គ្រូកែវិញ្ញសាបាក់ឌុប ធ្លោយបង្ហើបលទ្ធផលកំណែ និង ទស្សន៍ទាយចំនួនអ្នកជាប់គួរឲ្យទុកចិត្តបាន

2014-10-22 20:07:01
ចំនួនមតិ 0 | ចំនួនចែករំលែក 0

ចន្លោះមិនឃើញ

កំណែវិញ្ញាសា សម្រាប់បេក្ខជនប្រលងបាក់ឌុបលើកទី២ នឹងត្រូវបិទបញ្ចប់នៅថ្ងៃនេះជាស្ថាពរ នៅតាមមណ្ឌលកំណែទាំង៩ ក្នុងរាជធានីភ្នំពេញ។ ប្រភពពីលោកគ្រូ-អ្នកគ្រូ ដែលបានចូលរួមកែវិញ្ញាសាប្រលងឲ្យដឹងថា បេក្ខជនភាគតិចបំផុតទទួលបានពិន្ទុជាប់។ ម្យ៉ាងអ្នកជាប់ក៏បានពិន្ទុទាបដែរ។ លទ្ធផលអ្នកជាប់តាមមុខវិជ្ជាទាបបែបនេះ នឹងកាន់តែបង្ហាញច្បាស់ ពីភាគរយអ្នកជាប់បាក់ឌុបពេលប្រកាសលទ្ធផលផ្លូវការ។

“កែម៉ាដុំ ២៥ នាក់ មានជាប់ ច្រើនបំផុតបាន៤ ទៅ ៥ នាក់ប៉ុណ្ណោះ”។ នេះបើតាមការរៀបរាប់របស់សាស្ត្រាចារ្យមួយរូបសុំមិនបញ្ចេញឈ្មោះ។ លោកសាស្ត្រាចារ្យ កែមុខវិជ្ជា រូបវិទ្យា នៅមណ្ឌលវត្តកោះ បានរៀបរាប់ថា មានបេក្ខជនខ្លះបានសូន្យតែម្តង ព្រោះសន្លឹកកិច្ចការគ្មានសរសេរអ្វីទាំងអស់។ ដូច្នេះតាមការសន្និដ្ឋានរបស់លោកគ្រូ បាក់ឌុបលើកទី២ នេះមានបេក្ខជនច្រើនបំផុត១៥% ជាប់។

ចំណែកលោកគ្រូ ប៉ាន់ វណ្ណៈ សាស្ត្រាចារ្យអក្សរសាស្ត្រខ្មែរកែនៅមណ្ឌលព្រះស៊ីសុវត្ថិក៏បានលើកឡើងថា បេក្ខជនចន្លោះពី១៥% ទៅ១៧ % ប៉ុណ្ណោះបានពិន្ទុជាប់លើមុខវិជ្ជាខ្មែរ នៅមណ្ឌលព្រះស៊ីសុវត្ថិ។ ចំណែកគណិតវិទ្យាក្រដាសវិញ្ញាសា ៣០០ នាក់ មានអ្នកជាប់ ៣នាក់ទៅ៤ នាក់ ប៉ុណ្ណោះ។ “ការកែគឺមិនមានការបន្ធូរបន្ថយនោះទេ ។ មួយបន្ទប់ជាប់ច្រើនបំផុត១០ នាក់ ប៉ុណ្ណោះ។ នេះនិយាយតែភាសាខ្មែរទេ។ រីឯគណិតវិទ្យាខ្ញុំឭលោកគ្រូ-អ្នកគ្រូថា ជាប់តិចជាងនេះទៅទៀត។ ដូច្នេះលទ្ធផលផ្លូវការ ខ្ញុំគិតថា មិនលើសពី១៥% នោះទេ”។ លោក គ្រូ ប៉ាន់ វណ្ណៈ បន្ថែម។

