ្ឋកិច្ច និង វិទ្យាសាស្ត្រសង្គម បានទៅលើលោក Peter David Drysdale ជាសាស្ត្រាចារ្យសេដ្ឋកិច្ច និង ទស្សនៈកិច្ចសមាជិក នៃសាលាសេដ្ឋកិច្ច និង រដ្ឋបាល Crawford នៃសកលវិទ្យាល័យជាតិអូស្ត្រាលី និង លោក Wang Gungwu សាស្ត្រាចារ្យនៃសាកលវិទ្យាល័យសិង្ហបុរី និង ក្រុមហ៊ុន The Takarazuka Revue ដែលជាក្រុមហ៊ុនល្ខោនតន្ត្រីដែលបានបង្កើតឡើងពី ក្រុមនារីនៅលីវ ក៏ទទួលបានពានរង្វាន់វប្បធម៌នេះដែរ។

ដោយឡែក លោក រិទ្ធី ប៉ាន់ បានថ្លែងប្រាប់ពីចំណាប់អារម្មណ៍របស់ខ្លួននៅក្នុងពិធីនេះថា៖ "ខ្ញុំត្រេកអរ និង មានមោទនភាពខ្លាំងណាស់ ដែលជាប់ពានរង្វាន់ផ្នែកវប្បធម៌នេះនៅក្នុងកម្មវិធីចម្រុះជាតិសាសន៍មួយនេះ។

លោកប៉ាន់ រិទ្ធី គឺជា ជនជាតិខ្មែរមួយរូបដែលស្នាដៃរបស់គាត់ត្រូវបានគេទទួលស្គាល់ជាអន្តរជាតិ និង អ្នកដឹកនាំ និង សរសេរស្គ្រីបភាពយន្តបែបឯកសារដ៏ល្បី។ កាលពីឆ្នាំ ២០១៣ កន្លងទៅស្នាដៃនិពន្ធ និង ដឹកនាំរឿង របស់គាត់ឈ្មោះ The Missing Picture ដែលជាភាពយន្តខ្មែរមួយរៀបរាប់អំពីរបបអាវខ្មៅនៅកម្ពុជា ក៏បានឈ្នះពានរង្វាន់នៃ Un Certain Regard ហើយក្នុងឆ្នាំ ២០១៤ នេះ ស្នាដៃរបស់គាត់ក៏ទទួលរង្វាន់ផ្នែកសិល្បៈពីវិទ្យាស្ថាន Foreign Language Film Category ទៀតផង៕

អត្ថបទ៖ យិន សំបូរ