កញ្ញា គង់ កែវសុគន្ធា៖ កំព្រាឪពុកធ្វើឲ្យខ្ញុំរឹងប៉ឹងរហូតបានកាន់តំណែងធំៗ

2014-10-23 17:23:11
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា គង់ កែវសុគន្ធា ជាកូនកំព្រាឪពុក ជាក្មេងធ្លាប់សោយសុខ ប៉ុន្តែជីវិតរបស់កញ្ញា បានប្រែប្រួលខ្លាំង បន្ទាប់ពីឪពុកជាទីស្រលាញ់ធ្លាក់ខ្លួនឈឺ ហើយលាចាកលោកបាត់ទៅ។ កញ្ញាបានចាប់ផ្ដើមការងារកំឡុងពេលសិក្សានៅ មហាវិទ្យាល័យឆ្នាំ២ ធ្វើការជាអ្នកស្ម័គ្រចិត្តហើយបានតស៊ូរហូតក្លាយខ្លួនជាអ្នក គ្រប់គ្រងវិទ្យុសារិកា និងក្រោយមកបានក្លាយជាទីប្រឹក្សាហិរញ្ញវត្ថុឲ្យអង្គការធំៗ ជាច្រើទៀត ដែលទទួលចំណូលប្រចាំខែបានរាប់ពាន់ដុល្លារ។

តើឆាកជីវិតកញ្ញា ជួបរឿងជូរចត់ដូចម្ដេចខ្លះ?

កញ្ញា គង់ កែវសុគន្ធា កើតនៅឆ្នាំ១៩៨៥ មានស្រុកកំណើតនៅក្រុងភ្នំពេញ ក្នុងត្រកូលអ្នករៀនសូត្រ មានលោកឪពុកជាវេជ្ជបណ្ឌិត អតីតប្រធានមន្ទីរពេទ្យរបេង និងម្ដាយជាមេផ្ទះ ដែលអាចនិយាយបានថា ជាគ្រួសារមួយដ៏មានក្ដីសុខនិងសុភមង្គល ពោរពេញទៅដោយពន្លឺនៃក្ដីសង្ឃឹម។ ក្នុងវ័យសិក្សាកញ្ញារៀនសូត្រ មិនសូវពូកែប៉ុន្មានទេ ហើយចូលចិត្តដើរលេងតាមរបៀប យុវវ័យ ប៉ុន្តែក្ដីសប្បាយរីករាយនេះ មិននៅស្ថិតស្ថេរឡើយ។ នៅឆ្នាំ ២០០៣ ឪពុករបស់កញ្ញាបានចាប់ផ្ដើមឈឺ ហើយបានលាចាកលោកនៅឆ្នាំ២០០៨ បន្សល់កូនកំព្រាគ្មានឪពុក លែងមានអ្នកផ្គត់ផ្គង់គ្រួសារ ព្រោះសេដ្ឋកិច្ចគ្រួសាររបស់កញ្ញាទាំងមូលពឹងផ្អែកស្ទើរតែទាំង ស្រុងលើ ឪពុក។

ចង់ធ្វើជាបង្គោលគ្រួសារគួរតែរៀនឲ្យមាំទាំ នៅឆ្នាំ២០០៣ ជានិស្សិតឆ្នាំទី២នៅមហាវិទ្យាល័យ ដែលជាក្មេងស្រីម្នាក់ធ្លាប់ដើរលេងសប្បាយ ប្រែក្លាយជាក្មេងគ្មានទិសដៅ ប្រៀបដូច ចករសាត់អណ្ដែតកណ្ដាលបឹង គ្មានកោះត្រើយ។ ក្នុងអំឡុងពេលនោះកញ្ញា ស្ទើរតែបោះបង់ការសិក្សាចោលក៏ព្រោះតែជំងឺឪពុកកាន់តែដុនដាប បន្តិចម្ដងៗ។ប៉ុន្តែ ក្នុងកាលៈទេសៈនេះ ម្ដាយរបស់កញ្ញាដែលធ្លាប់រស់នៅស្រួល គ្មានការលំបាកក៏ព្រោះមានស្វាមីជាអ្នកមានមុខតំណែងគួរសម និងអាចរកប្រាក់កម្រៃបានស្រួល បានជំរុញកញ្ញាឲ្យតស៊ូ ក្នុងជីវិត ខិតខំរៀនសូត្រឡើងវិញ ធ្វើជាបង្គោលគ្រួសារ។