ប្រភពពីអង្គភាពប្រឆាំងអំពើពុករលួយបានឲ្យដឹងថា សន្លឹកកិច្ចការរបស់បេក្ខជនភាគច្រើនបានដឹកទៅដល់នាយកដ្ឋានមធ្យមសិក្សាចំណេះទូទៅ ដើម្បីរង់ចាំផ្ទៀងផ្ទាត់ និងបូកសរុប។ អង្គភាពប្រឆាំងអំពើក៏បានកត់សំគាល់ថា ដំណើរការកំណែវិញ្ញាសាគីមី បានបញ្ចប់ហើយនៅមណ្ឌលព្រះយុគន្ធរ។ សន្លឹកកិច្ចការសរុប ទាំងអស់ចំនួន ២៦១៣ សន្លឹក។ មានអ្នកជាប់តែ ៦.៦% ប៉ុណ្ណោះ។

លោក រស់ សាលីន អ្នកនាំពាក្យក្រសួងអប់រំ យុវជន និងកីឡាបានលើកឡើងថា ការកែនៅតាមមណ្ឌលទាំង ៩ គឺប្រព្រឹត្តិទៅល្អដូចការកែលើកទី១ដែរ ដោយមានអ្នកសង្កេតការណ៍មកពីអង្គភាពប្រឆាំងអំពើពុករលួយ និងបំពាក់កាមេរ៉ាសុវត្ថិភាពនៅតាមមណ្ឌលកំណែ។ លោកថា ចំពោះលទ្ធផលពិន្ទុតាមមុខវិជ្ជា យើងមិនទាន់អាចវាយតម្លៃបាននៅឡើយ ដោយសារនៅតាមមណ្ឌលខ្លះបញ្ចប់ការកែនៅថ្ងៃនេះ។ "ភាគច្រើនមុខវិជ្ជាខ្មែរ និងគីមីវិជ្ជាបេក្ខជនធ្វើបានពិន្ទុជាប់ច្រើនគួរសម។ ប៉ុន្តែមុខវិជ្ជាគណិតវិទ្យា និងរូបវិទ្យា គឺបានពិន្ទុទាប។ ប៉ុន្តែយ៉ាងណាយើងនៅតែមិនទាន់អាចវាយតម្លៃបាន ព្រោះបើគិតពីរបាយគឺមិនទាន់ស្មើសាច់ទេ ដោយសារមណ្ឌលខ្លះនឹងបញ្ចប់ការកែនៅថ្ងៃនេះ។ បើសិនជាបេក្ខជនបានពិន្ទុខ្ពស់ លើមុខវិជ្ជាខ្មែរ និងគណិតវិទ្យា អាចមានអត្រាអ្នកជាប់ច្រើន ព្រោះទាំងពីរមុខនេះបានពិន្ទុខ្ពស់”។

ការប្រលងបាក់ឌុបលើកទី២ មានបេក្ខជន ទូទាំងប្រទេស ៦៧០០០ នាក់ ដោយ ចែកចេញជា១១៧ មណ្ឌល ហើយលទ្ធផលប្រលងនឹងប្រកាសនៅថ្ងៃទី៤ ខែវិច្ឆិកា ឆ្នាំ២០១៤។ លទ្ធផលប្រលងសញ្ញាបត្រមធ្យមសិក្សាទុតិយភូមិ(បាក់ឌុប) លើកទី១ មានបេក្ខជនប្រលងជាប់ចំនួន ២៣១២៦ នាក់ ស្នើនឹង ២៥,៧២% ប៉ុណ្ណោះ ក្នុងនោះមានអ្នកជាប់និទ្ទេសA ១១នាក់៕

អានអត្ថបទ៖ ហៃ វណ្ណា សហគ្រិនវ័យក្មេងកម្ពុជា ហ៊ានបោះទុនបើកក្រុមហ៊ុននៅប្រទេសជប៉ុន ចុចត្រង់នេះ

អត្ថបទ៖មៃ សុខលីម