រៀនឆ្នាំទី២ នៅមហាវិទ្យាល័យឆ្លៀតធ្វើការក្រៅម៉ោង

ដោយ មានការជំរុញទឹកចិត្ត សុគន្ធា បានចាប់ផ្ដើមដូរវេនសិក្សាមករៀនពេលយប់ សិក្សាមុខវិជ្ជាគ្រប់គ្រងពាណិជ្ជកម្ម និងសិក្សាភាសាអង់គ្លេស នៅ IFL ហើយពេលថ្ងៃឆ្លៀតរកការងារក្រៅម៉ោងធ្វើដើម្បីទ្រទ្រង់ខ្លួន ឯងក្នុងការរៀនសូត្រ។

ការងារដំបូងប្រាក់ខែត្រឹម ៥០ដុល្លារ

កញ្ញាបានកាត់បន្ថយចំណាយ និងបានខិតខំប្រឹងប្រែងរៀនសូត្រ ជាងមុន លើសពីនេះទៅទៀតកញ្ញា បានព្យាយាមរកការងារធ្វើនៅពេលថ្ងៃ ទោះជាការងារតូចតាចប៉ុណ្ណា ក៏មិនអាចបណ្ដោយឲ្យឱកាសមួយកន្លងផុតទៅងាយៗដែរ រហូតទទួលបានត្រឹមការងារជាអ្នកស្ម័គ្រចិត្តនៅអង្គការ និចហ្វិច ជាអ្នកបកប្រែ និងសរសេររបាយការណ៍ ដោយទទួលបានបៀវត្សរ៍ ៥០ដុល្លារ។

ប្ដូរការងារដើម្បីស្វែងរកបទពិសោធន៍ថ្មីៗ

នៅឆ្នាំ២០០៤ កញ្ញា ក៏បានចូលធ្វើការងារ នៅ ក្នុងក្រុមហ៊ុនទេសចរណ៍មួយឈ្មោះ Diethelm Travel។ រយៈពេលត្រឹម១ ខែ សុគន្ធា ត្រូវបានថ្នាក់លើមើលឃើញ និងផ្ដល់ ឱកាសការងារជាច្រើន។ នៅឆ្នាំ២០០៥ កញ្ញា បានក្លាយជាបុគ្គលិកពេញសិទ្ធិ និងមានតួនាទី ជាអ្នកកក់សំបុត្រ (Reservation Clerk) ដោយទទួលបានបៀវត្សរ៍ ១០០ដុល្លារ។ ជាមួយការងារថ្មីនេះ ហាក់ត្រូវជាមួយជំនាញកញ្ញា ដែលបានរៀននៅមហាវិទ្យាល័យ ប៉ុន្តែកញ្ញាបែរជាមិនពេញចិត្តនឹងការងារដែលបានធ្វើសោះ ព្រោះកញ្ញាយល់ថា ការងារនេះមិនអាចអភិវឌ្ឍខ្លួនបានឆាប់រហ័សសោះ។

ឱកាសនៃការទំនាក់ទំនងមានគ្រប់ពេលវេលា

នៅពេលសិក្សា ជាឱកាសមួយរបស់កញ្ញា ដែលជួបជាមួយអ្នកមានបទពិសោធន៍ច្រើន សុទ្ធតែមានតំណែងខ្ពស់ៗ តាមស្ថាប័នផ្សេង នៅ ចុងឆ្នាំ២០០៧ ពេលនោះ មនុស្សម្នាក់បានណែនាំកញ្ញាឲ្យប្រឡងចូលធ្វើការនៅវិទ្យុស្ត្រី១០២។

ប្ដូរការងារត្រូវទៅតាមជំនាញ និងចំណូលចិត្ត

នៅ ឆ្នាំ២០០៨ កញ្ញា បានប្រឡងជាប់នៅវិទ្យុស្ត្រី១០២ ហើយបានសម្រេចចិត្តលាលែងតំណែងពីក្រុមហ៊ុនចាស់ ហើយទទួលបានតំណែងជា ជំនួយការ ប្រធានផ្នែកផលិតព័ត៌មាននៅ វិទ្យុ នោះ។ នៅទីនោះ កញ្ញាបានទទួល បទពិសោធន៍ជាច្រើនពីដំណើរការរបស់ស្ថាប័ន ពិសេសការងារកៀរគររកហិរញ្ញវត្ថុទ្រទ្រង់ការផលិតកម្មវិធីតែម្ដង ។

បទពិសោធន៍ច្រើន ឱកាសកាន់តែច្រើន

ដោយ មានចិត្តចង់សាកល្បងជាមួយការងារថ្មីៗ មជ្ឈមណ្ឌលដើម្បីប្រព័ន្ធផ្សព្វផ្សាយ (CCIM) ដែលមាន ស្ថានីយវិទ្យុសារិកា ១០៦.៥FM បានប្រកាសជ្រើសរើសមនុស្សសម្រាប់មុខតំណែង ជំនួយការកៀរគរថវិកា ( Fun Raising Assistance)។ នៅឆ្នាំ ២០០៩ កញ្ញាបានជាប់មុខតំណែងនៅក្នុងស្ថាប័នថ្មីនេះ ក៏ព្រោះតែត្រូវនឹងមុខវិជ្ជាដែលកញ្ញាបានរៀនផងដែរ។

អាយុ២៥ឆ្នាំ ក្លាយជាអ្នកគ្រប់គ្រងស្ថានីយ

ឆ្នាំ ២០១១ ដោយមានសមត្ថភាពបំពេញការងារ កញ្ញា ត្រូវបានដំឡើងឲ្យក្លាយជាប្រធានគ្រប់គ្រងស្ថានីយវិទ្យុ១០៦.៥ ប៉ុន្តែដោយយល់ថាជាមនុស្សចំណូលថ្មី បែរក្លាយជាមនុស្សម្នាក់ដែលគ្រប់គ្រងបុគ្គលិកចាស់ៗ ពេលនោះកញ្ញាព្យាយាមបដិសេធ មិនទទួលព្រោះ វាដូចជាឆាប់រហ័សពេក និងម្យ៉ាងគិតថា មិនសម ប៉ុន្តែថ្នាក់ដឹកនាំបានជំរុញយ៉ាងខ្លាំង។

ការគាំទ្រផ្លូវចិត្តជារឿងសំខាន់

ពីដំបូងឡើង កញ្ញាហាក់នៅរារែក ក៏សុំពេល១ថ្ងៃ ដើម្បីគិត ប៉ុន្តែពេលយប់នោះកញ្ញា ក៏បានទទួលការជំរុញ និងគាំទ្រពីអ្នកម្ដាយ កញ្ញាក៏សុខចិត្តទទួលយកការងារនោះតែម្ដង។

ប្រជុំលើកទី១ គ្មានមនុស្សចូលរួមរឿង មួយដែលកញ្ញា បារម្ភខ្លាំងគឺ វិវាទបានកើតឡើង ការមិនចុះសម្រុង ខណៈមនុស្សចូលធ្វើការមុន មានវ័យចាស់ៗ ជាង គេមិនឲ្យតម្លៃកញ្ញា។ មិនខុសពីការគិតប៉ុន្មាន ការប្រជុំលើកទីមួយគ្មានមនុស្សចូលរួមសូម្បីម្នាក់សោះ ពេលនោះកញ្ញា ហាក់បាក់ទឹកចិត្តបន្តិច ព្រោះគ្មានបទពិសោធន៍ជាអ្នកគ្របគ្រងពីមុនមកសោះ ហើយការងារជាអ្នកគ្រប់គ្រងស្ថានីយ ពិបាកលើសមុន ៣ដង ចំពោះកញ្ញា។

ពុះពារគង់បានសម្រេច

ប៉ុន្តែ សម្រាប់កញ្ញា មិនមានការបាក់ទឹកចិត្តខ្លាំងឡើង កញ្ញាគិតថា មានតែខិតខំប្រឹងប្រែងធ្វើការ ឲ្យបានសម្រេចនោះទេ ទើបគេអាចទទួលស្គាល់បាន ។ ក្រោយរយៈពេលច្រើនខែកន្លងទៅ លទ្ធផលជាទីគាប់ប្រសើរ ការមិនពេញចិត្តទាំងប៉ុន្មានបានរលាយសាបសូន្យបន្សល់មកវិញភាព ជឿជាក់គ្នា។ សម្រាប់កញ្ញា ការប្រជែងដណ្ដើមមិនជោគជ័យទេ លទ្ធផលចេញពីសមត្ថភាពទើបឆ្លុះបញ្ជាក់ពីជោគជ័យពិតប្រាកដ។

មានសមត្ថភាពមិនខ្វះតំណែង

ខែ មករា២០១១ កញ្ញាត្រូវបានដំឡើងតំណែងមួយថ្នាក់ទៀតក្លាយជា អ្នកគ្រប់គ្រងអាជីវកម្មប្រព័ន្ធផ្សព្វផ្សាយ (Media Business Manager) បន្ទាប់មកទៀត នៅឆ្នាំដដែល ខែតុលា សុគន្ធា បានក្លាយសមាជិកក្រុមប្រឹក្សាភិបាលបណ្ដោះអាសន្ន (Interim Board Director) ដែលជាតំណែងខ្ពស់បំផុតនៅក្នុងមជ្ឈមណ្ឌលដើម្បីប្រព័ន្ធផ្សព្វផ្សាយ នេះ។

ផែនការអនាគត

កញ្ញា សព្វថ្ងៃកំពុងរៀនយកថ្នាក់អនុបណ្ឌិត ជំនាញគ្រប់គ្រងពាណិជ្ជកម្ម នៅសាកលវិទ្យាល័យ Charler Sturt ដែលពេលបញ្ចប់ថ្នាក់សិក្សា នឹងទទួលបានសញ្ញាបត្រពីប្រទេសអូស្ត្រាលី។ កញ្ញាបានយកការសិក្សាជាកត្តាសំខាន់។ កញ្ញា បញ្ជាក់ ថា ៖”រៀនរហូតដល់ថ្ងៃស្លាប់ ព្រោះជីវិតមនុស្សមានរឿងច្រើនដែលយើងមិនទាន់ចេះ រៀនពីសាលារៀន ក្រៅសាលា រៀនពីជីវិតមនុស្ស ព្រោះមនុស្សមានជោគជ័យខុសៗ គ្នា ហើយមិនប្រាកដថា អ្នកមានលុយ មានតំណែងខ្ពស់ ទើបយើងអាចរៀនសូត្របាននោះទេ”។

បទពិសោធន៍ជីវិត

កញ្ញា បានរៀបរាប់ថា ៖”ក្នុងពេលសិក្សា គឺជាពេលវេលានៃកសាងប្រព័ន្ធទំនាក់ទំនងគ្នាទៅវិញទៅមក ពិសេសគឺអ្នករៀនពេលយប់តែម្ដង ដូចខ្ញុំជាដើមពេលជួបមិត្តរួមថ្នាក់ចាស់ៗទាំងនោះ ខ្ញុំបានទទួលទាំងបទពិសោធន៍និង ឱកាសការងារជាច្រើនបន្តបន្ទាប់គ្នា ដូច្នេះសូមប្អូនៗ ចាប់ឱកាសក្នុងពេលសិក្សា កុំទុកពេលវេលាចោលឥតប្រយោជន៍”។

អ្នកដឹកនាំល្អ ត្រូវបង្កើតអ្នកដឹកនាំថ្មីៗទៀត

ស្ថិតនៅក្នុងវ័យក្មេងពិតមែន ប៉ុន្តែមានទស្សន វែងឆ្ងាយ ពេលអង្គភាព បញ្ជូនទៅរៀនម្ដងៗ គឺបានខិតខំប្រឹងប្រែងឲ្យអស់ពីលទ្ធភាព និងបានប្រើប្រាស់ចែករំលែកទៅកាន់ថ្នាក់ក្រោមឲ្យ ចេះដឹកនាំជំនួសកញ្ញា រហូតដល់បានបណ្ដុះបណ្ដាល ឲ្យកូនចៅរបស់កញ្ញាមកកាន់ តំណែងជំនួស ព្រោះកញ្ញាចូលចិត្តសាកល្បងជាមួយអ្វីដែលថ្មី។

ការផ្ដាំផ្ញើ ពូកែប៉ុណ្ណាកុំភ្លេចរឿងសម្រស់

ទោះបីជាធ្វើការស្ថិតក្នុងស្ថានភាពយ៉ាងណាក៏ដោយ មនុស្សស្រីនៅតែចាំបាច់គិតគូររឿង សម្ផស្ស ព្រោះ មនុស្សស្រីរៀនកាន់តែច្រើន វ័យកាន់តែចាស់ៗទៅ កាន់តំណែងកាន់តែខ្ពស់ គឺកាន់តែចាស់ ដូច្នេះត្រូវចេះបែងចែកពេលវេលា រវាងការងារ និងការហាត់ប្រាណ ថែទាំសុខភាព ។

ធ្វើល្អ បានល្អ តែត្រូវធ្វើឲ្យអស់ពីលទ្ធភាព

សូមយុវវ័យកុំមើលឃើញផលបច្ចុប្បន្នខ្លាំងពេក ហើយរំពឹងថា តើយើងបាន ធ្វើអ្វីខ្លះដល់ស្ថាប័ននោះប្រសើរជាងធ្វើតាមតម្លៃដែល គេឲ្យ? ទើបយើងមានឱកាស និងអភិវឌ្ឍសមត្ថភាពរីកចម្រើនបាន។ នៅពេលដែលប្រធានផ្ដល់ការងារឲ្យអ្នកមានន័យថា អ្នកមានឱកាសសាកល្បងជាមួយការងារថ្មី និងប្រធានរបស់អ្នកមើលឃើញសក្ដានុពលរបស់អ្នកដែរ ហើយអ្នកនឹងក្លាយជាអ្នកដឹកនាំនៅថ្ងៃអនាគត៕

អានអត្ថបទ៖ ហៃ វណ្ណា សហគ្រិនវ័យក្មេងកម្ពុជា ហ៊ានបោះទុនបើកក្រុមហ៊ុននៅប្រទេសជប៉ុន ចុចត្រង់នេះ

អត្ថបទ កង ចាន់បញ្ញា